حكاية بوست ضاع في السيل الاخير:
الوليد عمر، ايها الساكن فينا كلمات طربنا لها ردحا من الزمان، يا علامة الزمن الجميل، يا ريحانة العيش النبيل ، افتقدناك بعد الطوفان ذلك السيل اللئيم فهل نستسلم إلى جرفه ابداعاتنا ونركن نادبين حظنا العثر ....يا من امتلكتم الكلمة ونواصيها وطوعتم الحرف فسال على قلمكم كلمات رقصنا على انغامها ونادينا خلالها المستقبل البهيج بعد ان رسمته لنا خطىً في مسارات النجوم عاليا مع الثريا باهرا كالشمس ضياءً في السماء ....
نناديك اخي الوليد عمر ونبحر في كلماتك إلى حين العود الحميد :
نجلس اليك اخي الوليد وأنت تناجي عروس الجمال ...مدني العز.... مدني النضال ...فترمي بهذه الجدعة في بحر مدني معلنا سجالا لتمتليء به صدور اخوانك وتردده بعدك الاجيال:
قال الوليد:
كيف الديار... وانا صبري بعدك قلَّ
يا بدر التمام ...طِلْ لينا بس كان طلة
في مدني الجميلة اللابسة أجمل حلة
بنلاقي الحنان ناس الجمال والشـــلة
ما مهم العزول كان كتَّـر كلامو وقلَّ
ما دام القليب .....بعد النشــاف اتبـــلا
رمى الوليد بهذه الجدعة ، وصرت أحضر إلى هذا البوست (جدعة) إلى هذا الطعم كل مرة فاقترب منه ولكني اخاف ان ادخل هذا البحر العميق مع شخص في قامة هذا الشاب ودالبلد الاصيل صاحب هذه الكلمات البديعة .... لم امد يدي فهذا طعم النجباء...أكيد راجيلو واحدا واصل في النم والجدعات ...مرَّ يوم ...يومان والطعم في مكانه لا يتحرك ولا يقربه احد ، خفت ان يسحب هذا الكلام الحلو ...فتوكلت على الله والتقمت الطعم قائلا:
اهلا بالوليد عجبتنا تب جدعــــــــــــاتك
هات لينا منها كتير ما تقللا طلاتــــــــــك
ما اتحكرت تب ياوليد داخل قلوبنا وحاتك
لم تمر لحظات الا وقد سحب الوليد صنارته بقوة ليرى صيده ... فطرب فرحا مع انه صيد بسيط لكنه اتى بعد صبر طويل :
صبر أيوب صبرتو حتى الملك لاقاني
وكل البغذي أكلتو ...لكنو ما غـــــذاني
مكتول مدني تب ...ما اظني انجع تاني
والدكتور عجز ..رقَّــــــــدني ما داواني
فحاولت تطمينه وتخفيف ما عليه:
أخوي يا الوليد جبت الكلام نجضــــــان
دكتورك شن بسوي للفي الهوى هيمــان
علاجك يا الخزين في مدني والخــــلان
تشوف ام ضفائراً زين وتقابل الحــــبان
تديك جريعة ريد ومن الحنان أطــــــنان
ترمي المآسي بعيد تنسى العلل والكـــان
وتعيش سعيد يا وليد عيشة أمير سلطان
فرد الوليد:
النور الحبيب ....عطارة التيـــــــــمان
كيف الشكرة ليك والريد الصبح كيمان
وكتين القليب.... يتعبى بالاحـــــــزان
نلقاها ام خدور.... في مدني بالتحــنان
وسوقنا الدعاش بيهناك يتقالد الخــلان
والقهوة أم زيوق... تتماهى بالفنـــجان
وانت تكون هناك راسنا وعشا الضيفان
كلام كبير طبعا وانا ما قدرو ...لكن اعمل شنو الزول كلامو حلو بالحيل ، اجاريهو بس عشان ما يتوقف وقد ياتي ضليع بالجدعات فيمسكها بديلا عني...فقلت :
ريدتنا ليك يا وليد ...ما جايا من الفاضي
وانت البديتا براك ...مااا جدعتك بتنـادي
سويت العليك يا وليد ورميتها تل بيغـادي
دخَّلتَ فيها حبيبتي ودمدني زدت سهادي
غلبني السكات قداما شايفها لينا تنــــادي
انطلق الحنين بعديها والنار لهيب وقَّادي
مشكور كتير يا وليد مدادي لا حــــدادي
فلم يتردد الوليد بل وكأن الكلمات جاهزة على لسانه وكأنه حس برغبتي في الزوغان فانبرى يقول:
من قالوا القدام ناس المـــــزاج والفــطرة
عبو الروح تمام بيـــــكم تتم الفــــــــكرة
صيايدين فرح في كل بكـــــان بالحــكرة
في مدني الجميل شاقتنا ريحة الذكـــــرة
للحاضرين دوام في بالنا يوتنا بنــــطرى
ليك يا النور اخوي من دمي مليون قطرة
والحبان جميع مدعوة في شان تبـــــرى
وهنا وجدت نفسي قد اصبت ببلوى هذا النوع من الجدعات ... لم اتمالك نفسي وانا اسمع الوليد يهبني مليون قطرة من دمه والناس تتفرج ما عاوزة تنجدني من هذه الورطة .... ولكن...
ما عشت انا وما كنت لو لم اشكر الوليد على هذا الكرم البديع فقلت له:
مليون قطرة دم كتيرة تب في شــــــــاني
لكن يا العزيز من دمي هاك .... ما ببــالي
ليكا وكل زول .....بمدني شاغــــــل بالي
ناس المروءة الزين مزارعي والتربـــالي
ناس العلم والراي العلماء ما جهــــــــالي
مليون قطرة دم بديها ما همـــــــــــــاني
ديل البسندو قفاي ديل البربو عيـــــــالي
ديل البكرمو الضيف ديل العشم والفـــالي
واكرم يا الوليد عقبا أرح طــــــــــــــوَّالي
وهنا دخل ابوبكر حامد ،،، ياااا زوووول الحكاية وسعت اوي فقد تورط النور ،،، والوليد استعدل ...فجاءت النجدة من السماء .....هبشو ليك ودالماذون كبير القوم وقال:
حباب الوليد في دارو العروب متلمة
يكفينا منك بس بينورنا زلت الظـلمة
اريتك انت طيب لا يجيكا هم لا غمة
اتجادعوا الحبان جروا الحنين والنمة
ما صدَّق الوليد ...الصنارة هذه المرة اصطادت صيدا سمينا ....سيد القعدة ذاتو عمدة البلد ودالماذون ...الجابك تحوم بيهنا شنو ؟؟؟ ...تعال جاي:
أبو بكر أخوي..... سيد البكان والقعـــــــــــــدة
صدقت والله يا الوليد
شوفتك يمين ياحبيب شوفة غريق للنجــــــــــــــــــدة
دا النجدة لي انا .... ربنا شافني وجاب لي زول يفكني من كربات الوليد ...أنا كان مالي ومال الجدعات ...انا زول بتاع نثر سااااي ....
الشرف هولك براك فاض للجمـــــوع وامــــــــــــتدَّ
ما قصرت تب يا الوليد..... ابوبكر قدرها وزود
مِنُّو مدني تضوِّي.... وام در كـــــمان وام بـــــــدة
صدقت والله يا وليد صدقت
النور الحنين لولاهو ...الجـــــــــــدعة ما بتشــــــتدَّ
ماااالك ياوليد..... تاااااني جايب سيرتي...... مااااالك ....انا ما صدقت....غاااايتو
خلينا ننتظر شوية ...يمكن ابوبكر يتحرك ويستلم الراية .... بس ربك صاحب حكمة .... ينط ليك من هناااااك اخي محمد عبدالله عبدالقادر .... وتوووووف في الصنارة وتشبك ليك فيهو فيقول:
والله استمتعت غاية الاستمتاع بجدعاتكم التي اصابت الهدف تماما
لست ممن يوزنون الكلام ولكني ممن يعيشون الكلام الجميل
انحنا في انتظار المزيد
ودمتم
برضو كويس .... أهاو يفك لينا كربة النور دي ....
نعم فقد كان الوليد حارسا امينا لهذا البوست ....يعطي كل ذي حق حقه ... قدِمتَ أيها الفتى محمد عبدالله عبدالقادر وكنت انا اكثر الناس بك فرحا وكان لزاما على الوليد ان يقوم بواجب الضيافة فناولك الوليد هذه الكاس ملأى باطيب انواع العصيرات:
عِمرَتْ ديـــــــــــار ودمدني مما تبــــــــــت
فيها القلوب ولهانة نيرنانها اتهبَّـــــــــــــت
وبالزينات بنات الالفة يوت اتعبَّــــــــــــت
على شارع الدكاترة الريد خدَّر اصالة ونبَّت
في السوق الكبيـــــــــر فيهو القلوب اتربَّـــت
اتعلمنا الوّلَهْ يا اخوان ودمني هامت وحبَّـــت
خلاص الحكاية صارت شبه عادية ،،، كمان مشينا نهبش غير الوليد ، لم اكتف بما قاله الوليد لاخي محمد عبدالله عبدالقادر فقمت انا كمان وهبشت الوليد من خلال محمد عبدالله عبدالقادر وقلت له:
الراجل تقيل ...بايدي ما بِنْقَــــــــــــلْْ
لكن لو سِخا ...ما نسم الخريف والطلْ
ينثر للكلام ...ورد الربيع والفُــــــــــلْ
يطرب من حديثو جموع الخلق والكُلْ
ونواصل
