مــــدد ...مـــدد --- ( الفكى حماده )

كان السكون سيد الموقف الا من نباح كلاب متفرق وصوت سيارات يعلو بين الفينه والاخرى .... وصوت طفل رضيع يستجدى امه لتمده باللبن ...كانت ليله رمضانيه قائظة الحراره ... .
قطع رنين الهاتف السكون الذى يلف المكان فى الساعده الثالثه صباحا .. قام الجميع مذعورين ومهرولين نحو جرس الهاتف ... كان عبد الحميد اسرعهم ...خطف سماعة التلفون وقلبه يدق بسرعه ... يا ربى ده منو المتصل فى انصاص الليالى ده ... خير يا رب خير
الو .. قالها عبد الحميد بصوت متهدج
اتى الرد من الطرف الاخــر
ايوه يا عبد الحميد يا اخوى ... حسن ده مرق من الصباح ولى اسى ما رجع البيت
لا حول ولا قوه الا بالله ... وانتو وين هسى
نحن فى الييت وما عارفين نعمل شنو
طيب يا محمد نحن جايين عليكم طوالى
وضع عبد الحميد سماعه الهاتف وامر اهله للاستعداد للذهاب لمنزل اخيه محمد والوقوف بجانبهم فى البحث عن ابنهم حسن ذو الاعوام الخمسة عشر .....

-يتــبع -

بالرغم من ان حسن كان متفوقا فى دراسته الا انه كان عنيدا ... وفى حالة مناقشة دائمه لابيه وامه ... ولكنه لم يترك المنزل ابدا .. مما ترك حيرة شديده لغيابه
انبلج الصباح وازداد تجمع اهل الحى وتفرقوا شيعا فى البحث عن حسن
فريقا منهم توجه الى المستشفيات ... واخر الى اقسام الشرطه بينما توجه السواد الاعظم ناحية البحر...
فمن قديم الزمان كان الاعتقاد السائد هو ان كل من تغيب عن منزله دون اسباب واضحه يكون الغرق نصيبه وكثيرا ما اثبتت المواقف صدق هذا الاعتقاد ... فكم من غائب طفت جثته على سطح البحر ... وكم من مفقوده تركت اثارا تدل على غرقها ..
ورغما عن هذا يظل البحر ذلك المارد الغامض وسيله لجلب البركه كما يفعل كثيرا من الناس فى افراحهم ...


يتبع -

• الاخ الجزولى تحيه طيبه وبعد
  • طبعا سرحت مع القصه ولكن تفاجئة بكلمة يتبع والله اخى الجزولى
    • انا لو مسكت قصه فى كتاب او موضوع ممكن ابطل الاكل عشان اكمل الموضوع
      • حتى المسلسلات ما بحب اتابعها دائما افضل اعرف النهايه بسرعه
        • افضل دائما الاخوه فى المنتدى الواحد يعطينا القصه كامله عشان الواحد يستمتع بها
          • ولكن منى جزيل الشكر وده طبعا مجرد رائ شخصى

انشـاللـه خيـر بس يا حسـن:rolleyes:

الاخ الجزولي القصه مشوقه بس م تطـول الغيبـه علينـا

الشمار قتلنـا:D

وشايف اخونا كمـال بطـل ليهـا الاكــل;):p;)

بصراحة يا الجزولى الشمار قتلنا
نحن بنقعد صدفة فى النت ، نقرا خبر خبرين ونشاهد منتدى مدنى

تقول لينا يتبع

اقتباس:

---

المشاركة الأصلية كتبت بواسطة كمال احمد

• الاخ الجزولى تحيه طيبه وبعد
  • طبعا سرحت مع القصه ولكن تفاجئة بكلمة يتبع والله اخى الجزولى
    • انا لو مسكت قصه فى كتاب او موضوع ممكن ابطل الاكل عشان اكمل الموضوع
      • حتى المسلسلات ما بحب اتابعها دائما افضل اعرف النهايه بسرعه
        • افضل دائما الاخوه فى المنتدى الواحد يعطينا القصه كامله عشان الواحد يستمتع بها
          • ولكن منى جزيل الشكر وده طبعا مجرد رائ شخصى

---

الاخ كمال
لك التحيه ومشكور على المتابعه واحترم رأيك جدا
ولك العتبى حتى ترضى

اقتباس:

---

المشاركة الأصلية كتبت بواسطة محمد حسين (المميز)

انشـاللـه خيـر بس يا حسـن:rolleyes:

الاخ الجزولي القصه مشوقه بس م تطـول الغيبـه علينـا

الشمار قتلنـا:D

وشايف اخونا كمـال بطـل ليهـا الاكــل;):p;)

---

محمد حسين المميز
منور والله
تابع بس وخلى الشمار

اقتباس:

---

المشاركة الأصلية كتبت بواسطة ميزو

بصراحة يا الجزولى الشمار قتلنا
نحن بنقعد صدفة فى النت ، نقرا خبر خبرين ونشاهد منتدى مدنى

تقول لينا يتبع

---

ههههههههههه
ميزو يديك العافيه
والله ضحكته مرتين
مره من تعليقك
ومره من تعديل المميز للمشاركه
يا مميز عادى ياخى ... ميزو ده يقول اى حاجه مقبوله منو ياخى ( بجد والله )
والله يا ميزو اعذرنى كنته ناوى انزل القصه كلها فى نفس اليوم لكن مشكلة الدوام منعتنى من ذلك
لك العتبى حتى ترضى اخى ميزو وستجد ما تحب ان شاء الله

مضت الساعات سريعا ومضى على غياب حسن اسبوعا باكمله دون ان يظهر له اثر
اجتمع وجهاء الحى بصالون عم محمد واخذو يتداولون فيما يجب عمله

حاج الخضر : اها يا جماعه ... الشوره كيف؟؟؟!!!! ... الزول ده لا فى بر ولا فى بحر ما لقينه اثروا ...
حاج عثمان : والله يا جماعه انا من رايى انو الناس بعد ده توقف بحث والناس البعيده ترجع اهلها وكان حى برجع يا جماعه
سرت همهمة اعتراض من اهل حسن على هذا الراى وصاح عم محمد والد حسن
عم محمد : يا اخوانا والله شكر الله سعيكم ... ما قصرتو تب ... العاوز يرجع بيتو يرجع يا جماعه لكن نحن الفتيش ما بى نوقفو !!!!
هنا انبرى حاج الطاهر قائلا : يا اخوانا نحن لغاية اسى ما خلينه مكان ما دورنا فيه ... ما فاضل لينا غير الفقراء والمشايخ يا جماعه!!!
التقط الحديث حاج ابكر قائلا: مظبوط والله يا جماعه ... نحن كيف فاتت علينا الحكايه دى ... حرم انا بعرف ليكم فكى يجيبوا ليكم فى ثوانى
حاج على : يا جماعه الخرافات البى تقول فيها دى شنو .؟؟؟!!.. قال فكى قال .. اها الفكى ده يقدر يقلعوا ليكم من بطن البحر ده ..؟؟؟
حاج ابكر : افو يا حاج على ... والله فكى حماده ده ما فيهو كلام .. بعدين الزول ده مجرب ياخى ... حرم عربية حاج بخيت رجعها فى يومين بس
اشتد النقاش ما بين مؤيد ومعارض واخير استقر الراى على الذهاب الى فكى حماده وعرض الامر عليه

تم اختيار اربعه من اهل الحى للتوجه الى الشيخ حماده بما فيهم والد المفقود
دخل الرجال الاربعه الى منزل مترامى الاطراف به حديقه واسعه اكتظت بالوافدين رجالا ونساء بينما وقف على باب الصالون حيث يجلس فكى حماده رجلان ينظمان عملية الدخول ...
تم اعطاء عم محمد ورقه فاحت منها رائحة البخور عليها رقم دخوله
بعد عدة ساعات من الانتظار حان دور وفد حاج محمد للدخول وعرض مشكلتهم ...
اول ما دخلوا على مجلس السيخ صاح فيهم بصوت باسم
صلوا على النبى يا حاج محمد وادخلوا بى رجليكم اليمين
بهت حاج محمد ومن معه ... وتيقنوا تماما انهم وجدوا ضالتهم وسوف يعود اليهم ابنهم لا محاله
جلسوا القرفصاء اما م فكى حماده بينما غطى البخور المتصاعد ارجاء الغرفه
القصه يا مولانا انو ولدى حسن غايب ليهو اسبوع من البيت وما خلينه مكان ما دورنا فيهو ...
فكى حماده : مفهوم ... مفهوم ... توكلو على الله يا اخوانا ولدكم باذن الله راجع ... بس ادونى نمرة موبايل وح نتصل عليكم
حاج محمد : هالك يا مولانا دى نمرتى انا ... اها ودعناك الله ... ودعواتك يا مولاناا
خرج حاج محمد ومرافقيه من باب غير الذى دخلوا منه قادهم الى فناء واسع جلس عليه اربعه اشخاص وامام كل واحد منهم طاوله ومجموعه اوراق
نادى احد الجالسين على حاج محمد واخذ بياناته وارقام هواتفه ثم خاطبه
الحساب مليون يا اخونا ... تدفع خمسمائه اسى والباقى بعد رجوع الولد
مليون شنو يا اخوى ... صاح حاج محمد مندهشا
ده البياض يا اخوى ... ومصاريف تشغيل ... واجور عمال
يازول انت بى صحك ... ياهو البخور البى تولعوا ده ولا غيرو .. مصاريف تشغيل شنو بالله
يا اخونا ما تكورك ... الفكى القاعد جوه ده بزعل وبعدين ولدك ده الا تدق ليهو صيوان عزاء... ادفع ساكت يا اخوى
اخذ حاج محمد ومن معه يجمعون ما معهم من نقود حتى اكتملت الخمسمائه ناولها للشخص الجالس خلف الطاوله قائلا
حاج محمد : طيب ادينه بيها ايصال
ايصال شنو يا زول ؟؟ ... دى مقابل ولدك يا اخوى!!!... يسوى كم عندك عليك الله ؟؟؟
تذمر حاج محمد ونظر الى مرافقيه اللذين ابتسموا له فى خبث ... ثم سحبوه من يده خارجا وسط همهمة حاج ابكر
: يا اخوى استعوض الله فى قروشك ... وان شاء الله ولدك برجع ليك ...
حاج محمد : دحين يا اخوانا فى زول سال الفكى ده برجعوا فى كم يوم ؟؟؟!!
حاج ابكر : لا والله فاتت علينا دى .. لكن نحن نستنى اسبوع كمان .. كان مارجع .. نرجع ليهو تانى
بعد يومين بالظبظ تلقى حاج محمد مكالمه من شيخ حماده

الو ... حاج محمد ؟؟؟
ايوه !!! معاك محمد
معاك الفكى حماده ... يا اخوى ولدك ده بين لينه فى الحضره .. وشفناهو فى الحاج عبد الله ؟؟
صاح حاج محمد بفرح غامر...مدد يا مولانا مدد ... ياتو حته فى الحاج عبد الله يا مولانا؟؟؟
فى السوق ... امشو السوق وان شاء الله بى تلقوهو ...
حاضر يا مولانا ... شكر ليك ... شكرا والله كتير ...
تم تأجير بص على وجه السرعه ركب فيه من حضر بينما استغلت البقيه بوكس الى الحاج عبد اللله ...
تم تمشيط السوق شبر شبر ... وسالوا كل اصحاب المحلات دون جدوى ..
اشار حاج ابكر على عم محمد والد حسن بالاتصال بالفكى حماده واطلاعه على الامر

حاج محمد : ايوه يا شيخ حماده ... نحن اسى فى سوق الحاج عبد الله وما فى اثــر للولد ده ..
فكى حماده :طيب ادونى خمسة دقائق وبرجع ليكم ؟؟!!!
بعد خمسة دقائق بالظبط اتصل الفكى حماده على حاج محمد قائلا :
ولدكم يا اخونا ركب فى لورى ماشى على ود الحداد ... استعجلوا استنوهو فى سوق ود الحداد!!!!!
ركبو على عجل الى سوق ود الحداد وكلهم امل فى الوصول قبل اللورى الذى يقل حسن حسب كلام شيخ حماده ...
توزعوا على موقف المواصلات بينما دخل اخرون للسوق ... .. كان الموقف يعج بالعربات ....
حافلات ولوارى ... وبكاسى ... اناس يركبون ... واخرون ينزلون ....ولا اثر لحسن ...
( قلبوا السوق فوق تحت دون جدوى) ... انتابهم الياس والغضب ...
اتصل حاج محمد بالفكى حماده مرة اخرى ... يا مولانا الموقف فضى من العربات .. والسوق قفل والولد ما ظهر!!!
الفكى حماده : شيل الصبر يا اخونا ... بعد برهه ... يا اخوى ولدكم ده اتبين معاى انو نزل من اللورى ده قبل ود الحداد ...
امشو تلقوهو قاعد فى مزرعه ... حتى اسى متبين بى ياكل فى عجور!!!!
تحركوا بسرعه ... اخذوا يتوقفون امام كل مزرعه باحثين عن حسن دون جدوى ... حتى غطوا جميع المزارع فى الطريق مابين الحاج عبد الله وود الحداد ...
(وبرضو لم يظهر لحسن اى اثر)
دب الياس قى قلوب الجميع وهنا انبرى حاج ابكر وحمل موبايله واتصل بالفكى حماده
يا مولانا فتشنه كل المزارع الفى الطريق ... لا لاقينه حسن ولا لقينه عجور ...
بركاتك يا مولانا ... شوف لينه الزول ده وين ..
سكت الفكى حماده برهه ثم قال بصوت ضاحك ... يا اخوى زولكم ده ما مكتوب فوق جناح طيره ... مدد ... مدد ...
اهو بين ماشى على الموقف حصلوا قبل ما يركب ليهو عربيه ...
خطف حاج محمد والد حسن الموبايل بغضب من حاج ابكر وصاح فى الفكى حماده ...
: اسمع هنا يا زول .... ... ثــبتو لينه يا مولانا ثبتو فى مكانو ... اوعه يتحرك ... ثبتو ... ثبتووووووووو….
كرهتنا ياخـــــــــــــــى
قفل الفكى حماده الخط بسرعه وهو يتمتم : انا كان بثبت كان ثبته ليكم العيد ده بكره دى

.....انتــهـــــــــى....

• الاخ الجزولى شكرا ليك والقصه جميله لكن ليه اخترت
  • الحاج عبدالله وودالحداد
    • عليك الله تانى ما تشحتف روحنا
      • واخيرا انا طالبك عشره ريال حق اللموزين عشان جيت تميت القصه

اقتباس:

---

المشاركة الأصلية كتبت بواسطة محمد الجزولى

: اسمع هنا يا زول .... ... ثــبتو لينه يا مولانا ثبتو فى مكانو ... اوعه يتحرك ... ثبتو ... ثبتووووووووو….
كرهتنا ياخـــــــــــــــى
قفل الفكى حماده الخط بسرعه وهو يتمتم : انا كان بثبت كان ثبته ليكم العيد ده بكره دى

.....انتــهـــــــــى....

---

دي بالغ فيها ابو حسن هههههههـ

والله لكن كلهم بالغو
حسن لمن هرب
وابوهو والجماعة لمن مشو للفكي حمادة
والفكي حمادة لمن جهجه الناس ديل

غايتو انا كنت شاكة ان الفكي حمادة هو حسن
بس لحد الان ما عرفنا حسن وييييييييييييين

اقتباس:

---

المشاركة الأصلية كتبت بواسطة كمال احمد

• الاخ الجزولى شكرا ليك والقصه جميله لكن ليه اخترت
  • الحاج عبدالله وودالحداد
    • عليك الله تانى ما تشحتف روحنا
      • واخيرا انا طالبك عشره ريال حق اللموزين عشان جيت تميت القصه

---

عزيزى كمال
لك التحيه ومشكور على المتابعه
وطبعا الحاج عبد الله وود الحداد لى معهم ذكريات كثيره فى نفس السياق
تخريمه : رسل لى رقم حسابك عشان احول ليك ( المصارى)

اقتباس:

---

المشاركة الأصلية كتبت بواسطة بت أم درمان

دي بالغ فيها ابو حسن هههههههـ

والله لكن كلهم بالغو
حسن لمن هرب
وابوهو والجماعة لمن مشو للفكي حمادة
والفكي حمادة لمن جهجه الناس ديل

غايتو انا كنت شاكة ان الفكي حمادة هو حسن
بس لحد الان ما عرفنا حسن وييييييييييييين

---

بت ام درمان
تصدقى لغاية هسى حسن ما اتلقى
واهلو رضوا بالمكتوب
شاكر لك مرورك العطر

الاخ محمد الجزولي

سيناريو جميل ومحبوك باسلوب مشوق ومحترف ، هذا اضافة لان هذه القصة واقعية ومكررة كثيرة في المجتمع وانا شخصيا مرت علي قصة بنفس هذه التفاصيل مع تغيير الاسماء والاماكن
استمر في هذا النهج من الكتابة فهو المطلوب الآن ، عرض القضايا باسلوب درامي جاذب ويوصل الفكرة والقضية بطريقة افضل
تقبل مروري وتحياتي

هههههههههههههههههههههههههههههههههههههههههههههههههه ههههههههههههه تسلم يا حبيب

اقتباس:

---

المشاركة الأصلية كتبت بواسطة monim

الاخ محمد الجزولي

سيناريو جميل ومحبوك باسلوب مشوق ومحترف ، هذا اضافة لان هذه القصة واقعية ومكررة كثيرة في المجتمع وانا شخصيا مرت علي قصة بنفس هذه التفاصيل مع تغيير الاسماء والاماكن
استمر في هذا النهج من الكتابة فهو المطلوب الآن ، عرض القضايا باسلوب درامي جاذب ويوصل الفكرة والقضية بطريقة افضل
تقبل مروري وتحياتي

---

الجميل monim
تحياتى واشواقى الى شخصكم الكريم
واسعدنى جدا اشادتكم وكلامكم الجميل
اتمنى ان اكون عند حسن ظنكم
كثير هم من ( ينصبون ) على اهلنا البسطاء
المغلوبون على امرهم , ليس جهلا منهم وانما على سبيل ( التعلق بقشه )
دمت اخى العزيز بكل ود

قصة جميلة وهادفة يا محمد الجزولي
أمتعتنا مع الفكي حمادة
حسن ما دام مكتوب في جناح طيره ما بلمو فيه
إلا ينتظروا إنفلونزا الطيور لما تجي السودان .

اقتباس:

---

المشاركة الأصلية كتبت بواسطة صلاح ودالطاهر

هههههههههههههههههههههههههههههههههههههههههههههههههه ههههههههههههه تسلم يا حبيب

---

استاذنا صلاح ود الطاهر ( العمده )
سرنى مرورك الكريم
( والظاهر من ضحكك ده الفكى حماده ده مارى عليك وكده ) ههههه

ابداع يا فكي حمادة
انا قلت حمادة

اقصد يا محمد الجزولي

اقتباس:

---

المشاركة الأصلية كتبت بواسطة ياسر عبدالرحمن

قصة جميلة وهادفة يا محمد الجزولي
أمتعتنا مع الفكي حمادة
حسن ما دام مكتوب في جناح طيره ما بلمو فيه
إلا ينتظروا إنفلونزا الطيور لما تجي السودان .

---

مشكور حبيبنا ياسر على المرور
وانفلونزا الطيور ده ان شاء الله اول شى تمسك نوع ناس فكى حماده ديل
بعداك حسن ده برجع براهو
دمت بكل الود اخى ياسر عبد الرحمن

اقتباس:

---

المشاركة الأصلية كتبت بواسطة عاطف عولي

ابداع يا فكي حمادة
انا قلت حمادة

اقصد يا محمد الجزولي

---

ود عولى حبيب الكل
وينك ياخى
صراحه مشتاقين