تبرع بدرب ملح طعام تنقذ مريض فشل كلوي

الاخوة الاعضاء السلام عليكم

انا والله ياجماعة داير اعمل المشروع دعما لمركز المناقل لامراض وجراحة الكلي

انا الان عندي حوال ال 18 مريض في اليوم بحتاجو الغسيل الدموي دا غير الحالات الاضافية

طبعا المريض بحتاج في الغسلة لعدد دربين يا جلكوز ياملح بوفرها المركز لكن والله مع التقريطة الحاصلة في البلد دي والله يااخوانا لوشوفتونا تعبابنين كيف في توفير الحاجة البسيطة دي تحنوا علينا نحنا قبل العيانين

مشروعي هو تبرع بدرب تنقذ مريض فشل كلوي " الرجاء الدعم

انا في الشهر محتاج 1260 درب

نبدا نحنا يعني لو حسي كل واحد من اعضاء المنتدي رسل لينا 20 درب بس بنحصل العدد دا

يااخوانا عليكم الله المساعدة بس كل واحد بستطيع يشتري ال 20 درب يديهم لاي بتاع اتوز كبري البوليس مدني يقول ليهو سلمهم مركز المناقل لامراض وجراحة الكلي

لو في ناس بيعرفوا موسسات وجهات خيرية يورونا :

لو في اي زول عاوز يزور المركز اتفضل
انا تلفوني :0122521149 د- دفع الله هاشم


واخيرا اخوانا في الادارة الرجاء الموضوع دا يلقي اهمية منكم ياجماعة ثبتو ا او ياريت لو تخلوهو الموضوع الوحيد لمدة اسبوع والله مهم وعاجل

اقتباس:

---

المشاركة الأصلية كتبت بواسطة الدكتور

يااخوانا عليكم الله المساعدة بس كل واحد بستطيع يشتري ال 20 درب يديهم لاي بتاع اتوز كبري البوليس مدني يقول ليهو سلمهم مركز المناقل لامراض وجراحة الكلي


لو في اي زول عاوز يزور المركز اتفضل
انا تلفوني :0122521149 د- دفع الله هاشم


واخيرا اخوانا في الادارة الرجاء الموضوع دا يلقي اهمية منكم ياجماعة ثبتو ا او ياريت لو تخلوهو الموضوع الوحيد لمدة اسبوع والله مهم وعاجل

---

الدكتور ...
والله كلماتك ( حنينة ) وطالعة من جوووووووة ...
ومرض الفشل الكلوى ( أجارنى الله واياكم ) مرض خبيث ومتابعته صعبة ...
ومريض الفشل الكلوى حقيقى محتاج مساعدة ...
والله لا يضيع أجر من أحسن عملا .

اخونا شكرا علي الرد ودعمك ليا في انجاح المشروع دا

الاخ الدكتور جزاك الله الف خير
وربنا يجعله في ميزان حسناتك
ولو وريتنا التكلفة لي الكميه او الدفعه الواحدة
عشان لو في حد عاوز يتبرع بي تكلفة كوته واحدة ويرسل قروش
الله معهم
وربي ينعم علي الجميع بنعمة الصحة والعافيه

أولا ً نشكر لك هذه البادرة الطيبة أخي دفع الله
و نسأل الله لكم التوفيق و السداد فيما تقومون به من عمل جليل في ظل إمكانات شحيحة
و نسأل الله السلامة و العافية لكل مرضى الفشل الكلوي بالسودان
أخي أرجو التكرم بمراسلة الأخوة بجمعية منتديات ود مدني الخيرية من أجل التنسيق لإنجاح هذا العمل
و أيضا ً الباب مفتوح لكل من يود المشاركة مباشرة عبر مستشفى المناقل سواء بالدعم المالي أو العيني ( دربات )

الاخ الكريم دكتور دفع اللة لك الف تحية ووفقك الله فيما تنوى القيام به.نسال الله الشفاء العاجل لكل مريض.
ونشكر الاخوة فى ادارةالمنتدى العام لتثبيت هذا البوست .

الاخوة الكرام بالمنتدي في الحقيقة انا سعيد للتجاوب دا في الحقيقة بالاضافة للدعم انا كمان عاوزكم تساعدوا في الفكرة ونشرها

مركز المناقل طبعا مركز افتتح بتاريخ 24 - 6- 2009 وهو مركز لو حق ان يقال انه انجاز طبعا محلية المناقل محلية كبيرة شديد انتو اتخيلو بس المرضي دي كانو بغسلوا في مستشفي ودمدني كان الواحد بركب مواصلات 4 ساعات عشان يلقي مكنة يغسل فيها انا والله كنت شفال في مدني والله العظيم كانو ا ببيتو في المظلات بتاعت المستشفي لانو وقت الغسيل دائما بعد 10 مساءا كانوا تعبابنين بالجد الان المركز فيهو 50 مريض ونحنا شغالين 3 ورديات الوردية مدتها 4 ساعات دا غير الحالات الطارئة والحالات الجديدة غايتو ربنا يعين
وعلي فكرة والله الدرب الواحد دا ماتتصورو مهم كيف
والله الطعانة الفارغة مهمة شديد

قيمة الدرب 2500 بالسوق : 20في 2500= 50 جنيه اتصورو الحاجة البسيطة دي
يعني اتصور 150 دولار قيمة 1000 درب تكون كسبت اجر غسل لحوالي 18 مريض في اليوم لمدة شهر كامل


جزاكم الله خيرا

اقتباس:

---

المشاركة الأصلية كتبت بواسطة الدكتور

قيمة الدرب 2500 بالسوق : 20في 2500= 50 جنيه اتصورو الحاجة البسيطة دي

يعني اتصور 150 دولار قيمة 1000 درب تكون كسبت اجر غسل لحوالي 18 مريض في اليوم لمدة شهر كامل

جزاكم الله خيرا

---

الاخ العزيز د.دفع الله
جزاك الله خيراً واسأل الله أن لايريك مكروها ,,,
وشكرا على هذه المبادرة الطيبة ,,
وآمل أن توضح لنا الحسابات اعلاه:
2500 قيمة الدرب ,,, 50 قيمة 20 درب,, 150دولار قيمة 1000 درب
أتمنى التوضيح اكثر ,,,
وكم القيمة المطلوبة لكمية الشهر (1260درب),,
جعلها الله في ميزان حسناتك,,

اخوي شكرا الدرب قيمتو في السوق ب 2500 بس وانا محتاج حوالي 1260 درب

2500 دي بالقديم يعني الان ب 2 جنيه ونص
50 جنيه يعني دي قيمة ال20 درب اللي انا كانت فكرتي انو اي واحد يساهم معاي بيها في المشروع اانا ماعاوز اثقل علي اخوانا

الامال والله عريضة لكن عارفين ظروف الناس
يعني قيمة ال 1260 درب بس اضربوهها في 2 ونص

بس البتتوفر عندو يشتريها ويرسلا لينا بس
مركز المناقل لامراض وجراحة الكلي - محلية المناقل - مواصلتا في السوق الشعبي او في كبري البوليس مدني او الاتصال بينا ونحنا بنوفر المواصلات

تقبل الله منك اخي دفع الله الدال على الخير كفاعله
ارجو ان تعطينا وسيلة لتحويل قيمة الدربات خاصة لمن هو خارج البلاد او في مدن اخرى
وعملية احضار درب غير عملية واعتقد قد تكون غير صحية في بعض الاحيان وجزاك الله خيرا

كونا لجنة بسرعة فائقة للوقوف خلف مركز المناقل لغسيل الكلي ... و قد أتصلت والاخ بكري (grey man) علي الاخ دكتور دفع الله و لمسنا مدي الانسانية الفائقة و الأدب الجم الذي يتمتع به هذا الطبيب الانسان و تحدثنا كثيرا عن المركز و علمنا منه أن طاقته هي 6 ماكينات تعمل بكفاءه عالية لتقدم 18 غسله في اليوم لمواطن مدينة المناقل و القري المجاورة و هو مواطن فقير كان يتكبد المشاق ليصل الي مدني ... و علمنا منه أن الحكومة تدعم المركز بالعلاجات و المحاليل الاساسية و اللازمة لعملية الغسيل و هي غالية الثمن جدا تقدما مجانا ... أما المحاليل الوريدية كمحلول ملح الطعام 8% جعلت الوزارة المركز أن يقم بتوفيرها من ريع المعمل و بعض الرسوم الطفيفة حتي لا تؤثر علي المواطن و تؤثر علي مجانية غسيل الكلي ... و لما كان هذا المركز جديدا و ليس له موارد دخل حتي يقوم بواجب إستجلاب الدربات و الجونتات و بعض المعينات ... خاطبكم هذا الطبيب الانسان حتي تشاركوا أخوانكم في الاجر خصوصا في هذا الشهر الكريم ... و قد كانت دعوته واضحه حيث أن كل من يود التبرع أن يقوم بالتبرع العيني وهي الدربات المذكورة حتي يطمئن أن دعمه مهما كان صغيرا أم كبيرا سوف يصل مباشرة الي مستحقيه دون شبهه استلام المال ... و نسبة لان مواطني المناقل يتجاوبون كثيرا مع مركز الغسيل هذا و الذي أراحهم من عناء السفر لمدني ..ز فإنهم يقومون بتوصيل أي شي يخص المركز علي وجه السرعة و الامانه و الدقة ... فأنت إذا ما سلمت تبرعك لقائد حافلة المناقل و كتبت عليها مركز غسيل الكلي بالمناقل أو سلمتها لسائقي الاتوز في تجمعهم بكبري البوليس حتما سوف تصلهم بأسرعة وقت و أكثر أمانة ...
و نحن هنا في إدارة منتدي ودمدني وجمعية منتديات دمدني الثقافية الانسانية سوف تقف مع هذا المركز بكل ما أوتينا من قوة بإذن الله
و يمكن لكل من هم في الخارج أو الداخل و يرغبون في أرسال مساهمتهم يمكنهم إرسالها للسادة:
الخرطوم:
الاخت أسماء عبد السلام (مدنية)
الاخ حاتم برهان (الممتن)
ودمدني:
الاخ الماحي
الاخ خالد أحمد الصول
الاخ بكري مامون ( grey man)
أو أي مشرف بالداخل
و لقد أتفقنا مع شركة الادوية لتوفير هذه المعينات بسعر مناسب

السلام عليكم ورحمة الله وبركاته
اخواني السلام عليكم
والله انا مشتاق ليكم كتير واشكركم علي وقفتكم الرائعة معايا واتمني المواصلة
الي جميع الراغبين في التواصل مع المركز والتبرع له اتمني تكون عن طريق جمعية المنتديات

نرحب بزيارة اي شخص عاوز يشوف المركز

اقتباس:

---

المشاركة الأصلية كتبت بواسطة ام قبس

الاخ الدكتور جزاك الله الف خير
وربنا يجعله في ميزان حسناتك
ولو وريتنا التكلفة لي الكميه او الدفعه الواحدة
عشان لو في حد عاوز يتبرع بي تكلفة كوته واحدة ويرسل قروش
الله معهم
وربي ينعم علي الجميع بنعمة الصحة والعافيه

---

هذا صوت انساني واسلامي ويجب علينا كمسلمين الوقوف مع هؤلاء المرضي وكما ذكرت يادكنور ان الحوجة لغسيل كلي المرضي في الشهر 1260 نرجو تقييم النكلفة حتي يتسني لنا بالدعم ماديا اي الدرب يساوي كم بالعربي وجزاكم الله لفعل الخير ووفقكم الله وسدد خطاكم .

السلام عليكم اخي الكريم
الان سعر الدرب في السوق بى2850 جنيه سوداني ( القديم )
يعني بي 2 جنيه و 80 قرش (بالجديد)

الله عليك يادكتور دفع الله
وفى ميزان حسناتك
وانشاء الله نقدم الفيهو الخير

نحن في اشد الاستعداد بالتبرع بدرب الملح وسوف نقوم بلاتصال بك ليصلك هذا التبرع
ربنا يجعل عملك هذا في ميزان حسناتك

مستعدون للقيام بهذا العمل يمكن الاتصال بي بالرقم 0912371645 ليصلكم التبرع . واناشد كل الاخوة الاعضاء بهذا المنتدي بمد يد العون لهذا العمل . ونتمني من المولي عز وجل ان يجد هذا العمل القبول من كل الفئات داخل المنتدي وخارجة ولابد من ان نطرق كل الابواب .

اقتباس:

---

المشاركة الأصلية كتبت بواسطة خالد حسن احمد يوسف

مستعدون للقيام بهذا العمل يمكن الاتصال بي بالرقم 0912371645 ليصلكم التبرع . واناشد كل الاخوة الاعضاء بهذا المنتدي بمد يد العون لهذا العمل . ونتمني من المولي عز وجل ان يجد هذا العمل القبول من كل الفئات داخل المنتدي وخارجة ولابد من ان نطرق كل الابواب .

---

جعلك الله زخرا اخي خالد

وسيتم التنسيق معكم باذن الله

وفي ميزان حسناتك

السلام عليكم
اعذروني عن الانقطاع بس والله لانشغالي الشديد في العمل بالمركز
اتمني نفعل الموضوع تفيل جاد والله الناس محتاجة بالجد

اخونا خالد جزاك الله خير
مساهمتك وصلت ربنا يجعلا في ميزان حساناتك