جيت من الخلاء ....
الواطه لسه نهار ....
لمه ليك فينى واحد شليق شلاقه _ ذكرنى طمورتى _ سايق ليهو موتر .... قال الا اوصلنى محل انا ماشى ....
يا زول .... قال السماء ده قريب ... مافى اى طريقه .... يا ود الناس ..... حرم الليله الا اوصلك ...
فى سرى قلت الله امشى اليوم ده على خير ....
يا زول العربيه هنديك ليها واقفه .... قال الا اركب معاهو الموتر علشان اشوف سواقتو بقت كيف ...!!
اللهم طولك يا روح .... استغفرت واتوكلت على الدائم ويا روح ما بعدك روح ....
وهاك يا ابنصات ..... معااااااااك معلم يا فرده ....
الزول ده طاير بالموتر تقول جابو ليهو خبر موت هسه دى ...
ياخى ده زى البمثل ليهو فى فلم هندى وماشى انتقم من الخائن ...
شمال فى يمين .... يمين فى شمال ..... جينا مارين بالمستشفى .....
عينى للمرأه حامل _ كرشها تقول خاته فيها قدرة فول _ قاطعه الظلت ...
وزولى ماشى عليها بالموتر دقرى ..... معاك معلم يااااخ ...
بالله المرأه شدة ما كرشها منفوخه تقول تلد فى الظلط ده هسه ....
وزولى تقول موصنوا عليها .... دقرى زى القطر ..
وانا اقول ليهو يازول .... يا زول .... المرأه يا بنى آدم ....
وحاتكم تقول راكب مع زول تانى ... يا جماعه دى شبكت شنو دى ...؟
بالله الزول ده لمه ليك فى المرأه دى شالها فوق وخبت بيها الواطه وخبت ليك الموتر فى المرأه وخبتنى ليك بالموتر وخبتنا كلنا بيهو هو ذاتو .... يعنى فلم هندى بث ....
انا بقيت ما فارز روحى من الموتر ولا من المرأه ولا من صاحبى المعلم ده .....
بث زى الحرامى اللموا فيهو ناس الفريق وهااااااك يا خبت ....
ما تعرف الحرامى من الزول الما حرامى ....
مشتتين فى الواطه تقول الجماعه ديل دقشوهم بى ضراب بلى ....
هسه تقولوا ليى الدخل البلى هنا شنو ...؟
جنكم تنظروا وتمسكوا ليكم فى حاجات هايفه ...
اجمل مافى الموضوع بنطلونى انشرط .... بقيت من الواطه ما قادر اقوم ....
انا ذاتى ما عارف نفسى .... هسه اكورك ... ولا اخجل ..... ولا اسوى شنو ...؟
الزول ده لمه فينى زى الملاريا الخبيثه .... فجأه كده تجيك تشنجات ......
كرهت السودان وكرهت المواتر وكرهت الهند ذاتها ...
وبعد شويه عينك ما تشوف الا النور .... الناس دى تقول كلموها فى الرادى ....
تقول شافونا فى الجزيره الاخباريه .... الواحد بسأل فيك سؤال منكر ونكير ...
الجماعه ديل تقول مقاولنهم علينا .... تقول مدنهم ورقة الاسئله ....
ها زول كيف انت .... ها زول انشاء الله عوجه مافى ... ها زول علك بخير ...
وانا ارد لى كل زول براهو ... وما داير اقوم من الواطه ....
والجماعه اشولوا واقوموا فينى بالقصب .... وانا التقول الواطه دى زارعنى فيها ....
ها ناس امهلوا .... دقيقه .... انا بقوم براى ....
ثمح ما تقوم .... بالله التقول قاعد ليهم فى راسهم ....ها ناس امهلو دقيقه ....
عليكم الله شوفوا الوقعت فيها .....
الواحد بقى ذى الزول البصحوهو الصباح بدرى وهو ماداير اقوم من النوم ...
عطشت ......
النشرب لى مويه ابل بيها ريقى ... تنشفوا للزول ريقوا بالاسئله الكتيره دى ....
انا من ما مايسه دى جابتنى فى الكركر ده ... وانا ايى زول الاقيهو اقوم اسألنى ..
انا عامل حادث .... والناس بتسأل فينى ..... التقول انا استاذ رياضيات ....
انا من يوم الكركر داك اشيل واشرب فى المويه ...
كان شفت لى زول ساااى اشرب لى مويه .... بخت جك المويه اول حتين افتح النفاج ....
واحد ثقيل قال لى ....شكلك داير تبقى ماسوره ....
بالله جبتوا لينا سيرت المويه .... نسيتونا الموضوع ذاتو ....
انتو تنسوا الزول اسمو ...
هو الموضوع عن شنو ...؟
