المشاركة الأصلية كتبت بواسطة بدرالدين أحمد موسى
يا شيخ ود سمير خليك من النقل و أسمع تجربتى أنا مع مستشفى الشرطة !!
الوالده أطال الله فى عمرها إحتاجت لعملية .. مشينا مستشفى الشرطة قابلنا أخونا مهدى صالح .. إتكلمنا فى التكاليف .. و قبلنا ( بالمقاولة) .. قلت ليهو يا خى أنا مشيت لدكتور فلان .. قال لى خلاص هو أصلوا بيتعامل معانا و بيعمل عملياتة عندنا ..
قلت ليهو يا خى دكور فلان ده أنا لى يومين ما مر على الوالدة ( فى غرفة خاصة بمستشفى مدنى ) .. شوف لى واحد من دكاترتكم يعمل ليها اللازم .. قال لى تمشى المساء لى دكتور علان فى عيادته تقول ليه إنك عاوز تعمل ليها عملية فى مستشفى الشرطة .. و من غير تطويل ياود سمير .. طلبت منو يتصل بى دكتور فلان اللى لى يومين ما لامى فيه .. و يا للعجب . أجاب على مكالمة دكتور مهدى .. وجاء يوم العملية !!
أول حاجة بعد إقترب انتهاء العملية و نحن فى أقصى حالات القلق .. طلعت لينا رئيسة الممرضات .. قالت لينا جيبو لى ( برطمانية) فاضية .. !!!!
برطمانية شنو يا زولة ؟؟؟ قالت عشان يختوا فيها العينة ..
طيب و أنا هسه أجيب ليكم برطمانية من وين .. قالت لى .. أمشى البقالة القصاد المستشفى .. إشترى ليك منو برطمانية مربى .. فضى المربة و غسل البرطمانية وجيبها !!
و بعد ذلك .. لك أن تعرف أن الملايات من بيتنا ... و العلاج من جيبنا .. و الحقن من جيبنا .. و الدرب من جيبنا .. و حتى الممرضات نصحيهم بالليل عند موعد الجرعة .. وده كله بره المقاولة !!! و كفاية لحد هنا .. عشان الهوا شديد !!
تحياتى
