قصة ثورة
* * * * * *
هاشم صديق
* * * * * *
لما الليل الظالم طول
فجر النور من عينا إتحول
حلفنا نعيد الماضي الأول
ماضى جدودنا الهزموا الباغي
وهدوا قلاع الظلم الطاغي
فى ليلة وكنا حشود بتصارع
عهد الظلم الشبا حواجز ،،، شب موانع
جاءنا هتاف من أرض الشارع
* * * * * *
قسماً قسماً لن ننهار ،،، طريق الثورة هدى الأحرار
والشارع ثار
وغضب الأمه إتمدد نار
والكل ياوطني حشود ثوار
* * * * * *
وهزمنا الليل
وهزمنا الليل
* * * * * *
والنور فى الآخر طل الدار
والعزة أخضرت بالأحرار
* * * * * *
وطني نحن سيوف أمجادك
ونحن مواكب تفدي ترابك
ولسه الشارع بيشهد لينا
فى يوم الغضبه حصاد ماضينا
مشينا نعطر حقل الثورة
* * * * * *
بدم تفديها بلادنا الحره
وكان إكتوبر فجر الغضبه
كسرنا قيود الماضى الصعبه
لما مشينا مواكب صامده
تهدر وتغلي وتهتف راعده
* * * * * *
)الرصاص لن يفنينا (
)الرصاص لن يفنينا (
* * * * * *
وسال الدم بأرض الوادى
فدينا النور بالروح يابلادى
* * * * * *
وكانت صفحه حكاها العالم
وفجر أكتوبر طل وسالم
* * * * * *
وكان فى الجامعه موكب هادر
صمم يجلو الليل السادر
وكان الليل السادر غادر
* * * * * *
فجر غدره سموم دخان
ورصاص من صوته صحى السودان
* * * * * *
والشعب الثائر صمم هادر
يصرع ليلنا الداجى الطول
* * * * * *
)وكان القرشى شهيدنا الاول (
* * * * * *
وما تراجعنا
حلفنا نقاوم ليلنا وسرنا
نذرنا الروح مسكنا دربنا
للشمس النايره قطعنا بحور
حلفنا نموت أو نلقى النور
* * * * * *
وكان فى الخطوه بنلقى شهيد
بدمه بيرسم فجر العيد
* * * * * *
) وهزمنا الليل وهزمنا الليل (
* * * * * *
يا أكتوبر
* * * * * *
نحن العشنا ثوانى زمان
فى قيود ومظالم وليل وهوان
كان فى صدورنا غضب بركان
وكنا بنقسم بالأوطان
نسطر اسمك يا سودان
* * * * * *
بدمانا السالت راويه الساحه
حلفنا نسير مانضوق الراحه
* * * * * *
شهرنا سيوف عصيانا المدنى
وكانت وحدة صف ياوطني
* * * * * *
إيد فى إيد حلفنا نقاوم
ما بنتراجع ولا بنساوم
* * * * * *
خطانا تسير فى درب النصر
هتافنا يدوى يهز القصر
* * * * * *
كسرنا حواجز
ازلنا موانع
صفنا واحد
عامل وطالب ،،، زارع وصانع
* * * * * *
)وهزمنا الليل وهزمنا الليل (
* * * * * *
ياساحة القصر يا حقل الثار
ياواحة بتحضن دم "نصار "
روينا ورودك دم ثوار
وشتلنا فضاك هتاف أحرار
* * * * * *
خطينا ترابك أحرف نايره
بتحكى سطور أيامنا الثائره
* * * * * *
وشلنا الشهداء مشينا ونهتف
وجرح النارفى قلوبنا بينزف
* * * * * *
سجينا الشهداء وجينا نقاوم
ما بنتراجع ولا بنساوم
بينا وبينك ثار يا ظالم
وفجاءة ونحن صفوف بتصمم
زغرد فجر الغضبه الحالم
* * * * * *
) وهزمنا الليل وهزمنا الليل (
* * * * * *
قسماً قسماً يا أكتوبر نحمى شعارك
ونجنى ثمارك
* * * * * *
ونرفع راية النصر الغاليه
ترفرف فوق الساريه
* * * * * *
عليها شعار الثورة الأكبر
رسمه الزاهى وأخضر
ولسه بنقسم يا أكتوبر
* * * * * *
لما يطل فى فجرنا ظالم
نحمى شعار الثورة نقاوم
نبقى صفوف تتمدد وتهتف
حتى يعود الفجر الحالم
* * * * * *
يا أكتوبر
* * * * * *
