صريبة على الميت ؟؟؟ ممكن تكون!!!
صيوان عزاء
الفاتح يوسف جبرا.
www.alfatihgabra.com
توفي إلى رحمة مولاه ( الجزولي عوض الجزولي) والد كل من المرحوم ..... وجد كل من ( كمال) الموظف بالضرائب و... بينما كان النعي يذاع ضمن نشرة الثالثة بعد الظهر كان ( كمال) ومعه نفر من أهله قد توجهوا لاستخراج ( شهادة الوفاة) حتى يتم ستر الجثمان بعد صلاة العصر كما جاء في الخبر… وعند الموظف المعني باستخراج الشهادة وبعد أن شرح له كمال الأمر وقام بتسليمه التقرير الطبى الصادر من المستشفى الذى يؤكد وفاة المرحوم والده بادره الموظف متسائلاً:
----
- انتو ح تعملوا صيوان ؟
- ايوه لكن دا دخلو شنو في شهادة الوفاة ؟
- كيف ! ما أنتو لو ح تعملوا صيوان لازم تعملوا تصديق…
- (فى إندهاش) : كيف يعنى لازم نعمل تصديق ؟ كدي أشرحها لي دي…
طييب أشرحها ليك يا أستاذ .. أنت هسع لو عندك زواج مش بتعمل تصديق للفرح ؟؟
أيوه
طيب أهو دا تصديق بس لكن للعزاء.
- والقانون دا عملوهو متين؟
- ليهو زمن بس أنت الظاهر ما في زول مات ليك قريب ده.
ولان الظروف ظرف وفاة والجنازة لسه ما انسترت لم يود كمال أن يناقش الموظف كثيراً فقام بسؤاله على الفور :
- اها الرسوم بتاعت التصديق دي كم ؟
- والله بتعتمد على حاجات كثيرة
- زي شنو ؟
- أنتو الصيوان ال ح تعملوهوا دا كم فى كم
(فى زهج) :- قول يا أخي 10 متر*20 متر
- والفراش ح ياخد كم يوم ؟
- قول ثلاثة يوم لأنو عندنا ناس جايين من بره.
- وح تجيبوا ناس يقروا ( قرآن) ؟
- لا ما ح نجيب
ح تجيبوا كم كرسى ؟
(فى زهج) : قول خمسمية
وكم حفاظة موية؟
قول ستة
وكم غسالة أيدين؟
أربعه كده
فى مراوح؟
(فى ضيق) : لا مافى
طيب فى نسوان ح (يبكوا) بعد الساعة حداشر !
ليه يعنى؟
ما أصلو القانون بيمنع (البكاء) بعد الساعة حداشر إلا بتصديق !
لا ما عندنا زول بيبكى بعد حداشر
طيب يا سيدي ( وهنا أخذ يقرأ من ورقة أمامه ويقوم بالتضريب على الآلة الحاسبة الرقمية التي أمامه)..طيب 10متر *20 متر تبقى المساحة 200 متر طيب ميتين في ألف بمتين ألف زائد…خمسميت كرسى فى تلتمية يبقى المجموووع زائد ستة حفاظاااات ستة فى ميتين زائد أربعه غسالات يكون الـ..
- يا خونا ما تخارجنا.. الجنازة لسه ما دفناها
- خلاص المجموع طلع تلتميه واحد وأربعين ألف..
أخرج (كمال) من جيبه ( رزمة) من ( الورق الكبار) وأعطى الموظف المبلغ .. وبعدها سلمه الموظف ( التصديق) ومعه شهادة الوفاة..وفيما كمال يغادر المكتب كان الموظف يخاطبه صائحا كمن نسى شيئاً..
- يا خونا يا خونا انتو الصيوان بتاعكم دا ح يكون في الشارع وإلا في الحوش.. ألا أن كمال كان قد غادر فعلاً.
في بيت البكاء
تمت مواراة جثمان ( حاج الجزولى) الثرى.. وعاد مشيعو الجنازة إلى المنزل ليجدوا أولاد الحي قد قاموا بعمل الصيوان.. ورص الكراسي.. ووضع حافظات المياه الباردة ورش المكان وربط وتوصيل اللمبات كما لم ينسوا أن يضعوا (فرده صيوان) للطباخ داخل فناء المنزل.
انقضى اليوم الأول وفي اليوم الثاني وبينما الجميع يتناولون وجبه الغداء إذ بعربة تحمل لوحة صفراء حكومية تقف ويترجل منها ثلاثة أشخاص حسبهم الجميع بأنهم زملاء لكمال في مصلحة الضرائب.
- الفاتحة
- الفاتحة
- يا ولد جيب ليك صينية غداء هنا.. يا جماعة الزول الما إتغدى لسه يجى مع الجماعة ديل
وضعت الكراسى البلاستيك على شكل دائرة تضم الشخصين فى منتصفها تربيزة سرعان ما وضعت عليها (صينية الغداء)
- يا جماعة الزول الما إتغدى يجى يكمل الناس ديل
بدأ الجميع فى تناول الغداء مبتدئين بى (صحن اللحمة) ثم (المحشى) والسلطات وأخيراً قام أحدهم بسكب (المفروكة) على صحن (الكسرة) ، بعد تناول الغداء وزعت (كبابى الشاى) وبعد أن أخذ أحد الثلاثة أشخاص رشفة من الكباية إلتفت إلى أحد الأشخاص الذين تناولوا معهم الغداء وكان يجلس إلى جانبه وسأله فى صوت هامس :
الزول المات دا مش أسمو الجز ولي
- أيوه
- طيب يا أخي بالله خلي زول من قرايبو يجينا
- حاااضر .. يا كمال … يا كمال …
وجاء كمال وبعد أن شالوا معه الفاتحة وضع أحدهم (يبدو أنه رئيس الفريق) يده على كتف كمال وإنتحى به جانباً وهو يعرفه بنفسه:
- يا أخي فى الحقيقة نحنا من (إدارة متابعة تصاديق صيوانات العزاء) .. بس يعني لو سمحت ممكن تورينا التصديق.
- طبعا .. طبعا ( واخرج لهم كمال التصديق من جيبه) بدأ رئيسهم يقرأ وبعد أن أتم قراءة التصديق
ولدهشة كمال اخرج الرجل مترا من جيبه وبدأ في قياس أبعاد الصيوان وبعد أن أكمل المهمة بمعاونة مرافقيه وكمال يتابعهم بعينه وكذلك عدد ممن كانوا في الفراش عاد الرجل وقال مخاطبا كمال
- يا أخي الأبعاد بتاعت الصيوان دا اكبر من الموجودة في التصديق وكمان عندكم (حفاظتين مويه) زايدات وكمان مغسلة
- فى الحقيقة اصلو الأولاد عملوا الصيوان دا ونحنا كنا في المقابر وجابو كمان باقى الحاجات دى ونحنا مافى لسه ما جينا من الدافنة
- الحكاية بسيطة الفرق مش كبير يعني ح يطلع مائه وعشرين ألف بس ..وكمان عندكم قطعة صيوان للطباخ (مشيرا إلى القطعة التي كانت تبرز من خلف حيطة الشارع) تكون الجملة ميه وسبعين ألف…
على الرغم من أن الموقف كان مستفزاً لكون كمال لم يكن يعلم بتلك الرسوم إلا أنه لم يشأ أن يقوم بأى تصرف من شأنه أن يحسب عليه لأنه يعلم أن أي اعتراض سوف يعترضه من الممكن أن يمثل تعطيل لموظف حكومي أثناء أداء عمله ومن ثم سوف يخضع لمحاكمة هو في غنى عنها لذلك طلب كمال من الشخص (الماسك الكشف) أن يعطيه المبلغ والذي سلمه لرئيسهم الذي اخرج دفترا من جيبه وقبل أن يكتب الإيصال انتحى بكمال جانباً هامساً في أذنه :
يا أخي انتو طبعا الفراش دا بيكون أرهقكم والمنصرف فيهو كثير أيه رأيك نعمل ليك تخفيض ونسيب حكاية الإيصال دي.
وهنا بدأ على كمال استياء شديد فهو أي كمال قد تربى على الأخلاق الفاضلة ولم يحدث أن قام بتقديم أي رشوة لآي شخص في حياته.. ويشمئز من هذا الأسلوب ولا يرتضيه لذلك لم يكن منه إلا أن خاطب الموظف قائلا :
- يا زول اكتب إيصالك وبالمبلغ كلوا
وهنا اسقط في يد الموظف وبدا عليه الارتباك فقام بسرعة بكتابة الإيصال وتسليمه إلى كمال ثم غادر المكان هو ومن معه.
بإنتهاء الدفن
بعد حوالي أسبوع توفيت إلى رحمة مولاها الحاجة زينب زوجة المرحوم الحاج الجزولى أسفاً وحزنا على وفاة زوجها.. وكان على كمال أن يقوم باستخراج شهادة الوفاة لها ولكنه تذكر كيف ان فراش جده حاج الجزولى قد كلف تصديق الصيوان الكثير من المال والجهد.. فرأى هذه المرة أن ينتهي العزاء بانتهاء مراسم الدفن.
في استقبال الإذاعة تقدم كمال وأعطى بطاقته الشخصية لموظف الاستقبال طالبا منه أن يقوم بإذاعة خبر وفاة الحاجة زينب وفوجئ بالموظف بعد أن قرأ صيغة الخبر يسأله.
- وأنتو ما ح تعملوا فراش
- ايوه
- يعني ح ينتهي العزاء بانتهاء مراسم الدفن
- ايوه
- طيب يا شيخنا امشي في الأول للموظف داك عشان يطلع ليك تصديق انتهاء العزاء بانتهاء مراسم الدفن
ما أن وصل كمال إلى الموظف المشار إليه حتى إنتبه إلى أن وجه الموظف المسئول عن التصديق مألوف لديه فبدأ يحاول أن يتذكره إلا أن الموظف قد بادره قائلاً :
- أنت ما عرفتني
- لا
- يا أخي أنا الزول الطلع ليك تصديق صيوان جدك الجزولى قبل أسبوع
- ومالك جابوك هنا
- ما نقلونا هنا وكده
ممكن تورينى الإجراءات شنو؟
إنتو المره دى ما ح تعملوا صيوان؟
لا
يعنى عاوزين العزاء ينتهى بإنتهاء مراسم الدفن؟
أيوه
فى الحاله دى ده إقرار بإنكم ح تلتزموا بإنكم ما تعملوا أى صيوان وإنو العزاء ينتهى بعد انتهاء مراسم الدفن
قام كمال بأخذ الإقرار من الموظف ووقع عليه وحينما أراد الانصراف ناداه الموظف
- يا خونا ما دفعت (الميتين) بتاعت الإقرار.
منقول من صحيفة الرأي العام
