فتحت قناة الجزيرة . . هذا الصباح . . لقيت نشرة الجزيرة هذا الصباح . . و خجيجة بن قنة قاعدة تضوي فوق الشاشة هذا الصباح. . عاد اتكيفت جنس كيف في هذا الصباح الباهي . . انبسطتا جنس انبساطة . . و كدت أن أدوبي . . شلت المخدة . . و تنيتا . . و انبطحت في بطن العنقريب . . و كوعتا . . و خلفت كراع فوق كراع . . الحقيقة خجيجة بن قنة مرأة ما ساهل . . حاجة تفتح ليها قلبك و تقبّل يمين و تقبّل شمال . . و تقفلو عليها . . عشان مافي زول يكون شافك . . أنا بكن لي بت قنة دي شديد الاحترام . . عشان كانت واقفة معانا بعد مسخرة مباراة الجزاير و مصر . . أها بعد كويعتي اللذيذونية دي . . كوركتا لي خالتي السعدية . . يا خالة . . . يا السعدية . . يا سعدونة . . وحات المعزة البينا كان ما جبتي لي كبيبية شاي . . و قننيهو . . عشان خاطر خجيجة بن قنة . . ما لحقت كملت نضميني مع خالتي السعدية . . جات ضبانة طايرة . . فررررررر . . و ركت فوق جضم بت قنة . . الله يسختك . . كان دايرة تمسخي علي كبيبية الشاي المقنن . . و يسختك انتي كمان يا قناة قوون علي حس الضبيبينة دي . . أنا في اللوال اندهشتا من جراءة و قوة عين هذه الضبيبينة . . و لقيت روحي قمتا من عنقريبي . . و قعدتا أنهر في الضبيبينة من جضيم بت قنة . . كوركت ليها بي طول حسي . . هششششششش .. يااااا ببببتتت قنننننة . . هشششششش . . هووووي يا بت قنة . . الضبيبينة راكة فوق جضمك . . هشششششش . . أنهريها يا بت قنة . . لاكين خجيجة بت قنة . . ما سمعت كواريكي . . و لا أولت الضبيبينة أي اهتمام . . تاني كوركت ليها بي طول حسي . . يا خجيجة بت قنة عيييييييك . . شحتفتي روحي . . في ظمتك كان ما مديتي ايدك و نهرتيها . . المرة دي ظنيتا سمعت كوراكي و الروراي بتاعي . . و يا الله و يامين نهرت الضبيبينة . . لكن بعد شنو يا خجيجة . . بعد الضبيبينة شالت لها رشفة من الجضيم؟؟؟ . . خالتي السعدية جابت لي كبيبية الشاي المقنن . . لقتني زعلان و مسجم و مرمد . . قالت لي . . أجي!!! مالك يا فيفيد بتكورك . . نعل ما في عوجة . . قلت ليها . . قناة الجزيرة يا خالة . . فيها ضبيبينة حايمة . . شالت ليها رشفة من شاييهم المقنن . . أنا خايف تكون دخلت ليهم من تلفزيونا دا.
في موقف المواصلات . . ختيت كراعي في خشم باب الحافلة . . جات مراة سمحة جنس سماحة . . اتذكرت بت قنة . . و اتذكرت الضبيبينة . . و اتذكرت قناة قوون و مساختا . . اتمنيت تجي ضبيبينة من تلفزيون بيتنا . . و ترك ليها فوق جضما . . و أقوم أنا اللهفان . . أنهرا ليها بكل ممنونية . . و أقعد أهبب ليها فوق جضيماتا من الضبابين لحدي ما تصل بيتا . . و يسمها الضبيبينة كان قررت تاخد ليها رشفة مقننة . . وكت شفت المرأة واقفة . . خجلت جنس خجل . . قمت نزلت كراعي . . و قلت ليها متكبكباً . .اتفضلي . . قالت لي و هي خجلى . . لالالالا اتفضل انت . . قلت ليها انتي في اللوال .. النسوان المقننات يركبن هن في اللوال . . قالت لا انت في اللوال . . قلت ليها و بعيني المنى . . خلاس نركب سوا . . و نقعد في كرسي واحد سوا . . و نقزقز النضمي سوا . . المرأة انبسطت من جراءتي المتل جراءة ضبيبينة بت قنة . . قمنا ختينا كريعاتنا سواء في باب الحافلة . . و طلعنا الحافلة سوا . . و طبّانا الباب سوا . . و فكّانا الباب سوا . . و ضمانا الهوى سوا . . هي اتكيفت و أنا اتكيفتا . . و مشينا عشان نقعد في الكرسي سوا . . و نشدو بحلو النضمي . . كان يجي واحد غلييييد ما بعرفو جانا ناطي من وين . . و يمسكني من لياقة فلينتي . . و يدفرني في الكرسي الوراء . . و يقعد مع المرأة السميحة . . و هي تقول ليهو . . ازييييييك يا مخطااااار . . واحشني موووووووت يا مخطاااااار . . ويييييييين الحي بيييييك يا مخطاااااار . . و تطير ضبيينة خديرا غليدة من شلوفة الكمساري . . و ترك فوق جضم مختار الغليد . . و أنا المصدوم . . كيتاً عليهو أبيت انهرا ليهو من جضمو . . خليها تمصو و تلحقو الرقدو و ما قامو
