عناق ام سومر البرعاها فوق للفودة
في غابة القرنفل تلقاها ضاربة بلودة
بتتوسد حرير والصندلية برودة
ما شافت شمس من القمر ميرودة
الجاهلة جابت نارا في كانونا
سوت جبنة بي زوق نضفت ماعونا
نضاف فنجانا حاكى سنونا
وكتين كبت البن فيهو حاكى عيونا
أنا التوب العشاري الباهي زيكو
و انا الدابي ان كمن للزول يعيقو
انا فراج الرجال وقتين يضيقو
و انا المامون علي نسوان فريقو
مانى التمبل العوقة البدقو نديدو
ايدى ندية يا ام شلاخ محل ما تصيدو
الرزق المحدد للعبد من سيدو
لاتنقصو البشاشة ولا البخالة تزيدو
ماني التَّنبل القاعد براعي الضان
وختّاراً ببيت فوق قُجة أُم كيعان
صبّاراً على قدر الإله إن كان
أنا أبو فاطنة في اليوم السيوفو سنان
أنا ماني التنبل الفي البيت صِنٍعتي حليبْ
بَدور الشًّدّة فوق إبلاً شوافي ونيب
إن حرًّت نخت الشكرة ما بنعيب
وإن بردت نكافيبهن سوالف أم طيب
أنا البحر الكبير إن عبّروني
وأنا شوك الكتر إن جرجروني
أنا رحل الكحل إن ميلوني
أنا الجن البخلي الزول إنوني
انا البحر الكبير الدابو حَمَّر
انا قدحة زناد مدفع معمر
بشد البانقير جملى المضمر
وانا ابراهيم اخو ام دهباً مجمر
ما بابى المسيكين والفقير بي فقرو
وما عواس قوالة وما رفيقي بعقرو
بدخل لجة الوادي البتلب صقرو
قلبي مكجن الناس السوا وبتنقرو
