اسند راسه على الحائط وهو يجول ببصره فى تلك الغرفه الضيقه التى اختزلت اعوام طويله من تحصيله العلمى ... ثبت نظره الى صديقه حامد ثم خاطبه وهو لا يكاد يعى ما يقوله :
* اسمع عليك الله جيب سيجاره
* ياخى كرهتنا ياخى ... كملته العلبه كلها .. انتو وقت ما قادرين عليهو ما تخلوهو
* يا زول ما تكتر كلامك ... عاوز تجيبه هات ... لو ما عاوز برضو مشكور
* خد ياخى لكن نخمسه لانو دى اخر سيجاره...
اشعل احمد السيجاره بقيظ ونفخ دخانها كأنه يخرج كل ما فى جوفه من حرقه مع هذا النفس الطالع ....
كان اصلع الراس رغم صغر سنه .. مربوع القامه .. ... فى دواخله قلبا متسامحا وطيبه لا تعرف الفوارق ... يشع من عينيه بريقا تحس به اذا نظر اليك فيعطيك احساسا بالامل والطمانينه ....
* ااااااه .. زفر زفرة كأن روحه سوف تطلع فى الحال والساعه ...ثم التفت الى صديقه حامد وقال له مخاطبا
تعرف يا حامد يا اخوى كان نفسى يكون عندى بيت فى الطائف ولا المنشيه ...
وعربيه تويوتا كورلا بيضاء زى عمتك دى ... وعلبة البونسون ماليه الجيب الوراء والجزلان منفوخ زى قربة عمك سعد ...
حامد : احلم يا اخوى احلم ... على الاقل كان عندك الاشياء دى كنت ريحتنه من عرفتك
احمد : انته يا حامد يا اخوى انا مستغرب ياخى الناس دى بتلم القرش كيف !!!... حرم انا لى 15 سنه جارى ليل ونهار جنيه واحد ما وفرتو !!!!
حامد : هو قالو ليك القروش بلموها بالجرى ؟؟؟.... حرم فى ناس اليوم كلو تحت البطانيه والقروش تنقط فوقهم نقيط !!!....
احمد : اى والله صدقا لى كلامك ده ود ابو السره داك بى التلفون بس بيجيب الملايين ....
حامد : ياخى فك السيجاره دى خلاص ... مصيتها مص يا اخى
احمد : هههاههاى ياخى بى تلومنى عشان مصيت سيجاره ... ماهو دمنه اتمصه كلو فى زول فتح خشمو ده
حامد : لكن يا احمد انت زى نوع ناس ود ابو السره ديل تفتكر قروشن دى بيحسو بى طعمه زى حالتنا كده ؟؟؟!!!
احمد : ياخى ديل كفايه انهم نجوم المجتمع ... يتفتح ليهم اى باب ويوسع ليهم فى اى مجلس ... ياخى ديل الطبقه الراقيه مش زيك كده ما عندهم شىء....
حامد : انا مالى يا زول .. خريج اقتصاد وعندى ماجستير
احمد : لكن مفلس .. مفلس....
بينما هم فى تلك الجلسه اتت سياره مسرعه من الطراز الامريكى وقفت بجانبهم .. نزل منها ود ابو السره سلم عليهم ثم خاطب احمد قائلا
احمد عليك الله اقرأ لى الفاكس ده ... الولد مسافر وما عرفت المكتوب فيهو شنو ... !!!!
انفجر احمد ضاحكا ثم تبعه حامد ثم امسك احمد ببقايا السيجاره التى فى يده وهو يشعل بها تلك الورقه التى قدمها له ود ابو السره واخذوا يغنون فى هستيريا غريبه .. دور بينه البلد ده ..... احرق الماجستير البلد ده ....
