طبعا عندنا نحن كسودانيين خصوصية في سلامنا وتحياتنا ، عندما نلتقي مع بعضنا نقوم نسلم على بعض بعنف شوية لدرجة الضرب على الضهر ( لبع ساااااااااي ) ، وهذا في فهم ورأي الكثيرين منا دليل على قوة الشوق وحرارة الترحيب ، مع أني شايف أنو هذه الطريقة برغم الحميمية الفيها تعتبر غير حضارية ، لكن ياهو سلامنا .
لكن نوعية السلام الجديدة بين النسوان السودانيات والشفتها قدام عيني في مطار أبوظبي من أسبوع خلتني محتار ولغاية هسه في حالة إنبهار ومهجوم عديل كده ، بجد شفت سلام فيهو كمية من البوس والقُبل وأكرر قُبل حريمية معززة ( بوس في الشفايف يعني ) بطريقة عنيفة جدا ، وبجد لا يوجد أي عذر مهما كانت صلة القرابة بين هؤلاء النسوة فهذا ليس بسلام أو حميمية شوق ولقاء ، إنما فعل فاحش بكل معنى الكلمة ، حتى أنهن لم يراعن مشاعر الكميات الكبيرة من الناس الموجودة في المطار وجعلن من أنفسهن أضحوكة وأعجوبة ، وأكيد ده ما قاصدين بيهو ( سلام الله والرسول).
عارف السودانيات المغتربات مفلهمات ومقندفات وشايفات نفسهن شوية ، لكن لدرجة يطلعن تقليعات غريبة كدة وبعيدة كل البعد عن أي تقاليد أو أعراف بين أفراد البشر ، ودائماً ( شطحاتن ) بتكون أكبر وأعور وخصوصا لمان يلقن فرصة .
أها بعد موضة ( سلام القُبل دي ) تاني حتجي ياتو تقليعة ؟ الظاهر عليهن خلصن أي شيء في الدنيا من تقاليع وموضات في الملابس والميك أب والتسريحات والعبارات الغريبة والعجيبة ولم يتبقى إلا تقليعة السلام.
