تخيل لو كنا نحن الضحايا

نحن والحمد لله انه ربنا اكرمنا وجعلنا خلفائه في الارض وسخر لنا مخلوقاته من انعام ورياح ومياه وجبال .. وانزل لنا الحديد ( اكتشف العلماء بان الحديد فعلا ليس من معادن الارض ) وتعلمنا كيف نصنعه ونطوعه ونوظفه ونصنع منه ادواتنا ونهضتنا وسياراتنا واسلحتنا ..

ولكن اهم قطعة حديد سيكون عليها التركيز في هذين اليومين هي السكين .. تلك القطعة التي لا تتجاوز الشبر طولا وبمقبضها الخشبي .. ستكون هي نجمة الغد والايام القادمات .. لانها هي الموكل اليها تحويل الخروف من كائن حي مكسي بالصوف الى كوم لحم في الاولى حمراء تسر الناظرين وتسيل لعاب الضواري اولا ومن ثم الى قطع شية على الجمر او على الصاج كاشهى ما تكون اللحوم والراوائح الزاكيات ..

لكن تخيلوا لو ان الوضع كان العكس ... بمعنى لو كانت الخرفان هي خليفة الله في الارض وكنا نحن الضحايا .. تعوذ واتفل عن يسارك .. لكن الخيال لن يضيرك ..

متكئ انت في الزريبة تتدارى خلف اخوانك تخاف ان يتم اختيارك من قبل السيد الخروف وعائلته الكريمة واطفاله الحملان يتصايحون في ابيهم ..

( بابا اشتري لينا داك ابو نضارات )

امهم ( بري داك مشيب وبيكون لحمه قوي ( انا طلعت منها بسبب الام الفاضلة ) .. عايزين لينا بني ادم كدا يكون دهنو كثير وعمره صغير عشان عاوزه اعمل منه دهن كركار لفروتي .. شوف لي داك القصير السمين داك ابو بنطلون جنزي )

يتعب .... اقصد يتبع

[عدنا

بائع الناس في هذه الحالة والذي هو خروف وابن ستين خروف يتصدى لاسرة السيد الخروف الكريمة ليساعدهم في اختيار الانسان الذي سيضحون به ..

خرفان افندي : قول لي يا سيد باع الدولة انتو الخروف عفوا ( الانسان ) عازينه صيني ولا امريكي ولا سوداني ولا سعودي ؟؟؟
باع الدولة: في الحقيقة يا خرفان افندي ما في فكرة معينة لانه عادة انا ما متعود على اكل لحم الناس كثيير لانه انا في الغالب نباتي .. ولكن المدام هي المصرة . وبالمناسبة بتحب ام فتفت الانساني جدا جدا ..
خرفان : وفي حد ما بيحب كبدة الانسان ادم بالدكوة والبصل والشطة الحارة والليمون .

السيد باع : ياخي انت دخلتها لينا في نفسنا ورجعتني لحمنجي من جديد خلاص انت تنصح بياتو نوع ..

خرفان افندي : انا يتخيل لي السودانيين كويسين اولا لانه اكلهم ما فيه بهارات كثير وبيرعو رعي طبيعي ومعظم اكلهم عصيدة زره مع ويكة عشان كدا ما فيهم دهن كثير وكلسترول وكدا ..

( طبعا كل السودانيون في الزريبة اتغاظوا من البائع وبدا يستخبوا خلف الجنسيات الاخرى ).

السيدة ام الخراف : بري يا اخوي ما بشتري زول سوداني انا يا تجيبه لي امريكي ولا ما عايزين ..

خرفان : ولا يهمك يا مدام وطلبك موجود ..

يتم رفع اثنين من الامريكان المربربين في سيارة السيد الخروف وحرمه النعجة المحترمة

طبعا زبائن تجي وزبائن تروح

والخرفان عفوا والناس في الزريبة عددها يتناقص وكل مره يقع الاختيار على احد الزملاء حسب ذوق الخرفان ومزاجهم وزوجاتهم .. الغريبة نحن البشر لا ناخذ راي زوجاتنا في اختيار الخرفان .. ويصبح الخروف هو الشئ الوحيد في البيت الذي يشتريه الزوج بمزاجه هو وياخذه لحما مقطعا للزوجة في البيت .. لكن يبدو ان الخرفان اكثر ديمقراطية منا اذا انهم يصحبون زوجاتهم واطفالهم لشراء ضحاياهم من الناس ..

وانا ساتقمص شخصية احد الضحايا حتى ننقل الصورة بدرجة اوضح ..

كل ما ياتي زبائن جدد من الخرفان ادعي المرض و(اقتل حيلي) حتى لا يتم اختياري .. ونجحت كل تلك المحاولات .. الى ان جاء واحد خروف كحيان ما عنده حق الضحية يا دوب باع ساعته وراديه حتى يضحي زيه وزي الخرفان .. ( وعلي راي زوجته ليه هو نحن مش بني خرفان زينا وزي بقية البهايم ما بنضحيش ليه ( يبدو انه زوجته نعجة مصرية ) ) المهم جمعوا ما وقع من يدهم وباعوا خلاطة البرسيم الوحيدة العندهم جاؤوا الى زريبة الناس .. ووقع اختيارهم على زريبة صاحبنا .. وقال لهم خذوا السوداني دا ما دام قروشكم ما بتكفي اصلا هو مرضان ورخيص ( يعني خطتي انجتني في الاول ولكن الان رمتني في شر اعمالي . .. ووقع الاختيار علي ..)
وكانت السيدة النعجة وزوجها خرف الدولة سعداء بشرائي وحملانهم الصغار كانوا في غاية الفرح بمقمدي الميمون وكانوا ينطحوني في كل مرة تعبيرا عن سعادتهم بي .. وقالوا يغشوا المطعم السودني ليشتروا لي عليقتي من الويكة والكسرة .. ربما اسمن وصحتي تتحسن الى ان ياتي يوم العيد ..

وركبت مع جماعتي في البوكس بتاعهم والذي طبعا شكله يتناسب مع شكل وقوائم الخروف ما تنسوا انه الصانع نفسه خروف ... في الاول تمردت وادعيت بعدم قدرتي على الركوب ( كما تفعل معنا الخرفان) لو لا نطحة قوية في ظهري من السيد خروف القت بي داخل البوكس واحضر كبير الحملان حبل وربطني مع تندة السيارة .. وفعلا الجماعة غشوا المطعم السوداني واشتروا لي كمية من الكسرة بالويكة كعليقة انا لو كنت بفهم لغتهم كان طلبت اكل غير الويكة ( هو انا مذبوح مذبوح واختم بكسرة بويكة .. ومين قال لاني انا سوداني لازم اكل ويكة ( بصراحة نحن نشتري البرسيم للخروف دون ان نشاوره او حتى نختبره هل هو يحب البرسيم ام لا ))
المهم من هناك على بيتهم وادخلوني على الزقاق وربطوني هناك قرب الراكوبة .. وامهم قالت ابعدوني من الراكوبة خايفاني آكل الحبال المربطة بها الراكوبة . وجاء حملان الجيران يتفرجوا علي بعد ما تفاخر معهم اولاد صاحبي وبلغوهم بانهم اشتروا انسان سوداني يتلتل .. ومن باب التباهي قالوا ان السوداني من احسن الناس للضحايا .. اولا لحمه طيب ما فيه دهن كثير وقالوا عشان امهم وابوهم عندهم الضغط بيخافوا من الكرسترول عشان كدا فضلوا يشتروا سوداني .. ما قالوا لانهم مفلسين وقروشهم ما كفت الا لشراء هذا الخروف عفوا الانسان السوداني الكحيان .. كان الاطفال اقصد الحملان كل مجموعة اخوة يتباهون بنوع الانسان الذي سيضحون به هذا العام .. واحدين يقولوا ان ابوهم فضل المصري لانه بيحب الشحم وواحدين قالوا ابوهم احضر امريكي لانه لحمته نظيفة .. وهكذا .

وانا جالس اكل في ويكتي واستمع لونسة الصغار

اقتباس:

---

المشاركة الأصلية كتبت بواسطة درديري كباشي

تخيل لو كنا نحن الضحايا

---

الغالى أبو الدر

صدقنى قدر ماحاولت ماقدرت أتخيل

وبعد باع الدولة وخرف الدولة

الله يكفينا خرفان الدول الكبرى وديل بضبحوا فينا كل يوم

اقتباس:

---

المشاركة الأصلية كتبت بواسطة درديري كباشي

وانا ساتقمص شخصية احد الضحايا حتى ننقل الصورة بدرجة اوضح ..

---

سلامات أبو الدر والله لا جاب يوم ضبيحتك:D:mad::D:p:mad:

وطبعا انا جالس اتناول في عليقتي من الكسرة والويكة ورغما عن طعمها الردئ الا انه الجوع تمكن مني وصاحب الزريبة كان ( هارينا ) فتة خبز بموية فول وملح .. وقال في واحد خروف صاحبه نصحه انه لازم ياكل كل ناسه ( بهايمه) فتة بموية فول وملح حتى يبدون سمان ايام العيد .. وكلنا دون فرز امريكي على سوداني .. في الاول كان يعتني بنا ويحضر لكل جنس نوع الاكل الذي يفضله .. يعني مثلا بيتزا للايطاليين وهمبرقر للامريكان وكبسة للخليجيين وكسرة بويكة للسودانيين وفول وطعمية للمصريين وسمك للفلبينيين وهكذا .. لكن نحن كنا مره مره نتبادل مع الاجناس الاخرى .. لكن آخر خمستاشر يوم ركز لنا على موية الفول حسب الوصية كما ذكرنا .
وانا كل ما احاول اخذ غمضة نومة اصحى على صوت ضجيج اما الاطفال ( الحملان )او السيدة النعجة تكون احضرت واحدة من صاحباتها للتفرج على زول العيد بتاعهم .. وهي تتباهى وتتفشخر على ميزات الخروف السوداني ( عفوا الانسان السوداني ).. وتقول لهم ( كان شفتوا قالوا فيه جنس شية كمان طاعمة بلا ملح وليمون ) .
وسمعتهم يقولوا باقي علي العيد ثلاثة ايام .. والنعجات نصحوها بانها ما تحاول تغير لي نوع الاكل ربما يحصل لي تسمم واموت لذلك علي ان اواصل كسرة بموية .. طبعا انا بعد ما سمعت نصيحتهم الغلية ثرت ورفست عليهن لكن دون جدوى هن قالن ربما قرصتني نحلة او شئ آخر .... وحتى الثلاث ايام الباقية لن اذق فيها سوى الكسرة بالويكة

,

اقتباس:

---

المشاركة الأصلية كتبت بواسطة ودالعمدة

الغالى أبو الدر

صدقنى قدر ماحاولت ماقدرت أتخيل

وبعد باع الدولة وخرف الدولة

الله يكفينا خرفان الدول الكبرى وديل بضبحوا فينا كل يوم





سلامات أبو الدر والله لا جاب يوم ضبيحتك:d:mad::d:p:mad:

---

سلام يا عمدة وكل عام وانتم بخير

توجد نعم من الله علينا دقيقة جدا نحتاج نبحث فيها


ابسطها انه ربنا لم يترك يد اي مخلوق آخر تتسيطر علينا ولا حتى الجن نحن اقوى منهم ..


لكن باسنا بيننا شديد

كيد الانسان للانسان هو الافظع

خلونا نقول عدت الايام الثلاثة بسرعة ورغما عن شقاوة الحملان الصغار بتعذيبي والركوب على ظهري وجري بالحبل من رقبتي حتى اكاد اخنق .. ورشي بالخرطوش في عز البرد بنية تحميمي وغسلي كما قالوا لاهلهم الخراف الكبار ...

وكان السيد الخروف يقف متباهيا مادا كرشه وهو ينظف في اسنانه بقشة ويرى في اطفاله يعذبوني دون ان يردعهم .. وهو يضحك ضحكات الشبع متباهيا بشكلي الوسيم امام اقرانه من الخراف ( هاع هاع هاع ) ما تنسوا تجو تفطروا معانا يوم العيد وتذوقوا شية السوداني اللذيذة والكوارع ( هاع هاع هاع )..

وجاء يوم العيد وشاهدت الصغار حولي فرحين احضروا لي جك موية باردة وشربت حتى اروتويت واخذوني من الحبل وجروني حتى منتصف الحوش .. ورايت الخروف الجزار يحضر . ويستخرج من جيب فروته سكاكين وسواطير ..


ويمسكني من ايادي ورجلي ويرميني ارضا .. ويمسك راسي ويضع يدي اليمين تحت رقبتي ..ويمسك السكين بين اسنانه حتى يكتفني تماما .

ثم يتناول السكين بيده ويضعها في عنقي


واقوام انا مفزوعا احمد ربي لاني صحوت على صوت الخروف في الزقاق تحت


وام العيال تقول لي خذ الخروف للجزار


وكل عام وانت بخير


وكل عام والجميع بخير


والحمد لله على نعمة العقل ونعمة الامانة ونعمة خلافته في الارض دون سائر خلقه


وكل عام وانتم بخير

الأستاذ الجليل والرائع درديري كباشي
حقا أنا أمام عمل وتحفة حقيقية فيها من جميل السرد وتسلسل الأحداث وكأنني أشاهد فلما غني بالرمزية الساخرة والتى تجسد الأوضاع السياسية والحياتية المثارة في الشارع السوداني خصوصا في هذه الأيام المباركة
لك كل جزيل الشكر وكل عام وأنتم بخير

اقتباس:

---

المشاركة الأصلية كتبت بواسطة محمد النور محمد يوسف

الأستاذ الجليل والرائع درديري كباشي
حقا أنا أمام عمل وتحفة حقيقية فيها من جميل السرد وتسلسل الأحداث وكأنني أشاهد فلما غني بالرمزية الساخرة والتى تجسد الأوضاع السياسية والحياتية المثارة في الشارع السوداني خصوصا في هذه الأيام المباركة
لك كل جزيل الشكر وكل عام وأنتم بخير

---

مشيت بعيد يا ابو حميد

لكن لاباس من النظر للموضوع من زاويا جديدة


كل ما في الموضوع انا عسكت موقفنا مع الخرفان فقط


ولو في مواقف ثانية معكوسة يكون راس السوط هبشها

اقتباس:

---

المشاركة الأصلية كتبت بواسطة درديري كباشي

واختم بكسرة بويكة ..

---

هههههههههههه

الحبيب ابوالدر ذكرتني زميلا لنا في العمل في السودان سبحان الله كل ما الكهرباء تقطع يسب الويكة بافظع الكلمات
و لو تذمر من شي يصب جام غضبه على الويكة
يبدو لي انه له تجارب ( مرة ) مع الويكة
او اكل كوته من الويكة في الدنيا

كان عندنا في الفريق جارة لها اطفال صغار ، بدري شوية في السودان ايام الكوليرا والنزلات المعوية
كان كلما تسمع عن هذه الامراض تفرض حالة الطواري في البيت و توقف كل انواع الطبيخ ما عدا العدس ثلاث وجبات و تشرف علي طبخه بنفسها
و الظاهر ( اتهرت ) من اكل العدس و لكن مجبرة طبعا للحفاظ على صحتها و صحة العيال
الحمد لله الايام تلك مرت بسلام

حكى لي صديقي ( اخوها )

يوم صحاها للعشاء

يا فلانه يا فلانه العشاء و قال كانت شبه نائمة

قال قالت ليه العشاء شنو ؟

قال ليها : عدس

قال قالت ليه : بري يا اخوي انا عدسي في الدنيا اكلته و واصلت نامت في محلها

اقتباس:

---

المشاركة الأصلية كتبت بواسطة عبدالله محمد العقاد

هههههههههههه

الحبيب ابوالدر ذكرتني زميلا لنا في العمل في السودان سبحان الله كل ما الكهرباء تقطع يسب الويكة بافظع الكلمات
و لو تذمر من شي يصب جام غضبه على الويكة
يبدو لي انه له تجارب ( مرة ) مع الويكة
او اكل كوته من الويكة في الدنيا

كان عندنا في الفريق جارة لها اطفال صغار ، بدري شوية في السودان ايام الكوليرا والنزلات المعوية
كان كلما تسمع عن هذه الامراض تفرض حالة الطواري في البيت و توقف كل انواع الطبيخ ما عدا العدس ثلاث وجبات و تشرف علي طبخه بنفسها
و الظاهر ( اتهرت ) من اكل العدس و لكن مجبرة طبعا للحفاظ على صحتها و صحة العيال
الحمد لله الايام تلك مرت بسلام

حكى لي صديقي ( اخوها )

يوم صحاها للعشاء

يا فلانه يا فلانه العشاء و قال كانت شبه نائمة

قال قالت ليه العشاء شنو ؟

قال ليها : عدس

قال قالت ليه : بري يا اخوي انا عدسي في الدنيا اكلته و واصلت نامت في محلها

---

والله يا عقاد نحن اتملينا عدس في الداخلية يكفينا ربع قرن

لكن صاحبك بتاع الويكة بالغ عديل ..

قلت لي كان قرصتو نملة يسب الويكة ..

ماشاءالله خيالك واااااااسع شديد , الله يديك العافية .:rolleyes::)

يا اخوي جنس رعب

ههههههههههههههههههههههههههههههه لقيتك صعب ياودكباشي هههههههههههههههههههههههه
اسمعني جربته شوربه الانسان
ما تنسوا تجو تفطروا معانا يوم العيد وتذوقوا شية الانسان اللذيذة والكوارع ( هاع هاع هاع )..

اقتباس:

---

المشاركة الأصلية كتبت بواسطة درديري كباشي

تخاف أن يتم إختيارك من قبل السيد الخروف وعائلته الكريمة و أطفاله الحِملان يتصايحون في أبيهم ( بابا أشتري لينا داك أبو نضارات )

---

( باع باع باع ) أقصد ( أحم أحم أحم ) طرف السوط وصلني يا أبو الدُر :p
يخسي على التعب و الملاح الكعب ، عايز تضحي بي يا درديري يا ود كباشي عشان تبقى مُشرف ;)

اقتباس:

---

المشاركة الأصلية كتبت بواسطة عبدالله محمد العقاد

قال قالت ليه : بري يا أخوي أنا عدسي في الدنيا اكلته و واصلت نامت في محلها

---

:) :) :)
:p :p :p
:) :) :)

اقتباس:

---

المشاركة الأصلية كتبت بواسطة moram

ماشاءالله خيالك واااااااسع شديد , الله يديك العافية .:rolleyes::)

---

وينك يا مرام كل عام وانتم بخير


لاعاد تطولي الغيبة .. كما يقول اهل الخليج

اقتباس:

---

المشاركة الأصلية كتبت بواسطة منقة العسل

يا اخوي جنس رعب

---

منقة شايفك مدورة شية بهناك .. نحن هنا عكسنا الوضع بقينا نحن الشية علىك ان تختاروا تكوني شية ولا تكوني نعجة احسن ليك ؟؟

اقتباس:

---

المشاركة الأصلية كتبت بواسطة رضاك ياصفيه

ههههههههههههههههههههههههههههههه لقيتك صعب ياودكباشي هههههههههههههههههههههههه
اسمعني جربته شوربه الانسان
ما تنسوا تجو تفطروا معانا يوم العيد وتذوقوا شية الانسان اللذيذة والكوارع ( هاع هاع هاع )..

---

يا اخوي عشان تجرب شوربة الانسان معناها تكون انت الخروف ..

تخيل نعمل شعار مطبوع ومرسوم فيه قلب ومكتوب فيه انا الخروف

اقتباس:

---

المشاركة الأصلية كتبت بواسطة moh_alnour

[size="4"][color="black"]

( باع باع باع ) أقصد ( أحم أحم أحم ) طرف السوط وصلني يا أبو الدُر :p
يخسي على التعب و الملاح الكعب ، عايز تضحي بي يا درديري يا ود كباشي عشان تبقى مُشرف ;)

:) :) :)
:p :p :p
:) :) :)

---

محمد نور حكاية النظارة دي انا حسمتها برد الام وقالت ( بري دا مشيب وحيكون لحمو قوي .. وطلعت بيها نفسي من الاختيار .. لكن راس السوط يهبشك من الناحية الثانية هي قالت عايزاه صغير ومبغبغ عشان تطلع منه دهن تسويه دهن كركار .. انت صغير دي ظاهرة في الصورة بس حكاية الدهن دي ما ظاهرة في الصورة لكن طالما عايش في السعودية وضارب الكبسات بتملا ليها برطمانية مربة .. وكفاية .. ما بتقعدها لغاية العيد الجايي ؟؟.

اقتباس:

---

المشاركة الأصلية كتبت بواسطة درديري كباشي

وينك يا مرام كل عام وانتم بخير


لاعاد تطولي الغيبة .. كما يقول اهل الخليج

---

وإنت بكل الأعوام بخير إن شاءالله وربنا يحقق كل أمانيكم.:)

الغيبة بالرغم من أول يومين فيها كان مقصود بس سبحان الله باقيها جاء جبرا ( شكلو كان عقاب على اليومين :p القاصداهم ) , لكن برضو بالرغم من إنشغالي كنت بدخل وأشوف الحاصل , و الغياب كلو خير والحمدلله . وإن شاءالله ماراح نطول الغيبة وعلى طول إن شاءالله نكون وياكم ;)

ابوالدر سلام وكل الاعوام انت والاسرة والاهل بكل الخير..
تعرف المحيرنى الخرفان ديل لما يضبحوا الازوال "جمع زول" حيسلخونا كيف؟..
جد الحمد لله سخرت الحياة للإنسان وإلا كنا فى خبر كان لأنو الخرفان بتولدو كل سته شهور وعندهم كان بيكون العاقل البالغ تنى "قايماتلو سنتين غير اسنان الرضاعة" وطبعا أعدادم كانت حتكون أكتر من البنى أدمين لأنو الضبح فيهم كان اتوقف من زمن سيدنا ابراهيم..وحاتك شيباتك ولا نضارات محمد النور ما كانن خارجنتكم لأنو كانو قبل الشيب والنظر ما يضعف ضحو بينا..
قلت ليا ويكة..عليك امان الله كانت تكون العليقة بامية نية ولا خضرة ما مورقة ..قال ويكة قال..
جد دخلتنا فبلم رعب وخسوسا من المعدن القادم من خارج الارض داك..
هسى الواحد خايف ينوم تظهر ليو نعجة هانم وشفعا ..
بالغتا لكن فينا..

بكره الخرفان اشاكلوووووووووو في جلد الانسان على فكره هو بي كم في السوق بدون الراس

اقتباس:

---

المشاركة الأصلية كتبت بواسطة أشرف صلاح السعيد

ابوالدر سلام وكل الاعوام انت والاسرة والاهل بكل الخير..
تعرف المحيرنى الخرفان ديل لما يضبحوا الازوال "جمع زول" حيسلخونا كيف؟..
جد الحمد لله سخرت الحياة للإنسان وإلا كنا فى خبر كان لأنو الخرفان بتولدو كل سته شهور وعندهم كان بيكون العاقل البالغ تنى "قايماتلو سنتين غير اسنان الرضاعة" وطبعا أعدادم كانت حتكون أكتر من البنى أدمين لأنو الضبح فيهم كان اتوقف من زمن سيدنا ابراهيم..وحاتك شيباتك ولا نضارات محمد النور ما كانن خارجنتكم لأنو كانو قبل الشيب والنظر ما يضعف ضحو بينا..
قلت ليا ويكة..عليك امان الله كانت تكون العليقة بامية نية ولا خضرة ما مورقة ..قال ويكة قال..
جد دخلتنا فبلم رعب وخسوسا من المعدن القادم من خارج الارض داك..
هسى الواحد خايف ينوم تظهر ليو نعجة هانم وشفعا ..
بالغتا لكن فينا..

---

قلت لي يا ابوالشوش كان نكون زماااان بقينا اقاشي في عشش فلاته بتاع الخرفان .. على حال الحمد لله على النعمة وبقينا نحن الضباحين


كل عام وانتم بخير واكيد راح نتلاقى في العيد

اقتباس:

---

المشاركة الأصلية كتبت بواسطة رضاك ياصفيه

بكره الخرفان اشاكلوووووووووو في جلد الانسان على فكره هو بي كم في السوق بدون الراس

---

قلت لي يا رضا ممكن يعملوا من جلودنا دلاليك كمان