هترشات زميل - البغلة فى الابريق
يا حبايبنا سلامات ، أخباركم وأحوالكم ، الليلة أخوكم تعبان شديد وعند صداع ليه يومين كملت القهوة والشاى ولسة ما راح ما عارف أسوى ليه شنو ،
طق طق طق ، دقيقة يا الفى الباب ، سييييييك ، يا مهترش يا آخى بابكم دا ما صلحوه شنو كل ما نجى يسكسك ، يا جنو انت ما لك بليد كدا أنت قايلو بسكسك عشان كعب دى احدث وسائل السكيورتى ألتم اكتشافها حتى الآن يعنى إنذار أول ما الزول يخش أو يطلع ، مشاء الله يا مهترش تقنيتكم حديثه جدا ، تسلم يا حبيبنا .
يا مهترش انت وين يا آخى لينا يومين راجينك ومافى منك خبر وعشة شمارات البسأل منك كلو تقول ليه مشى لى ست الودع ، لا ياجنو أنا لسه ما مشيت ليها عاوز اعرف الناس الجربوها بقول شنو اول ، والله يامهترش : انا خايفم يكونوا زى بتعاين الكريمت تش يقول ليك ، تمام ومية مية بعد تظهر العملية كضب الواحد يقول ليك أنا اتشتت براى ،وبياضى يروح براه ، يا جنو أنا عيان شوية وعندى صداع ليه يومين ما عاوز يروح ، طيب قوم ارح الدكتور ، هاهاها قت شنو ، دكتور ، أنا أمشى الدكتور ، يا مهترش أنت مش قلت عيان ، ايو ، طيب ارح الدكتور ، دكتور مين يا عمك دكتور د إ لا فى حالة انو أنا ما اقدر استحمل المرض وأحس انى عاوز أموت ، لية بس الكلام دا ، أنت قايل أنا المرضنى شنو يا جنو دا زعل ساى ، زمان قالوا العلوم ثلاثة الطب للأبدان والفقه للأديان والنحو للسان يعنى الطب دا من أهم وأحسن العلوم واسمع كلامي دا تصدقو ولا ما تصدقو انا بقولو والسلام ، قبل كم يوم مشيت مع واحد زميل عيان قام عمل الفحص وطلعت النتيجة ايجابية قلت ليه تمام يا زميل قال لى دقيقة يا مهترش ما تستعجل نخش المعمل دا ، قلت ليه يا زميل داير شنو فى المعمل ،دقيقة ، فحص تانى ، طلعت النتيجة سلبية لى نفس الفحص ، قال لى شوف يا مهترش دا فحص بتاع حاجة واحد فى اقل من ساعة واحد قال فى مرض والتانى قال مافى مرض نصدق منو ، قلت طبعا تصدق نفسك ، قال طيب ارح قالوا فى دكتور كويس نمشى نحجز عندو وطبعا مشينا وكانت المفاجاة انو ما فى حجز إلا بعد 6 شهور ، قلت شنو يا حبيبنا قلت ليك قالو مافى حجز الا بعد 6 شهور ، اها حجزتو ، آىىى حجزنا قبر فى احمد شرفى كان ها نرجى الدكتور دا ، والله يا مهترش زى ما قاعدين يقول أصحابنا لمن واحد زيك كدا يكضب كضبه كبير ويقولوا "صاحبك ضربو الهواء"،وانت هسة ضربك الهواء والحمى طلعت ليك فى راسك ، دا خلى ما مشكله أنت عارف صاحبنا هناى داك ، مشيت عليه وأنا طبعا الموضوع حارقنى قلت ليه مشيت مع واحد زميل الدكتور، قال لى اسكت ، قلت ليه يا اخى أنت ما تعرف الحاصل ، قلت ليك يا مهترش اسكت ، والزول وشو أتغير وحمر زى الفشفاش وراح مطلع الموبايل من جيبو ، شوف يا مهترش ، وصورة ابيض بى اسود ظاهر فيها مقص بتاع شنب من النوع السمح ، قلت ليهو دا شنو ، قال لى دا مقص كان فى بطن اخوي ، اخوي دا يا مهترش قبل شهرين كان عملنا ليه عملية ونجحت ونزل الشغل قبل كم يوم تعب تعب شديد ورحنا وديناه الدكتور ودا الحصل انو لمن عملوا العملية نسو المقص والمشكلة يا مهترش دكتور كبير جدا واخصائى وبدرس فى الجامعة ، نسى المقص يا مهترش فى بطن اخوى ، وفى المنطقة الصناعية الناس البتعاملو مع الحديد ما مع البشر لو الواحد نسى مفك فى مكنة عربية المعلم بتاعو بفكو بى شاكوش شوف زول ينسى مقص فى بنى ادم ، وانتو عملتو شنو ، والله الحمد لله طلعو المقص وهسة بقى كويس وانا زاتى بقيت كويس وحلفت تانى ما أمشى لى دكتور ، يا اخى انت قايل نفسك سيدنا ابوبكر رضي الله عنه ، ليه يا مهترش ، الناس الما بمشو لى دكتور ديل ما فى هسه ديل ناس أول حاجة ايمانم قوى وعملم سمح ونيتوم سمحة ، سيدنا ابوبكر رضي الله عنه يا هناى قالو لمن كان فى مرض الموت قالوا ليه نجيب ليك طبيب قال رضي الله عنه قد رانى ،قالو ما ذا قال ، قال لهم رضى الله عنه قال : فعال لما يريد ، انت يا حبيبنا تعمل زى الناس البقول :
ذهبت انادى طبيب الورى وروحى تناجى طبيب السماء
طبيبن هذا ليعطى الدواء وربى ليجعل فيه الشفاء
وفى النهاية الله يشفى والطبيب يأخذ الأجر ، والواحد يشوف الغلط لكن ما يقدر
يقول البغلة فى الإبريق ، يا مهترش أنت كرهتنا زاتو بى مثلك دا شنو يعنى البغلة فى الإبريق ،
قالو يا جنو كان فى واحد ظالم وجبار شديد واحد عندو حكومة سمحة شديد قام الجبار شاف حكومة الزول الشيخ المسكين دا وقام شاله منو وصاحبنا المسكين دا الحاجة الوحيدة السمحة فى حياة هى الحكومة دى حكومة سمحة ومسالمة وبتقوم بالمهام بتاعت على أكمل وجهة لا بتقول ليه غسل العدة ولا شطف الأولاد وصاحبنا قاعد يبكى على حكومة السمحة الشالوها منو ما قادر يعمل شئ ، جاو عفريت وقال ليه أنا برجع ليك حكومتك قال ليو كيف قال ليو أنا ببقى ليك بغلة وبوديك كل يوم مكة تصلى العشاء هناك وطبعا الزول الجبار دا لما يسمع بالحكاية بقول ليك لازم تدينى البغلة وأنت تشيل حكومتك وأنا بعدين بعرف اتخارج منو ، والزول المسكين بقى كل يوم يصلى العشاء فى مكة وناس الحلة زاعو الخبر ،الجبار الظالم : قالوا كل يوم بصلى العشاء فى مكة وأنا عندي أمانة لزول هناك عاوزك توديها ليو وتجيب لى الرد، مافى مشكلة ، وطبعا تانى يوم ادى الزول الظالم الرد وصاحبنا أتأكد انو الزول مشى مكة ، قال ليهو اسمع أنا عاوز البغل دى ، قال ليه البغلة دى أنا ما بوريك محلها إلا ترجع لى الحكومة بتاعتى ، وطبعا صاحبنا رجع لى الزول الحكومة ووراه مكان البغلة وبقى كل يوم يمشى يصلى العشاء فى مكة ، وبعد 5 يوم وهو راكب فى البغلة والبغلة مشت على بركة موية عاوزة تشرب وشوية شوية بقى صاحبنا قاعد فى الموية ويكوريك بغلتى بغلتى امسك امسك الزول جنة ، لازم نوديهو لى هناي المسكين يعالجو، مالو دا ، يا شيخ قاعد فى البركة يكورك بغلتى بغلتى دخلوه جوة يا ولد جيب سوط العنج ، ودق بالطريقة الصاح : انت قايل شنو الدنيا دى ما دوارة يوم تديك ويوم ترميك وصبجك جلد زى الجلد تانى بشيل حاجة زول ، ما بشيل ما بشيل صبجك ، صبجك ، وبقى كل يوم بعد كل صلاة صاحبنا ياخد ليك كم سوط وبعد شهر يا ولد الليلة المجنون بتاعكم اديتو الراتب ، لسه يا الشيخ جلدة بعد العصر ما اخده ، خلاص خلوها انا بديها ليو جيب السوط ، صبجك تانى بشيل حاجة زول لا والله ، خلاص أنت بقيت كويس نحن الليل ها نفكك يالله شيل الإبريق دا أمشى اتوضه عشان تصلى معانا المغرب وصاحبنا شال الإبريق ومشى عشان يتوضة وبعد شوية يشوف اضنين البغلة تطلع من خشم الإبريق وتتحرك تحندك فيه ، صاحبنا ضحك وقال أنا زمان قلت ليهم البغلة فى البركة شهر يدوقو فينى هسه مين يقدر يقول البغلة فى الابريق
هسة مين يا عمى يقدر يقول البغلة فى الإبريق
هو نسى شنو ، ما نسى مقص حلاق شنب ، ما شعر ، يعنى صغير ما بسوى حاجة
