مديت على سكة هواك
يا غاليه
كلمات من اسى
احرف على الزمن الذى
توهنى بين عل وعسى
وختاك فى البال زكريات
لكنو لى وصالك نسى
وبقيت
اصارع فى الحنين
دمعاتى فى العين احبسا
اتوسل الاحرف تجود
ترحم فؤاد النوم نسا
راكب خيال الشوق دوام
مسكون
وساكنو الفيو سلا
واقف على شفة الضياع
لو مره منك طيف غشا
او حس انو هواك رحل
واحلامو هداها الاسى
تلقيهو فى الزكرى التمر
بى الحسره
زى النرجسه
وكتين يطول بيها الحنين
لى قطره
من ندى تنعشا
تديها احساس الوجود
وتدينى
احساس الرثا
مديت على دربك خطاى
لو القى فى الامال
ملاذ
اقدر الون
بى الحروف
كمين من الافراح رزاز
وارسم على وعد اللقا
بدل الخصام الفى الحراز
دنيا
بتنور بى الامل
والقاك يالون الفرح
رغم البى من العزاب
الوحشه
والضنى
والاسف
اللوعه
والخوف
والبعاد
الدمعه فى الطرف الكسير
والخاطر البيك محتفى
كل ما النسيم منك يخف
الاهه
والنوح
والوقوف
فوق الجراحات الترف
مدة اياديك فى السلام
وخطاك ماشه على تزف
كل الاهازيج والغنا
الق المواسم والمنا
قطبة حواجبك فى العتاب
ضمة شفايفك والسنا
كل الحنين الفينى ليك
سكة مشاويرك وانا
