استراتيجية السفاره

يوم الخميس عطله في شركتنا حزمت اوراقي اتجهت للسفاره لتجديد الجوازات كان عندي احساس لازم تكون في عراقيل المهم الموضوع ما بعدي ساكت واي حاجه تبدأ بي نقه بتكون امورها معركسه (( الكلمة من مشتقات معاكسه الموظفين)) بداية النقه كانت من البيت المدام اي حاجه بس ما تقول ليها ايجار الشقه ... فاتورة التلفون والكهرباء.. تجديد الجوازات.... الخ من المنصرفات الغير منظوره بعينها هي .. تقوم النقه... والله غلبنا حيله مع نون النسوه.... يعني نسكن مجاننا والتلفون ده اليوم كلوا في الاضان بلاش والكهرباء كان هنا بتقطع كان اقولوا ليك قروش في شنو في الكهرباء الكلو يوم قاطعه .... نقه تجديد الجواز بدأت.. انت الجواز ده بتجددوا كل عشره شهور الدول كلها يجدد بعد عشره سنوات بس سفارت الجن بتاعتنا دي كل سنتين قروش شنو البتدفعا ليهم ما خدمات الحكومه دي من زمن سكر التموين خلينا ليهم البلد.
وصلت السفاره بدأت الاجراءات عاديه من ضابط الجوازات للخزينه تم التحويل للكمبيوتر طلعت لي ضرائب لعام 2004 قلت ليهم مسدد وجهوني لمندوب الضرائب كتب في الورقه رجعني الخزينه وقفت في الصف جاء واحد وقف خلفي بطيبة السودانيين قلت ليهوا يا زول بتاع الخزينه ده بوديك لي بتاع الضرائب بدل تزحزح للشباك تاني اطلعك امشي لي زول الضرائب ... مشي سرعه وجاء تاني وقف خلفي قال لي الله ابارك كان ضيعت زمني... زول الضرائب طيبا اديتو الورقه قلت ليهوا دافع وقت نزلت اجازه بالله ثانيه وقع رجعا لي... قلت ليهوا انت عارف كتب ليك شنو ((يؤجل)) يعني سيك سيك معلق فيك ... بعد شاف الورقه قال لي الناس ديل كمبيوترم ده ما مربوط مع بتاع السودان غاشننا بيهو ساكت البسمع امشي الكمبيوتر اقول الناس ديل مايكروسوفت والزول اب جلاضيم بتاع الضرائب ده الشحمان من قروشنا انا قايلوا طيب تاري راقد ليهوا علي حاجه الله احلنا منهم ناس السفاره ديل.... وصلت انا الشباك الراجل مسك مني الجوازات حرر الايصال طالب بي 275 ريال عندي 300 ريال اديتا ليهو بفتش في الباقي كتب لي بي ورقه الباقي 25 ريال امشي واجي اخد القروش قلته ليهو اديني الاستيكرات عشان اراجع في الاستلام اتضح العامل اخذ الجوازات واحنا في غلبة الفكه للتجديد بالداخل قال لي مافي مشكله بعد التجديد إنتهي بتسمع اسمك بالمايكرفون... قعدته منتظر الغريبه الناس الخلفي في الصف استلموا الجوازات كمان المدام استلمت انا جوازا (( يا ربي الناس ديل ناس بتاعين السفاره المدام هارشاهم ادوني جوازا بسرعه )) اسمي ده بخير ولا شر الراجل ما قالوا مشيت ليهوا استفسر قعد افتش بعد انتهي قال لي جوازك ما هنا وين الاستيكر بتاع جوازك... قلته اها زولك بتاع الخزنه ما ورطني طلعت ورقة الباقي 25 ريال طلعت استيكر المدام الراجل قال لي اسمع ما عندك استيكر ما جيني هنا قلت ارجع لي بتاع الخزنه استشهد بيهو انا طالع من شباك التسليم احس واحد اضربني في كتفي اتلفت عليهوا ..... أووووووووو اهلا يا باشمهندس وينك انت يا الحبيب شنو ياخي ولا تلفون... قال لي عباس خلي حركاتك دي انت قايل بتغشني انا معاي الاولاد زرناكم ثلاثة مرات انت ولا مره ما جيتني في البيت بعدين عشان اقطع ليك حبل الكلام ما تقول لي انت احسن مني انا عايز اجيك تاني ما عندي مشكله بس المدام رافضه كنت واقف بره السفاره جاء واحد ماشي الدمام قال موكلنوا باستلام جواز بتاع واحد اسموا عباس ختا في جيبوا وودعني ماشي قلت ليهوا استلمت قال ايوه ... طيب طلع الجواز ده شوف امكن الناس ديل ما ختوا ليك لاصق التجديد الراجل طلع الجواز لقيت صورتك وش قلته ليهوا الزول ده صاحبي هنا الودا الدمام شنو طلع مستلم الجواز بالغلط والله كان ما انا بالصدفه بقيت جبارتك كان تتلتل تلتله لامن ريقك انشف .... الحمد لله الزول ده القبض جوازي جابو لي مشيت لي بتاع الخزينه عشان اشيل الباقي 25 ريال فتشت الورقه ما لقيتا قلته للراجل عندي باقي عندك 25 ريال الورقه ضاعت مني انا بتاع الجوازات الما عملت ليها استيكر... عاين لي زي انا حرامي قال لي اسمع ما عندك ورقه ما تجيني هنا لي باقي امشي شوف ورقتك وين... لملمته اطرافي ومشيت اكلم في نفسي الزول ده الله مرقني منو ساكت في ورقة ال25 ريال عمل مشكله كان جيتو قلت ليهوا روحت جوازي بعبرني ال25 ما حاجه وقت جوازي ده ما طشه.... مشيت مع صاحبي اونس فيهو سفاره مافيها استراتيجية تعامل.. تعرف زمن نميري اول حكومة مايو قالوا النميري خاتي سفتوا بتاعت الصاعوط قال لي منصور خالد انت يا منصور عندك جنس كرفتات مع بدلك دي حجمها عريض بصوره غريبه ... منصور قال ليهو يا ريس كرفتاتي دي خليها تعرف كلمة استراتيجيه شنو.... النميري قال ليهو انت يا منصور كل ما نسفرك بلد تجينا بي حاجه جديده ما نعرفا يعني شنو استراتييجه ... منصور قال ليهوا طيب ان يدي دي في التربيزه حاول اضربني بي كامل قواك ... نميري نط فوق عايز اضرب يد منصور ضرب التربيزه طبعا منصور خالد سحب يدوا والنميري ضرب التربيزه .... قال ليهوا يا ريس دي الاستراتيجيه.... نميري مشي لي ناس خالد حسن عباس وجماعة مجلس الثوره العسكر قال ليهم تعرفوا يعني شنو استراتيجيه.... قالوا ليهوا لا ... ختي يدوا في خدوا قال ليهم تعالوا اضربوني .

كنت اود توجيه رسالة عبر هذا المنتدى الى وزير الداخلية بخصوص تجديد الجوازات
ولكن خففت عني حكاية انزال بوست ومتابعته
وما اريد قوله أن المواطن العادي حينما يلتزم بالأنظمة والتعليمات
ويحاول أن يكون نظامياً
نجد ان الناس المناط بهم النظام والانضباط يخالفون ذلك


اسئلة مازالت تحيرني ولا أجد لها اي اجابة
انا واحد من الناس أحاول دائماً أن تكون أوراقي الرسمية سليمة
وكثيراً ما أجدد جوازي وبطاقاتي قبل مواعيدها
وحينما اوشك جوازي على انتهاء العشرة سنوات وهي المدة الرسمية
ذهبت به مباشرة للسفارة قبل شهر من مواعيد انتهائه
حيث ذهبت في يوم 30/9/2007
بينما الجواز ينتهي في 31/10/2007
طوالي ادوني جواز جديد والذي من المفترض أن ينتهي يوم 31/10/2009
فوجدت أن الجواز ينتهي في يوم 30/9/2009
هنا أكلتني الحكومة شهر كامل


يوم الأربعاء الماضي وهو 5/8/2009 ذهبت القنصلية لتجديد الجواز
وهو متبقي عليه 56 يوم من انتهائه
وكعادتي فإنني مسدد للحكومة كل ماتريده
دفعت 215 ريال منها 115 رسوم تجديد الجواز والباقي دفاع
وحينما استلمت الجواز وجدته ينتهي في 5/8/2011
أكلوني هذه المرة 56 يوم بالتمام والكمال
اما لو كنت تود أن تستفسر وتسأل لماذا حدث ذلك
فلابد أن تنتظر شهر كامل حتى تروح { صرة الوش والبوز } لمسئول الجوازات


زوجتي استخرجت جوازها في شهر 4/2009ووصيتها مليون مرة أن تراجع حتى عدد الصفحات
ولدينا بنت اسمها { مآرب } على وزن مآرب أخرى كالعادة يخطئون فيها
وفعلاً كتبوها لنا سد مأرب
ورجعت ليهم
وجاتني مبسوطة بأنها راجعت كل شيء وعدلوا لها الاسم
فتحنا جوازها للمراجعة
وجدنا الجواز ينتهي بعد سنة واحدة من استخراجه اي شهر 4/2010
هنا اكلونا سنة كااااااااااااااااااااااااملة


السؤال
هل هناك مختصين بالجوازات يراجعون هذه البيانات الدقيقة والمهمة ؟؟
واذا افترضنا ذلك فلماذا هذه الفوضى ؟؟؟

ابو حراز شكرا علي المرور تعرف انا زيك دايما بمشي قبل انتهاء الجواز قبل شهر اوشهرين من ما جيت هنا البلد دي ناسك كل نجديد ارجع وراء ياكلوا فيني شهر وشهرين زي ما قلته انت لو عايز تسأل تبقي مصيبه تعرف المصيبه الكبري قبل كده في عقد زواج واحد كتبوا ليهوا اسم عروسه تانية الماذون لخبت في الاسماء كان في كم عرس في السفاره اها دي رايك فيها شنو؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟