جـواي مـن جواك غضب سلم مفاتيح
الســؤال جيل الشمس موكب حريـق
واقف على باب الدخول بيناتو بينات الوصول لحظة شهيق
عرض للطباعة
جـواي مـن جواك غضب سلم مفاتيح
الســؤال جيل الشمس موكب حريـق
واقف على باب الدخول بيناتو بينات الوصول لحظة شهيق
عاطف خيري مرة اخرى ... وجدته يعبر عن أشياء جميلة تمس كل شخص جميل في حالة عشق نبيل قد يكون تم تداول هذه القصيدة قبلا في بوست هنا فهل بإمكاني إستحضار
هذه الحالة التي تطابقنا هنا ...
دعوة شفيفة ... و البقية تأتي ...
هل هناك حالة عشق انبل من عشق الوطن ... الذي نختزنه في الذاكرة ... و ينافي الحاضر بكل المقاييس ليتنا لا زال كلنا يمتلك نفس اليقين ...
_____________________________
أقرأ تاريخك وأقاوم وأسأل جبين الفجرألقى الفجر
مطعون في القـفا هل سافرت في ذنبك المحموم
حبة غضب ما شلنا جمرك وإنطفا جوانا نارك والمطر
جائين بي الكتابة وضربة النـاس المهابة
لو هزّ نخلك بـاشبزق ما فارق النخـل السبيط
ما سـاور الطـورية شـك إنو الأرض أنثى
وبتحمل بي الحـلال مين اللي قال إنو المسافة
البينا وبين الشمس طاقـة أو ميـاه النيل
بتدخل فـي عـروق السنبلة المسقـية بي
عرق الجعانين والمسافـرين بالبطــاقة
أقرا تاريخك وأقيف جواك والزمن النضيف
لو هزّ نخلك بـاشبزق ما فارق النخـل السبيط
ما سـاور الطـورية شـك إنو الأرض أنثى
وبتحمل بي الحـلال مين اللي قال إنو المسافة
البينا وبين الشمس طاقـة أو ميـاه النيل
بتدخل فـي عـروق السنبلة المسقـية بي
عرق الجعانين والمسافـرين بالبطــاقة
لا يكتب مثل هذا الكلام إلا مبدع و لا يضعه في متناولنا
إلا أنت أيتها الرائعه
شكرا لك بنت مدني لقد فتحت جرحا عميقا كم تمنيت الا يندمل
معتوقة ومعتقة ومنعتقة
نوافير إنتشاء وحشمة
وحَـمار العين ..
تضحك كلما وقعت مصيبة
تمشى على العجين وتلخبطو
وترطن إذا جاها الحنين
************
يا بت بيوت الهجعة كيف ؟
غبار شوارعك ماشى وين
زقاق يفتش فى زقاق
كتمة وضلمة وإنعتاق
أنا فيك لامونى المساجين
سكاتك منازل حلال الحرام
سكاتك على حين أهش الحمام
سكاتك عليك لما تصحى المسام
سكاتك عليهم سكوت و السلام
***************
صوتك وكت قطع البحر
قبال مراكب العمدة
ضهر النيل عرق ..
والشمس فوق حبل الغيوم
شرت جلاليب النعاس
ناشف غرب مبلول شرق
والمطرة زى شفع العيد
تدخل غرف كل البيوت
حلمة الجوع الشرح للأرضة
كيف تقرأ المرق قبال يقع
فوقـك سقف
إتنحنح الجالوص
أمرق على مهلك ..
مروق الحنة من ضفر العروس
واصعد على مهلك ..
صعود البذرة والروح والشموس
مبنية مدن الخوف
من طينة آخر الليل
وانا فى سقالة الشوق
قدح البصيرة تقيل
فاتح زريبة الجوف
تمرق تخش الخيل
على كيفة كيف معلوف
ضهر المظنة يشيل
وانا ظنى ظنيـتـو ..
فى النيل غريق فى النيل
و الليل ولافى بالو ليل
ساكت يغنوا على القمر
واجعنى فى البحر السكات
سكتنى فى الوجع البحر
يا بت صباح الطير
وين البلد ركت ؟
ما عاد هواك يفتح فى الكتمة
شباك النزيف
وين تكيتك فى الغيمة شطيف النجوم
ريف الجسد صدرك سبلوقة اللبن الحريف
داسينى فيكى نضر
والأنبياء فاتوا
والأنبياء بين بين
قاعدين فى ضل النار
داسينى فيك نضر
فى غفلة جو الكفار
وطارت حمامة الغار
لاقونى ناشف ومر
ما ذنب جلد الطار
لو غنو بيهو شتر
ما تخافى الله معاك
وكل الملائكة سمر
الهـــدهــــد
عاطف خيري
مخدوش الفضا
طويل الحزن مفتول الحنين
مصاب بالديانات والشرود
نوح:
يبلغ من الطول مسافة يشتهى الغرقان شهيق
لونو زى سرك تكلمبو الصديق
أمو تتوحـّم على طين البحر
قبال تقابل والدو صدفة على الطريق
عمرو ستة شهور حِلِم
إنو الأرض مسجونة فى موية وكل الناس مراكبية
اليابسة فِركة مدخورة لى يوم فيهو ساير النيل
قطـّاع رحط كل الجزاير
والبنات البفتحوا الباب للمطر
وأنا جدولك شارف على كل الجداول الصاحية فيك
والغباش فى دمى منك
لو كسر ضلعين عذرتو
لكن نهر كل العصافير البتلعب فى الوريد
وفنـّاكى جواى زى حجر
والبينـّا ما فات الدوائر
الليل خِمار القمرة مجدوع فى الفراغ
والرقصة لى البت فينا
فوق كل المسامير الندقها فى البساط
والرياح حكـّامة بى دلوكة مرّقت الشياطين منها
إتجنن فقير الحلة دقيناهو بى نفس السياط
كل المجرات النيازك والشُهُب
ودع راميهو الله على السما
والدنيا زار
ويا هدهد هنا مرت مراكب نوح
محملة بالبخور
مين اللى شال من طاقة الطين البعيدة
قنديل حبيبتى وطيـّب الجرح المثير
مين السرق من بابا مفتاحو الملون والصرير
منهوبة مقبرة الفواكه فيكى
قولى معاى يا شرف القبايل جر
الشاف تباريح الطلح فى النار
شافنى مرقت من عندك ضرير
أنا ليه تجينى الموية حفيانة
وأدنقر ألبِّسا شبط أخضر
وأبيت مبلول وأصلِّح فى الرباط
أنا ليه شبابيك البيوت الواجمة والناس البُساط
وليه يرجانى النخل
فى السكة يفتح قلبى خمارة وخلاوى
وبيت بكا
تعبت من المساسقة والهتاف ياغيمة
أتبنى جبهة القمرة
السهر والحمى طول الليل تهضرب
ويا هدهد لقيت أمك
ترشرش فى السعف من عينها
وتجبر خاطرا المكسور عليك
ينكسر خاطر السعف فى إيدا
يا هدهد قيام
من السما الأول قيام
من السما السابع قيام
وأنزل مسافة تهبشك غنوة وأناولك كاس
ومرت مراكب نوح محملة بالملوك
ركعت على الموج الجنود
من كل جندى تفوح ضحية
ودم مشتت فى الأبد
دسيت جبهتى من السجود
بكى فى مخاض الخوف ولد
إشتبهوا فينى ورا الجبل
شافونى دسيت الهداهد بالزبد
صفا !
إنتباه !
وقعت من الهدهد بلد
نهبوها وإتقسموا الحدود
ومرت مراكب نوح محملة بالطيور
واقف مع نوح الغراب
ينضم ويأشر فى إتجاه
باقى الطيور يتوسوسوا
إلاّ الحمام إتوضا مارق للصلاة
القانقرد فى حزنو يغزل شاله من صوف
الطواويس شارّة قمصانا المزركشة فى الضحى
الزرازير بى عراريقا المغبشة جات على
أرجينى يا صالحة !
ومشيت فى الموج
يا النبى نوح أصل سالم
يا النبى نوح أصل
حجر الدُّغُش فى الموية يقلع ضُفرى
يادم !
ده ما وكت الرسم واللون
وجات المغارب حننت إيدا ومشت
سبحانك الأديتنا من حزنك فوانيس
ــ الغراب يا نوح طفش
واليابسة وين ؟
يا الله ما يابس سوى حلقى المجرح بالدعا
طير يا حمام !
ـ الحمام يا نوح يجامل فى السما
وبيّاع مناديل خضرا فى كل العصور
أنا ما خلقتك يا ظنون
شان تبيتى الليل معاى
وتجرى من فوقى الغُطا
ما تشُرّى فى حبلى الوساوس
والمعانى الداكنة والليل والشتا
الهدهد تميمة الموت
معلّق فى بيوت الناس نعش
من خرافاتن تعال
من دياناتن تعال
نفّض نعاسك من كل بيت
من كل حجوة حكوها عنك
فى الليالى الباردة والأطفال نيام
مين يشترينى من الملوك الخايدة فى الدم القديم
مين يوصف بيتنا لى هدهد يتيم
مين النبى القادم؟
من مكة !
أو من دكة !
فى شارع حميم
مين اليوصف للنحل ريق الحبيبة
وحبة القمح التقوم فوق محفضة حبوبة
فى الزمن اللئيم
مزيداً من الطين يا إله
أبنى خوفى عليك ومنك
أبنى آخر بيت حرام
ومرت مراكب نوح محملة بالحجيج
ــ وين ولدك ؟
ــ تركتو على الجبل .
ــ وين بلدك ؟
ــ ضربتها فى مثل .
ــ وين نحن ؟
ــ مرقت على عجل .
يا نوح تخلينا
زيتونك مخلل بالشمس
نار الله والرِجل الغريبة
نحن البلاد الشاكية جرحها للصديد
جاتنا القوافل بالضجيج
جرتنا من حلبة رقيص
ورتنا كيف صلبوا المسيح
ورتنا كيف كتلوا الحسين
وبكينا أكتر منها
ساقتنا فى الآخر عبيد
مين يشترينى من الملوك
الخايدة فى الدم القديم
مين البوصِّف بيتنا لى هدهد يتيم
يا هدهدى المهدود
مين هدهدك نمت
كل الطيور غنت منك يجينى سكوت
مين الهداك للناس
أو هدّ فيك الموت؟
يا أوسم الجايين أنا قلبى حِلّة حنين
والشوق فتحنى بيوت
يا صالحة
لا جنبك لا فتّ منك فوت
دايماً معلق بين
بين الحياة والموت
أدخل ضلام الناس
نورك يجينى خيوط
وقبّال أقع فى الضو
جوّاك سندنى خِفوت
أنا برضى حلة شوق
لكنى فى التابوت
ومرت مراكب نوح محملة بالعبيد
الجنة زى هدهد معلقة فى الكتاب
ونحن العبيد
باب الحياة السرِّى
حرير فى فكرة الدودة الموجعة بالنسيج
وصيوان عزا نوح
المكفّن بالوعود
هدهد يرك فوق دفــّة المركب يدندن
الريح سكن خيمة حريمو الأربعة
النيل رجع فى اللوحة
للوادى القديم
البحار مكتوفة الأيدى
الشموس فاقت
ونوح بعاين فى مفاتن اليابسة
تغسل فى حصا ومتبرجة
سبحانك الأديتنا من ملكك سلاطين وإختفيت
هاك أنبياءك سالمين
وأنزل مسافة توجعك غابة
رقيصنا الحى
طبولنا
وليك شبال
من اليابسة الممشّطة بالملح
وهدهد
بت مدني
أستأذنك
أوفيت و كفيت يا أيها الرائع (( ود الهجانه ))
شكرا اخي مصطفى ونحن في حضره الابداع نغرق ونسكر ونذوب كالدارويش وامثال عاطف والقدال وغيرهم شموع لا بد من ان توقد من فتره لاخرى لكن
ماذنب جلد الطار
لو غنو بيهو شتر
والشكر موصول لبت مدني واقول لها
ان عدتم عدنا
بالجد بوست وسيم
وحلو
فيه نفس الحروف الما بتنقدر
تسلمي
بت مدني
وودهجانة على الاثراء
واسلم لينا النخلة الشاقة في عين الشمس درب
عاطف خيري
باقى الطيور يتوسوسوا
إلاّ الحمام إتوضا مارق للصلاة
________________________________________________
أرجينى يا صالحة !
ومشيت فى الموج
يا النبى نوح أصل سالم
يا النبى نوح أصل
______________________________________________
أنا ما خلقتك يا ظنون
شان تبيتى الليل معاى
وتجرى من فوقى الغُطا
ما تشُرّى فى حبلى الوساوس
والمعانى الداكنة والليل والشتا
_______________________________________________
نفّض نعاسك من كل بيت
من كل حجوة حكوها عنك
فى الليالى الباردة والأطفال نيام
مين يشترينى من الملوك الخايدة فى الدم القديم
______________________________________________
فى شارع حميم
مين اليوصف للنحل ريق الحبيبة
وحبة القمح التقوم فوق محفضة حبوبة
فى الزمن اللئيم
مزيداً من الطين يا إله
أبنى خوفى عليك ومنك
أبنى آخر بيت حرام
ومرت مراكب نوح محملة بالحجيج
ــ وين ولدك ؟
ــ تركتو على الجبل .
ــ وين بلدك ؟
ــ ضربتها فى مثل .
ــ وين نحن ؟
ــ مرقت على عجل .
يا نوح تخلينا
زيتونك مخلل بالشمس
نار الله والرِجل الغريبة
نحن البلاد الشاكية جرحها للصديد
جاتنا القوافل بالضجيج
جرتنا من حلبة رقيص
_____________________________________
وبكينا أكتر منها
ساقتنا فى الآخر عبيد
مين يشترينى من الملوك
الخايدة فى الدم القديم
مين البوصِّف بيتنا لى هدهد يتيم
_______________________________________
يا أوسم الجايين أنا قلبى حِلّة حنين
والشوق فتحنى بيوت
يا صالحة
لا جنبك لا فتّ منك فوت
دايماً معلق بين
بين الحياة والموت
يا ود هجانة ... كم انت عميق و رقيق و بتفهم على أرواحنا ... ما احب إختيارك من كلمات هذا الرائع عاطف خيري ...شكرا للإثراء ... دمت ...
أسعدتنا بمرورك الحلو دايما... خفيف على الروح و لكن ثقيل في الميزان ... لك مطلق التصرف في كل بوستاتي ...سعدت ايضا بإبداعك منذ عودتك ... حقا اوفى ود هجانة الشكر موصول له ...اقتباس:
المشاركة الأصلية كتبت بواسطة مصطفى هاتريك
يسلم لنا زوقك يا أنور ... وسيمة حروفك و ما بتنقدر زي ما قالت فهيمة ...دمت أنت ايضا مصدر للإثراء ...اقتباس:
المشاركة الأصلية كتبت بواسطة انور النور محمد
بمحاولة متواضعة اخترت ان تسمعو معي وتقرأو هذه القصيدة الرائعة
http://www.a7tajk.com/vb/a7t-t189.html
مصلاية الروح
الشاعر عاطف خيري
الروح المفوتّ كم وقت
الوقت الموهط في النزوح
طالع اعالي الفوق تحت
تحتك ينقز في سطوح
رهن الاصابع ومنفلت
فالت اذا كنت الجنوح
وحدك منادي ومتلفت
وكان القلب مضيفةوالالم
كما عض الطفل ثدي امو
صار جبانة في البلد البقت ما امو
والفاتوني في طرف البحر ينحمو
أو شالو الحجر وينحمو
لي قمرية من فرط الشجرصاحت
وأجاب من ثم هدر دمو
ياخيل ياصبي يا براك
يا ليس من مرضع بلاك
لو شفت جوة النار جنين
فاطنو من ثديك هلاك
كان شفتّ جوة الجنة طين
بالنو لادم سواك
وكان تكفي جقمة من الحنين
وتقنع الموج الهناك
وما كنا في جوف الكمين
غنينا غنوات الفكاك
صنارة العدم السنين
صارقيلة وحشة وارتباك
ياغربة نحن مشينا وين
من طلعتك نخلة هواي
ومديت اصابعي على المدين
فتحت ما شايف سواي
غمدنا الله ادانا عين
كوركتك ادم دم دم في الغياب
اصنتك كل الجراد الفيني
مسقبة الرتيلة الطحلب الشوق اللعاب
انسان الواطة اتعرف علي طعم الخطايا
اللغة في زريبة ربها تعجن حنوط
المعنى في قرع السكوت
حسيستو الريقة قلعت خوفة في شط النوايا
ابليس حبس العلة في كلمة سجود
والدود يجيك مشدة في لفظة تخمر
تسمع حنين الشمس لي ضل البيوت
همهمة الجرح لحظة تعود
من غربة الجسد الخلايا
ولجنة لسان الضوء اذا نطق الزوايا
ودخلة الكاف الصبي على نون
اليرن خلخالة في قلب النبي
وتسمع زغاريد العدم تشوف الغيمة
في مقلة مراية السهلة راخية رموشة
تنت في ام شديد القهوة جاته الدوشة
في طاقة منام هلواسة
لاوز قوس قزح طربان وشائلة الهوشة
خطفت توبة قالت اخ نست باب حوشة
فاتح والمطور الليلة كيف ملبوشة
دسيه منك فيهو او سميهو في الخيل الصحاب
البخشو الحضرة دون مانوبة من غير مايدقو الباب
البدسو الفكرة في لمة بنات
نعشا البنادن قمرة
تغسل جمرة
في ريق السحاب
البحرسو الخمرة
في النخل البصحي التمرة
نص الليل اذا نقص الشراب
دسيهو منك فيهو او همباتي غارزفي اتر
شوفتك على رمل المناظر ناب
دسيهو منك فيهو جملة اولياء
النحت سابقين الحواس بركعة
نهاضين وينقفو في حلوق الشوف
حصان في ضحكتك مربوط
مرق من ليلة ليلك جنة
بالاسف اليقين مقدود
وكل ما الموج راوضك عن نفسو
تعطش فيني تفتحي اطلس الخوف
كل ما الليل زاد نجمة في كتف العسس
جرت العصافير المطار
دخل الشعر وكر المباشرة
والبنات طفو الرتاين وولعن
الخمروك فتحوك انداية ومشن
الكل ما صابحتهن سرقن نهارك ومغربن
الفي صدورن هرتقة واشلاق
حليب بت اللذينّ احبهن
انة صريف في كرنك الروح
المطر ما يبقى لي زول المغارب
لابسة اقصر من خيال المفترى
ونحن مديونين نسيم
تلقاها في اول شريعتا قافية
فاردة شرودة في الموج الحتل في بالة ظنها طافية
غامدة حنانة في ايدا وينقع عافية
تشبه في الوقع من عشو
خوفو اذا يطير
لا يلقى قبلة
ولا طفل في ايدو نبلة
ولا غصن ذو شوك رحيم
ود البادي اظلم
حنيت لوجه الموت
خارج طبع هذا المجازلدودي في الغياب
مشرع ضلمة بقتي حتفي حبيبي ومشتهى اسفي
محاذاتي منتهى اسفي محاذاتي
وعلوقي اذا اهنق وفطمتني شكرا حزين
جلّ من يسهو ويغمد فيكا غاية يشبهك
جالبني في وادي الضريسة
والقلب فرناقة سألت ذات مشيمة
النهر اعوج من قفاي
اعفيني من هذه البلاد الذهللة
أعف الجبال من الصدى
والشارع التحتاني من خمج النسيم
احلاك مكندك في امسّ الألفة للزول الغريب
أجمل من المركب تطلوح خلقة
اهة أجمل من الخطأ الصاح شنو
الدم دميرة النار تجقلب مالا
ما طعم الرياح تنجمّة
صلي على الهجيج كالنيل
مسك خصر البلاد ورقص رقيص الما بتسمّ
طرد من بالو نقنقة البوابير
ولايوق الأغاني وما جناهو
العاشق الخبول من قيف الحبيبة
وصاح قعانا ومرقت النتن القديم
والجندب الوطن اذا لابد من هذا الكنز
عشق الوطن ... ذلك الادب والسلوك الذي يجب ان نحتسيه ونحن زغب صغار ....
الرائع عاطف خيرى الشاعر المتواضع هام بنا كثيرا في حب الوطن .. وتميزت مفردته بالبساطة والعمق
يسكرك طربا عندما يقول
خضرا
ويانعة
وحُزنِك سبيب
كأنَك هلال البنات الخصيب
احبَك إذا ما تَرُجي الحليب
عيونك سَمَا
ورِمشك قريب
يَفِج في الغمامة
ويخَذلُو النحيب
بلاد أنجبتني وقالت غريب
بوست رائع كروعة بت مدني
يجبرك على ( التسكع ) اللذيذ بين ازهاره ...
الرائعة بت مدني ... هذا عربون حضور ومتابعة
اقتباس:
المشاركة الأصلية كتبت بواسطة محمد الجزولى
ما أروع عاطف خيري العزيز ود الجزولي إذا كان كل هذا عربون فما اروع الآتي ...
اموت حبا في التسكع على أرصفة المفردات المتاخمات لعشق الوطن ...
وطن سحبه حبلى كما خريف مدني بسر خصوبة الكتابة حين يلامسك ريح الحنين و تنسكب ماء يحي اوردة ارض تقيم فينا ...
اخشى ان يكون ذاك الذي بالذاكرة هو ما تبقى منه ...
بلادي تنتحب أحل دمها و تفرق بين أجندة الساسة و ضماير الخاسرين ... و لكن يظل السودان لا زال يختبي بنفس المعزة داخلنا...
اهدي السودان في شخصكم هذه القصيدة الأحب الى نفسي رائعة الخالد انبلنا عشقا للوطن ودراية بقيمته تفاجئك حروفه ايضا بجمال الموروث بصورة خرافية و كانه خلق لكي نكتشف جمال ما نمتلك ... اإليكم
وطنا..
الباسمك كتبنا ورطنا
أحبك
مكانك صميم الفؤاد
وباسمك اغنى..
وتغنى السواقى
خيوط الطواقى
سلام التلاقى
ودموع الفراق
واحبك ملاذ
وناسك عزاز
أحبك حقيقه..
وأحبك مجاز
وأحبك بتضحك
وأحبك عبوس
بعزة جبالك ترك الشموس
وما بين ظلالك
افتش وأكوس
أفتش طفولتى وملامح صباى
بناتك عيونن صفاهن سماى
وهيبة رجالك بتسند قفاى
صحى بتملا عينى..
وتشّرف غناى
بحضرة جلالك..
يطيب الجلوس
مهذب أمامك يكون الكلام
لأنك..
محنك
عميق الدروس
مجيد المهابه ومديد القوام
شبابك..
تشابك
شديد الزحام
أراهم..
وراهم
غبار الحياه
مداين..
تعاين
كأمّ العروس
تهلل..
تكلل
جبين الإمام
رزازاً يبلل أغانى الخليل
أصدق كلامك حقيقه وبخاف
أخاف الطريق..
اللى ما بودى ليك
وأعاف الصديق
اللى ما بهم بيك
معاك انتظارى..
ولو بالكفاف
وعنك بعيداً
أبيت الرحيل
وبيك اعتزاز الصباح الجميل
جميع الأغانى اتكالن عليك
،،
جميع
الأغانى
اتكالن
عليك
الشاعر : محجوب شريف
دا كلام كبيييييييييييييييييييييييييييييييييييييييييييييييي يييييير لك التحيه ايتها الرائعه
خليني اقراك مره صاح
عكس احتشادك في الحضور
هل غاب معاك وعي الطريق؟
ام بيكي زكاني الزمن
ماشيك وعارفك ياحريق
في يوم غماماتك بجن
فرهد غيابك اغنيات
ظلت اراضي اللقيا بور
وبلقاكي ياكل الطيور
مسجونه والحريه سور
وبلقاكي بيناتنا الثبات
وبيناتنا شمس البكره في لحظة مخاض
طول الوجع رشح مواطن العافيه فيك
خلاني ارجع وابتديك
واقراكي من كل الجهات
ومابين اقابلك ومشتهيك
كان حلمك الاول ترف
وكنتي الصبيه الغايبه في زحمة حجا
وكلمة شرف
وكنتي الزوايه الميته في متحف خزف
وكنتي الواصايا العشره واللون الشحيح
سميت مساحاتك حكر
كل البيحلمو بالشمس
هجرت من واقعك عبث
سكنت فيك ضد السكون
كل اللي كان ممكن يكون
طارت ضفيرتك ليل غنا
جدلة صبر وطوله نفس
ومابين اقابلك وجيت عليك
كان عندي ليك
بس نحن والجرح الثري
وخيبة امل ام الشهيد
في الكلمه والوجه الجديد
وكان احتقان نبض الزمن
نومة طفل فوق الدمن
ياصاحيه بالحاصل علي
يانايمه
عن فقري البليد
سميت منافيك الوطن
صارت مناحاتك نشيد
عاطف خيري
همسات يا رايعة ... تدهشينا انت ايضا بشفيف جمالية عاطف خيري ... لك كل الأمنيات العذبة بانت تدومي بخير ... لي عودة لرحاب حديثك ... هذه فقط تحية ...
كثير من الشعراء غنوا للوطن
بالاضافة الى تجربة عاطف خيري هنالك تجربة محمد الحسن سالم حميد
تجربة حميد لها لونيتها الخاصة ومفرداتها المرتبطة ببيئة الشمال
ورغم ذلك استطاعت كلماتة أن تتغلغل في وجدان الشعب السودان اجمع
اعجبتني قصيدته بيني بينك
كل ما تباعد بيننا عوارض .. كل ما هواك يا طيبة مكنّي
تلد الغربة القرب الواحد .. وبيكي أسمي الشوق وأكنّي
لما أفوتك من دون خاتر .. أو دون خاتر مني تفوتي
بلقى حبايب في كل حتة .. وكل بيوت الفقرا بيوتي
لا غيرت وراكي الجتة .. ولا بدلت ملامح صوتي
لا غفلني وهادن فني .. غامل المدن الما عرفتني
وتبن الصبر الشوقو مصوبر .. في الأرياف الكم وفّني
وبالإحساس الجاك مستعجل .. جيت متأنّي
للأطفال الناشفة ضلوعا ..
ونازفة .. بغني ..
أهدي دموعا .. وأطمّن روعا ..
ببسمة بكرة الماها تمني .. ولا مصنوعة
بتمرق منها .. تدخل مني .. شديرا فروعا .. تميد متّنّي
تكوفت فيها نسيمة حنّي
تلاقي طيورا الما ممنوعة .. تجول وتغنّي
عديل لا راجفة ولا مفزوعة .. خطاها نبياً داخل الجنّي
أغني لشعبي ومين يمنعني ..
أغني لقلبي إذا لوعني
مخير دربي الما رجعني
إذا طلعني نخلة القرب .. واللا الغربة الكدرومية
بتنـزل غنوتي بي قمرية
أو وقعني في بطن الجب .. بطلع يوسف بالأغنية
أغني .. أغني
أغني الناس الما بتسمعني
المني بعيد المبعد عني
الإيدي في إيدا .. وإيدا بتبني
في دنيا جديدة .. اليوم راح تدني
وأريت غنواتي في ناس شغالة
تكون سندالة وعود طورية
ضراع رجالة .. كتاب أطفالا ..
وجملة بالا الما مقرية
سدة مالا وبقة فالا
في ليلة الدخلة على اسمى قضية
حبيبة قلبي يا سودانية
يا أسمى معاني .. في زول بعاني
يا ود ضكران .. يا بت دغرية
وانا إن سامعاني .. فضلت أغاني غبش فقرية
حويتك منك .. يا دافعاني براحة إيديا
كما الأشواق .. ويا جابداني .. برفق عليّ
ما بتحير بين الفوق وبين الناس التحتانية
إلا مغير .. واللا عقوق .. واللا كفيف الإنسانية
ومنك وين يا كاشفة عينيّ
بنور الإلفة .. ضيا الحنية
وحلم العالم ناس تنسالم .. والبني آدم صافي النية
والأطفال الناشفة ضلوعا
إنمرتق روعا .. وجاتنا تغني
غناوي البكرة الكم مسموعة
سماع بلاّل .. في الدنيا الصنّي
حسيس طمبارة مع نقارة
صفقةّ حارة ودارة تهنّي
زفاف اغرودة .. نهار العودة .. أو زغرودة في ليلة الحنّي
فيا حلتنا عليك ترابك
وإنت شبابك زينة الجنّي
أحلى عروس البلد اللتنا .. واللا الغبش الرابة تهنّي
واللا هدير المدن التصحى وتمحى ضلام الحاصل عنّي
الاخ ود الجزولي شكرا لك وكل من عنى لهم الرائع مصطفى سيد احمد كان همهم الوطن وكان الوطن محبوبتهم التي يتغزلون فيها كان شعرهم نابعا من اصالتهم لذى اختاروا خير من يمثل ويستطيع ان يوصله لشفع العرب الفتاره البفنو الشايلا ايدهم اليكم احدى روائع الشاعر حميد
http://sub5.rofof.com/01zugcr28/Hmyd.html
بين الموجة والخزان حلم انسان
قصيدة مسموعة بين الشاعر محمد الحسن سالم حميد
والفنان مصطفى سيد احمد
هرت لاهاتي بي الغنوات
وقت يبرد حشاك يامي
من التعب البلا صالح
تفيقي تروقي تنجمي
تسوي مكانسك المطرة
تضوي البيت وتنحمي
تمرقي صبوحة للجيران
قدح فوق ايد وفي ايد المي
يلاقوك شفع الكتاب
نضاف وظراف بلا النسمي
يغنولك غناوي الساب
وفي بيوضة مافي سراب
جبال كجمي وفيافي الكاب
تميد بالخضرة منقسمي
فيافي الصي وبيوضة
البراسيم فيها مفروضة
خدارا يراري فوق عيني
على الابواب طواريها وحواريها
بقت روضة
بقت تشرب من الحمداب
تشوفي رهاب بعد نجمي
بشوفو قريب قرب نضمي
بشوف العالم التحتاني **هيلاهوب وقف ناهض
وهدّ عمايد الفوقاني
جوّ الجب رمى العارض
وفي الساقو الدمار افراد
عريق الحب نبض قابض
متل قبض الحروف في اسمي
وغناوينا القبيل رقراق
علينا تصب برد قارض
واجر نمّي
أدوبي لهاتي بالغنوات
عقب يبرد حشاك يمي
***
وطني ولا ملي بطني
سكاتي ولا الكلام النّي
بليلتي ولا ضبايح طي
قليلتي ولا كتر سمي
سلام يأمي
سلام س يامي
سلام لاهكمي لادكمي
الله يا ود هجانة ربنا يشرح صدرك ... مصطفى و حميد ثنائي خرافي ... إئتلفا في عشق الوطن فكانا خلاصة التعبير عن أصالة الوطن القديم الذي نعرف ... ليت في كل 10 رجال واحد يعتنق قيمنا كما فعلوا ...تحيات عطرات على عمق الإثراء ...اقتباس:
المشاركة الأصلية كتبت بواسطة ود الهجانه
المتفرد في إحساسك الأخ ود الجزولي ...ما أجمل هذه القصيدة لحميد ... تحسسك إنها بينك و بين الوطن بمصداقية عشق خالدة ... إنه عبقري التعبير البدائي التلقائي الفصيح حد الإفصاح ... يتقمصني هو ايضا رغم اني ضعيفة المعرفة بكثير من مفرداته احيانا و لكني اتلمس المعنى بطلاقة تريحني و تتحرر ذاتي من كثير من زخم الوجد المختبي الحبيس ... كيف اشكرك ... خليها دلوقت عاجزة عن التعبير ...اقتباس:
المشاركة الأصلية كتبت بواسطة محمد الجزولى
العزيزه بت مدني
ما اجمل عشق الوطن ... وما اجملة من احساس عندما يسافر بنا الشوق ويحلق بنا في سماوات البلد رغم البعد
تعجبني هذه الابيات للشاعر السر عثمان الطيب لدرجة البكاء
وكثيرا ما اترنم بأبياتها عندما يستبد بي الحنين وتضنيني الغربة
فأكون كمن مسته الحمى
مَغَستي..
رحل تِلُوت الليل...
شقاوتي...
رحل تلوت الليل...
مسالكي ضُلُمة ماب تنشَق..
سكت روَّح..
نويرةَ الفُرقة..
جوة الجوف تسوي البق.
مشيت..
لا زاد أشيلو معاي
ولا زولاً... مع اترفَّق
ولما خلاص بقيت ماااارق..
نجيم الليل مشى اتفرق
بيكت.. وبكيت..
طريف العين متمسح بالدموع رقرق
عشان مظلوم...
زماني الليلي شتَّت.. للشمل فرَّق
بسوي الووب..
نحاس أحزاني
جوة قليبي... ينقر.. دق..
يوهدبني..
يلوِّعني..
واخاف من المصير واشفق
اوادع الناس..
وافوت مجبور..
يجيني نغيم..
من الطنبور..
اشوفلِي جِنّيْ.. وقف صفَّق
ينُط لا فوق...
يطير يندَق.. واطير واندَق
وادنقِر فوق تراب بلدي...
أخُم بي إيدي في رحلي..
أقول يا ليل وافارق الدار...
أجر فوق الوداع مسدار...
أنوني .. أنوني...
شاق الواح..
محال ارتاح..
أدخِّل إيدي في رحلي...
تُراباً فيهو تسوَى الكون..
تراب بلدي...
أشيل منُّو..
أشم وارتاح..
أشم طيبةَ أهلي..
مِنُّو تفوح.. ترد الروح
عيوناتُن تلوح.. وتلوح
عراريقُن.. طواقيهُن..
طواريهُن.. سواقيهُن..
أنين الساقي لما تنوح..
حسيس البربَخ المفتوح
تصيني الرعشة احيانا عندما اقرا تلك الابيات التى كتبت باللون الاحمر
تحياتي لك الرائعة بت مدني
والتحية عبرك للعزيز ود الهجانة الذى دائما يطربنا بجميل الكلمات
شكرا ود الجزولي والاصولو في الجوف اندفن 00000000000