الزواج عن طريق المارثون ...!!!

بسم الله الرحمن الرحيم

تعدد انواع الزواج في السودان منذ قديم الزمان فمن زواج الاهل ( تزوج بنت عمك ) وغطي كدحك وعندي ليكم نكتة في موضوع القدح ده ..!!
في واحد في الزمن القديم شابكه عمه وابوه غطي قدحك وكرهوه بهذه الكلمة بمناسبة ومن غير مناسبة والرجل خاتي عينه على بنية في قرية تانية بيقرأ فيها المهم في يوم من الايام جالس هو ووالده وعمه في الديوان ومر بهم رجل غريب وهنا تكبكب صاحبنا واتربك ربكة شديدة خلاص واتفضل يا عمي كررها يجي ذي عشرة مرات المهم اكرم الراجل الغريب آخر كرم لما ذهب الغريب سأله ابو وعمه منو الراجل ده أجابهم وبصوت عالي ده ما ابو القدح ذاتو .. ههههها
وجاء بعد ذلك زواج الكورة طبعا انا ما حضرته ولكن قاعد اسمع بيه والزواج الجماعي وهلم جرة من الزواجات .
وفي زماننا الحالي تكاثر عدد البنات ووصل الى ثلاثة اضعاف عدد الرجال وذلك لاسباب عدة منها تعرض الرجال للموت اكثر من النساء وأخرى والله أعلم
المهم اخر انواع الزواج حا يكون عن طريق جمع كل العذاب عن طريق القوة واحضار البنات الراغبات في الزواج في ميدان عام مثل الساحة الخضراء او استاد رياضي ومن ثم يطلق العذاب في وسط هذا الميدان الفسيح وتطلق خلفهم الفتيات الراغبات في الزواج ويحصل جري شديد ( مارثون ) المهم اللي يمسكوه يعرسوه على طول.
ABO AHMED

هههههههههههههههههههههه
والله ده الفضل
لك الف شكر
على فكره انا كنت قايلاك بنت

طيب يا ابو حميد والبكون جراي ويفتح فتح جد ده ما يعرس ولا كيف :D:D

جد موضوع ظريف وفيه الطرفه اكثر ضرب من الخيال ، فعلا البنات فاقو الرجال عددا لكن مابحصل انو يعملو مارثون وذي ماقال ليك ابوروان الجراي ياكل نيم

كيف تعرّس

العنوان اعلاه اسم لكتاب من تاليف الدكتور (العزابي اخو البايرات)طبعه بمطبعة (البايركس) وتوزعه شركة العزابه للطباعه والنشر والتوزيع الكتاب مؤلف من خرطمية صفحه وينقسم الكتاب الى عدة ابواب وشبابيك ويتحدث الكتاب عن الزواج منذ فترة الخطوبه الى مرحلة الام المفاصل والرطوبه يقول الكاتب ان الزواج يبدا بنقه وينتهي بنقه يبدا بنقه في الحدايق والكافتريات حيث الحاجه البارده والكلام المعسول واكل التسالي والفول و ينتهي بنقة الشمارات وتبادل الاتهامات ويواصل الكاتب فيقول الزواج يبدا بتبادل الزهور والالبومات وينتهي بتبادل الجزم والنعلات ويشرح الكاتب بالتفصيل الممل مراحل الزواج منذ فتح خشم العروس وامها ومرورا بفتح خشم الضيوف وملاها بالضلع الى فتح خشم الباب وخروج العريس من غير عوده ثم يناقش الكتاب الشيله ويقول فهي تقيله رفض ان يحملها العتالي وحملها العريس انه كان ظلوما جهولا ويشجب الكتاب ظاهرة الزواج العرفي وهي ان يتزوج الشاب والشابه في الخفاء وحدهما دون تتبعهما الملائكة او تسير معاهم والكاتب يرفض بشده زواج البوبار وقلب العرس هظار .
كما شجب الكتاب شيلة احد العرسان التي تتكون من بوتيك ومحل عطورومحل احذيه ومصنع زيت ومكرونه وسكسكانيه وكمونيه ونسيبتو قالت شويه اما المائده فقد كانت عباره عن تور محشي خرفان والخرفان محشيه دجاج والدجاج محشي حمام والحمام محشي عصافير....اما الفنانين فقد كانوا عشرين من الكبار وعشره من المتوسطين وخمسين من عينة الفنانين البجيبوهم مع الصيوان..وفي الختام يطالب الكاتب الشباب بان ينفضو الكيس وان يبطلو احلام السفر الى باريس والشابات ان يقللن من الطلبات وان لا يستعملن الشاكوش اذا ظهر زول القروش...
وهنا انتهي عرض الكتاب
الى جديد لقاء ..
مع مودتي

أنا ما أجري والبدو يصير يصير

شوف يا أبو حميد

أولا تحياتى ليك ، لكن لو حصل دا مافى غير زقله للمارثوانات بتعادتك دى بس طبعا بطلع منها .

أما الأخت توتا
فموضوعك جميل شديد وأدى البوست نكهة الفكاهة مشكورة كتير عليه .

والله دى فكره كويسه يعنى الواحد بينافس عشان اصلو ما جراى حاتخطف بسرعه

بسم الله والحمد لله والصلاة والسلام على رسول الله صلى الله عليه وسلم

اشكركم جميعا يا اعزائي حتى تثتغيثوا وعندها تغاثوا بماء زمزم وكل انهار الجنة وأكلها .. آمين
ابو احمد