اكــــينو ... دمعــة وطــن !!!

اكينو شاب من جنوبنا الحبيب ... طموح ... متفوق فى دراسته ... طويل القامه شانه شان اهلنا فى الجنوب ... به خفة دم جعلته محبوبا بين زملائه ..
. حاد جدا عندما يتعاطى السياسه حديثه دائما له منطق وحجج جذابه ...
هيام ... شابه من شمالنا المتمدن ... بها مسحه من جمال ... من اسرة مرموقه اشتهرت بتعاطيها الشان العام ..
جمعتهم مقاعد الدراسه والنهل من مشارب العلم فى احدى الجامعات العريقه بوطننا الحبيب ...
لفت اكينو انظار هيام منذ الوهله الاولى ... فقد كان جذابا بروحه المرحه كما انه متفوق جدا فى دراسته ( ربما هنالك اسباب اخرى ) ولكنها صارت تتقرب اليه كلما سنحت لها الفرصه ... حتى صاروا لا يفترقون فى الحرم الجاامعى ..
دائما ما تحب الجلوس اليه .. ومناقشته فى السياسه . والعلم ... وكل شىء ...
ادمنت الجلوس اليه ... وادمن هو الجلوس اليها ...
.فى احدى الايام اتت سلمى زميلة هيام بالجامعه مسرعه ناحية هيام وفى فمها علامات امتعاض خفى...
*سلمى : انتى وين ياخى ...؟؟؟؟؟ بفتش عليك اليوم كلو !!!
*هيام : خير سلمى فى حاجه ؟؟؟؟
* اااااى تعالى عاوزاك ؟؟؟ ثم سحبتها من يدها دون ان تترك لها فرصه الاعتراض
* فى شنو يا بت انتى ؟؟؟؟ وقعتى قلبى ... خير ان شاء الله!!!!!
* خير من وين ياخى وانت اليوم كلو لاصقه فى الزول ده !!!!
* سلمى لو سمحتى الزول ده ما عندو اسم ؟؟؟
* اااى ما عندو اسم ... وبعدين يعنى اخرته شنو البى تسوى فيهو ده ؟؟؟؟

* انا واكينو اتفقنه خلاص على العرس وكلها كم شهر ونتخرج ويتقدم لى رسمى ...
* سجمى ؟؟؟ كدى قولى تانى يا بت امى .. عاوزين تتزوجو ؟؟؟؟!!!!
* وفيها شنو يا سلمى .. العرس عيب ؟؟؟
* لالا انا ما قصدى كدى لكن انتى عارف الفوراق وكده والحاجات دى الكلنا عارفنها دى...

* دى حاجات خلقناها نحن ونحن ممكن نتجاوزها...
* دى مثاليات يا هيام ما ليها مكان فى ارض الواقع .
* منو القاليك يا اختى .. دى اوهام زرعوها اجدادنا من زمان وللاسف نحن مشينا وراها بدون تفكير...
* على العموم انا نصحتك عشان انتى صاحبتى وكده وبعد ده اعملى البريحك !!
* ايوووووواه ... كدى خلينه من الكلام ده ويلا المحاضره

جلست هيام فى مدرج الجامعه وبجانبها كالعاده جلس اكينو وهو مصغى بكلياته الى المحاضر الذى كان يلقى محاضره عن نظرية نهاية التاريخ
بعد انتهاء المحاضره جلس اكينو بالقرب من هيام مخاطبا لها
شوفى يا هيام صراحة انا خايف من المستقبل وعارف اهلك ديل ح يلكنوها!!
عاوزه اقول ليك حاجه يا اكينو اهلى ناس منفتحين جدا وابوى افكارو المعلنه انو ليس هنالك فوراق بين البشر وخصوصا شمال السودان وجنوبه ياخى ده حتى ابوى امين الحركه الشعبيه فى ولاية (.......) يعنى من الناحيه دى اطمن ....
اطمن كيف وسبب معاناة اهلنا فى السودان كله هو الفوراق الوهميه دى ... غايتو الله يكضب الشينه ....
تعرف يا اكينو .. الماضى ده كلو ارمى ورا ضهرك ... ومفروض التغيير الحقيقى يبدأ مننا نحن ... جيلنا يعنى ...نظر اليها اكينو نظره كلها امل وتفاؤل .. اذ ربما .....

مضى العام سريعا وانتهت السنه الجامعيه وتفرق اصدقاء الامس وشغلتهم الحياه الجديده ... الا هيام واكينو .. فقد استطاعوا ان يجدوا نافذه يطلوا منها على غدهم الزاهر لحين اكتمال البدر فى سماء قلوبهم الصافيه ....
دخلت هيام ذات مساء على ابيها مخاطبه
ابوى عاوزاك فى موضوع !!!!
خير يا بتى ؟؟؟!!!
ابوى فى واحد زميلى عاوز يقابلك ... ويطلبنى منك ....
خير يا بتى.... وده من وين يا بتى ؟؟؟؟
من الجنوب ... من واو واسمو اكينو ..
من واو ... الواو التشرطك قولى امين .
..ابوى كدى براحه .. مالك... انت اسى عرفتو كويس وشفتو عشان تعترض ؟؟؟
لا داير اشوفو ولا اعرفو والغــى الفكره من اساساها!!
ابوى؟؟؟ وين المبادى ... والتحام الشمال مع الجنوب وازاله الفوراق البى تقوله كل يوم فى ندواتك ؟؟!!!!!!!
شعارات يا بت .. شعارات ..الكلام ده بى قروش .. .؟؟؟ واقفلى الموضوع ده وما جيبى سيره لى زول .. وطالما فتحتى الموضوع ده عماد ود حاج بله .... كان كلمنى وقال عاوزك وانا قلته ليهو اصبر شويه دحين بكره الجماعه جايين يتعشو معانا وعاوزك تتعرفى بيهو ....
يا ابوى لكن ؟؟؟؟
ما لكين ولا شئ نفذى البقولو ليك !!!!

مضى شهران على هذا الموضوع وفى احدى الليالى المقمره كانت هنالك خيمه عملاقه سدت الشارع باكمله وتوافد المعازيم لحضور عرس هيام من عماد .....
تسلل اكينو خلسه الى داخل الخيمه ... نظر مباشرة الى حيث تجلس العروس ....ليرى هيام والسعاده تشع من عينيها بجوار عريسها وهى تحيي المعازيم بابتسامه خلابه ...

طفرت منه دمعه اودعها احلام عمره المنصرم ونزع سماعة الهاتف التى كان ينساب منها لحنا جميلا ( مافى حنوب بدون شمال ... مافة شمال بدون جنوب ))) والقى به بعيدا
بينما انطلق صوت الفنان مستهلا بداية الفرح وهو يشدو
( سودانى الجوه وجدانى بريدو .... سودانى ... ) ؟؟؟