الوافر ضراعو ...

قالوا : في طالب ركب البص ....
الدنيا سخانة تلحم ... أها كالعادة البص امتلأ بسرعة ، ويأتي دور الشماعة و (الشعبطة) في الحديد والسلالم و هلمجرا (طبعاً دا قبل باصات المتعافي، الله يديهو العافية) ...
جات حاجة وقفت جنب طالبنا الحبيب الظريف ... و ادتو هبشة كده عشان يقوم ليها و هي تقعد مكانو ...
صاحبنا عمل نايم ...
الحاجة اشتغلت : الدنيا انعدمت فيها المروة ، ناس ما عندها شهامة ، الجنيات سجمانين ورمدانين ...
صاحبنا فاض بيهو ، وقال:
ياحاجة ، مش نحن الما عندنا مروة، !! أجسامنا المافيها مروة ، و الله فاطر موية فول ، و متعشي موية فول ، و دي الحال ، لا خضار لا فواكه لا لحمة لا ....
أحسن انتي مني يا خالة ، خليكي واقفة بس وخليني أنا في كرسي دا !!

في استحثاث للذاكرة والأحداث، تعجبت جداً، و وقفت طويلاً أتمعن قلة النخوة والشهامة والمروءة في كثير من رجال هذا الزمن الغريب ... و أقصر حديثي على السودانيين على وجه الخصوص ...
هل السبب يكمن في تغير الأوضاع الاقتصادية و قلة ذات اليد ؟؟ غير أن هناك مواقف لا تتطلب أن نساهم فيها بالمادة ، و على الرغم من ذلك لا نجد في أغلب الأحايين من (يضرب صدره) و يتصدى لها ...
كان السودانيين في بلاد الغربة يداً واحدة ، و كم رويت أقاصيص عجباً في نخوة وشهامة وتكاتف السودانيين ، أما الان فالكثير من الحكايات و المواقف العكسية التي يندى لها الجبين ...
وكثيراً ما سمعت وأنا في بلاد الغربة عبارة : "شوف ما تتعامل مع أي سوداني" ، " ما تشتري من السودانيين" ... "ما تتعرف عليهم " الخ ....
أين (وفرة الضراع) و (عشا البايتات) و (مدرج العاطلة) ؟؟؟؟
حتى في السودان لم يعد الناس كما كانوا من قبل ...
أين مواطن العلل ؟؟ أين الخلل؟؟ لماذا هذه السلبية ؟؟

والله يا شبارقة كلامك صاح
انت عارف قبل فترة مشيت اشتيرت جوال جديدمن شركة معروفه ليس من محل صغير
ولحسن الحظ كان البائع سوداني والبائع هنا يتقاضي راتب فقط يعني المحل ما علي حسابة
وسالته عن الضمان وقال لي ده احسن ضمان ورحت المحال المجاورة لية
وسالت من الضمان . وفعلا اكدوا انو الشركة احسن ضمان .طوالي مشيت
واخذت الجوال وبعد فترة حصل عطل في الجهاز ومشيت الضمان . قالوا لي الجهاز فعلا علي ضمان الشركة
لكن في الامارات والجهاز ده جاي تهريب اي ليس له ضمان في السعودية
الا ترجعوا الامارات وتخيل لو السوداني ده كان المحل حقو كان باع لي جهاز كيف ؟

تغيرت النفوس
وتبدلت الضمائر
وكل يقول نفسي نفسي (تقول القيامة قامت)
بس يا شبارقة بصراحة
السودانيين غير المشاكل والهوا البارد ما بدوك حاجة
وانا ما بقصد الكل لكن اصبحت ظاهرة واضحة للعيان
والامثلة والشواهد عليها اكثر
وما تنسي القليل بالسلوك المشين بيسبب قدر شنو.

الموضوع حقيقة شيق جدا و من تجاربي الشخصية و اجهت الكثير من المشاكل مع السودانين في الغربة ولذلك عاهدت نفسي ان لا اجامل احد في مجال العمل حتى اصبحت مكروه من السودانين الذين تتعامل معهم المجموعة التى اعمل بها و يصفوني بالجمود ( و عدم تمشية الامور ) و الغريبة كل الجنسيات الاخرى مرتاحة من التعامل الذي افرضه عليهم فهل الحق يغضب السودانين؟

شبارقة ازيك

--------------------
السودانيين × الغربة عاد انا مابعرفهم
ماابيتوا تجيبوا لي الفيزا ياخ:mad:

-------------------
تعال النوريك السودانيين في خرتومنا دي
خلي يحصل موقف يتطلب شهادمة السودانيين المعروفة
تلقاهم كلهم مدوا يد العون والمساعدة من غير ما يعرفوا الزول دا هو زاتو منو ؟!! "وش مجرب"