شوق الشوق00للشوفه أخي
ضارب في أطن النسج الحي
يا منقاشو احزاني اانشرت00
وادي الفرح اتمدد صي
يا راحلين عن دغش الليل00
ما لاقيتو جنايا زي
تكية نخل الفجر الجاسر
فوق للمترة عراجين ضي
يا رعاة العرب الرحل
ما لاقاكم في المطراني
في كاويق الجرف الامحل
بين اسراب الرهو الراحل
ساند اكتاف الليل الميل
عن ساساق الغيمة عليكم
بين رقراق الخيمة معاكم
ما اديتوهو شاي بي حرجل
آ رطانة الليلهم ليل
ما لاقاكم في ونساتكم
بين الشادي وبين كاساتكم
في صلواتكم00
عن دعواتكم
او دقساتكم
عز خلواتكم
زول زول الله ان محن آ بسأل
الهباد لي غلب اخواتو
الفراح عوان الحلي
الفدار لليل ظلماتو
آ نجمات شقيش قولنلي
ما لاقاك طالع مندلي
المطعوم من طيبة اماتو
كالفجاج الند نباتو
موج البحر الاحمر هوجتو
وعرق العرق اللاوي ثباتو
جانا الشدر الاخضر منو
ونار الشدر الاخضر جاتو
راح شقيش اب قولا واحد
ليش ما يرجع من غرباتو
طول00طول ما طل علينا
وقاطع مننا جواباتو
الغابات جات تنشد منو
العربان راجين جياتو
اديناهم علقو وعرقو
وصورتو يقلب في كتباتو
ضل رشاشو00
ركيزة زولو
ساعات سلمو ويوم حوباتو
سن طوريتو00ولون ابرولو
وحس طمبورو البي نغماتو
لهلب عشق الناس الفقرا
وبرد جوفن00
بغنواتو الدخلت فينا
تمرق جينا علي جلاتو
وجيدا جينا00
طلقنا وشينا00
ووش اطفالنا الليلة حلاتو
غني معانا غنانا هويتو
غني العالم غني حياتو
لا ساومنا عليها قضيتو
ولا فكينا من ايدنا وصاتو
ألف شليل يا نورا يفوتو
شان ما يجيكي شليلك ذاتو
ولما يجيكي00شليلك ذاتو
مواصلة لابداعات الرائع حميد
