لاحظت في مظلة المواصلات يجلس شخص من بعيد .. ويبدوا عليه ليس لديه رغبه في الركوب .. لان المظلة تمتلئ بالركاب وتفرغ اما هو ظل جالسا .. وانا بما اني في اجازة يعني شبه عاطل قررت امشي ناحيته واعرف سره ... لاني على مدى يومين لاحظت نفس الشخص يجلس على نفس المظله .. وانا اعتدت اني استخرج كرسي من الصباح في ظل النيمه امام البيت محاولا ان اقضي فراغ الاجازة ... استغرب كثيرا لعبارة فلان يستمتع باجازته ... انا اعتقد الاجازة لو ماكانت جماعيه مثلا مثل اجازة الاعياد لن تكن ممتعه وهذا ينطبق على اجازاتنا نحن التي نقضيها في السودان..وخاصةالاجازة الفرديه هذه ليس فيها اي متعه .. لان تجد كل من حولك من طلاب وموظفين راحوا لاهدافهم وتركوك لوحدك تطارد في الظل بكرسيك ... لكن جلسة الشخص في المظلة قررت انا ان اكسر بها هذا الروتين الممل ربما في الحديث معه طلعت بشئ جديد ..
وفعلا تركت كرسي وذهبت ناحيته .. وابتدرته بسلام كامل الدسم
قلت : السلام عليكم ورحمة الله تعالى وبركاته ....
هو رفع راسه من خلف السجارة ودخانها الكثيف وحدق فيني طويلا كاني ارتكبت ذنب في حقه ورد رد مغتضبا بكلمة واحدة .
قال : اهلا
في وضع عادي من المفترض انه هذه الكلمة كفيله بارجاعي الى كرسي لكن انا اولا ليس عندي بديل وثانيا هذا الاحباط اثار فيني الفضول والرغبه في معرفة سره .. ودون دعوة منه جلست قربه حاولت ان احركه مثل ما يحرك الشخص موجة الراديو .. جربت موجة الجو والمناخ
قلت : مناخ السودان اصلا ما عايز ينعدل قدر ما تغيب ترجع تلقاه نفس الغبار والحر والذباب ( اشارة خبيثة مني عشان اوريه اني مغترب ... ربما نفتح موضوع من هذه الناحية )
نظر ناحيتي وشهق شهقة طويلة تنم عن الغيظ والحقها بنفس من السجارة التي كادت تنقضي . واخيرا رمى السجاره وداسها واشعل اخرى..
شعرت انا انا موضوع الغربه وانت جايي من وين وانت عايش وين ليس في هواه .. اذا نحاول نشغل موجه ثانية ....
لاعرف هل هو يجلس في المظلة يوميا لمعاكسة ومشاهدة بنات الثانوي والطالبات قلت :
بنات السودان اصبحن جميلات جدا بس خسارة من وين يلاقوا عرسان للبنات ديل كلهم وكيف العرس مع غلاء المهور ..
هنا رمى السجارة الثانية في الارض وداسها برجله والتفت ناحيتي .. ويبدو انه موجته اشتغلت ...
قال : قلت البنات بقن سمحات .. ومن وين ... من يوم ما لغوا مجانية التعليم اصبح المال والجمال والعلم في زاوية .. والشناه والبلادة والفلس في ناحية تانية ...
انا وجدت موضوع انفتح وما عاوز افوت الفرصة دي لازم انفخ في الشرارة قبل ما تنطفي ...
قلت : علاقة الجمال بالمال شنو ؟؟ الجمال دا شئ طبيعي تتولد به المراه حتى لو كان اهلها فقراء .
قال : ياسلام ؟؟؟(ساخرا ) عاوز تقنعني انه بنت تقوم من صلاة الصبح وتكنس ليها حوش مساحتة ربع فدان وتغسل ليها طن بتاع عدة وتتناول فستانها من الحبل وتتشطف تروح المدرسة النهار كله تطارد في المواصلات وعشان ترجع الضهر تغسل الهدوم وبالليل تذاكر بالفانوس .. باقيلك دي ممكن يفضل فيها جمال حتى لو كان ابوها كومار وامها سبنا .
قلت : نفهم من كدا انه البنات اليركبن من المظله هنا ما عجبنك ؟؟ و انت ما جالس عشانهم ..
قال : ابدا ياخي وانت فاكرني شنو ؟؟ وبعدين ديل في عمر بناتي يا اخ .....
قلت طيب : خلينا في ناحية ثانية انا افهم من كلامك السابق انك تؤمن بان الجمال يصنع صناعة ولا يولد ....
قال : بالتاكيد يعني واحدة تانية في حياتها ما غسلت شئ سوى يديها ولا مسكت مكنسة ولا وقفت في المواصلات .. ما اكلت ملاح بايت .. ما لبست فستان واحد مرتين في الشهر ... السواق ياخذها من البيت الى مكان ما تريد ويعيدها .. اي فاكهة في الدنيا تحت امرها وطلبها حتى لو كانت مزروعة في شيلي .... تفتكر زي دي ممكن تكون قبيحة حتى لو كان ابوها جقر وامها خنفسانة ... وزي ما قال اخونا .... السماحة من الراحة والاكل البراحة .... والشناة من التعب والاكل الكعب ...
قلت بصراحة انا سعيد بالونسة معك ... تسمح لي اكون رفيق لك في المظلة طيلة فترة اجازتي .. اهو نتحاور ونسلي بعض .
قال لي : هو انت مغترب ؟؟؟؟؟
قلت : نعم
قال: خد
وانا وقفت طمعا في ان يزيد كلمة لاني ما عرفت هو قاصد شنو بخد دي ؟؟؟؟؟؟ لكن بكره لازم اساله .
