التعليم باظ ياجدعان

فين أيام رفاعة الطهطاوي وعلي أمين وزكي جمعة (مين زكي جمعة ده)
أسمحوا لي أحبتي بأن أدلف لهذا الموضوع الحساس وأتناول مثل هذا الطرح الذي ظل يؤرقني وشجعني علي ذلك قرآتي لموضوع مدرسة مدني الثانوية ومدرسة مدني الأهلية( مع العلم بأني درست في المدارس المنافسة لهم ( مدرسة الأميريةالمتوسطة/ومدرسة السني الثانوية) وعموماً فكلها مدارس لا يختلف عليها أحد من حيث المستوي والإنضباط .
نعود لعنوان الموضوع وأتمني مشاركة الجميع برأيهم في هذا الموضوع .فتردي التعليم في السودان له عدة محاور وهذة وجهة نظري الشخصية لأني غير مختص بالإفتاء في مثل هذة الأمور لكن هي وجهة نظر وحسب.
المحور الأول : المعلم( شخصية المعلم وهيبته)
فرق كبير وشاسع (فرق السما للأرض) بين معلم الأمس واليوم. المعلم ايام زمان كان هيبة وقار وشخصية مرعبة يعني الواحد ممكن مايخاف من أبوه وأمه زي مابخاف من الأستاذ.وحتي لو كنت في الإجازة وعملت حاجة غلط وقالوا ليك بنكلم ليك أستاذ فلان(العجب لو كان من النوع الجلاد داك)تاني إنت ماحاتفهم أي حاجة في إجازتك وتكون خايف وقلبك مقطوع من أول أيام المدرسة لو كلموا ليك الأستاذ.حتي لو كنا بنلعب في كورة ولا حاجة وجاء الأستاذ ماري ، أول حاجة تجري صوف وتفكر بكرة حتعمل شنو؟.
أذكر ونحن في المدرسة الأميرية كان محظور علينا حظر تام إننا نمشي بشارع البحر(خوفاً علينا من الزحمة والحوادث) فكنت باخد الطريق من حي مايو بالعجلة عن طريق الحي السوداني من الداخل وعبر الملجة مروراً بالسينما الوطنية وحديقة وقيع الله وميدان الملك ونادي المصارف (داخل القسم الأول) وحتي جامع الحكومة.بعد كدة ننزل من العجلة ونعاين يمين وشمال ونقطع الشارع( ولازم تنزل من العجلة) لأنو أستاذ علي محمد يوسف بكون واقف يراقب الدخول ( حتي دخول آخر طالب).ومرت السنوات ودخلنا مدرسة السني لكن والله العظيم حتي هذة اللحظة إذا مريت بشارع البحر ( أخاف إنو أستاذ علي يشوفني).
تعالوا نشوف معلم اليوم الذي أضاع هيبتة بنفسه ( من خلال الدروس الخصوصية) وخلافة. ياخي أنا شفت طالب قال لأستاذه (أديني سفه) شوف بالله جنس الكلام ده.حقيقي ماعارف سبب ضياع هيبة المعلم شنو بالضبط ( إحتمال الظروف الإقتصادية) وإحتمال حاجات تانية( ياريت أسمع وجهات نظركم).
المحور الثاني : المنهج الدراسي
بصراحة أنا عندي رأي واضح في المناهج التي تدرس حالياً( ياخي بقت حشو)يعني يملوا راس الطفل في المرحلة الإبتائية بي حاجات نحن درسناها في المتوسطة واحتمال في الثانوي.قد يكون راي البعض إنو الزمن إختلف ومستوي التفكير زاد عن زمان.لكن لا أنا رائي إنو مقرر زمان تم بناء علي دراسة متانية لمتطلبات الطالب بمراحله السنية المختلفة وكان ناس المناهج فطاحلة ( ناس بخت الرضا).يعني ناس عارفين بيعملوا في شنو.وبرضو عايز رأيكم في النقطة دي.
المحور الثالث: السلم التعليمي الجديد
ياجماعة الناس ديل شالوا أهم مرحلة دراسية( وهي المرحلة المتوسطة) يعني فجأة بين يوم وليلة تم إلغاء هذة الفترة الهامة من الحياة الدراسية.
أقول عليها هامة لأنها إنتقال من مرحلة الطفولة لمرحلة المراهقة الحساسة....وأنا ماعارف بأي منطق تجمع بين أطفال صغار وأولاد مراهقين في مدرسة واحدة.( ياجماعة المسألة دي خطيرة جداً وكلنا عارفين تفكير المراهق).
الحاجة التانية دي مرحلة بتتكون فيها شخصية الواحد ويبدأ تفكيره يختلف عن الأول.وبالمناسبة دي اكتر مرحلة عالقة في ذهني ومابنسي أي تفاصيل من المرحلة المتوسطة.حتي الأصدقاء وحتي هذة اللحظة هم اصدقائي من المرحلة المتوسطة لم تنقطع بنا السبل ولا غيرنا الزمن.وصدقوني لو قلت ليكم أنا أتذكر ناس الفصل بالإسم ( واحد واحد) والغريبة في الموضوع إني إحتمال أنسي واحد درس معاي في الثانوي لكن مستحيل أنسي واحد درس معاي المتوسطة.
أخيراً:
قد يتفق معي البعض وقد يختلف معي البعض الآخر لكن هذة وجهة نظري وأتمني أن أتنور بآرائكم في هذا الموضوع .لأنو أنا شايف( التعليم باظ ياجدعان).
ودمتم.....

كلامك كلو يا ابوهاشم في محلو بالذات حكاية تغيير السلم التعليمي وحكاية المنهج الجديد ويا حليل النمله الشفوقه واندرو والاسد
فقط قد اختلف معك قليلا بالنسبه لموضوع المعلم ياخالد
صاح المعلم زمان عندو هيبه وعندو مكانة كبيره جدا في المجتمع خصوصا في المجتمعات القرويه كان صاحب الحل والربط فيها المعلم
لكن منو الفقدو هيبته ؟ والسبب شنو؟
السبب ياها حكومتنا دي اكتر شريحه انظلمت هي شريحة المعلمين
ياخي معقول استاذ بتاع ثانوي بتديهو كم وثمانين مرتب اساسي وعايزو اعيش بيهو واجي تاني يوم وذهنو صافي عشان اشرح للطلبه؟
عشان كده المعلم اتجه للمعاهد والمدارس الخاصه والدروس الخصوصيه وانا وجهة نظري انو اتجاهو سليم وما حقو انقص من هيبتو شئ ‘يعني حايعمل شنو امد يدو ولا يسرق والجميع في مدني يعلم قروش المعلمين السفاها صاحبنا وعمل منها شركة روينا وبرضو تقول لي هيبه يا ابو الخلد ‘ ومش المعلمين براهم وينها هيبة ضباط الشرطه والجيش الكانت في الثمانينات ؟ في زمن الانقاذ ده شفنا واحدين صعاليك ساي الواحد عامل ليهو دقن ضلالة وتلقاهو بنهر في رائد ولا مقدم ‘ فحكاية الهيبه دي نسأل منها الحكومه مش المعلم( والحكومه ما عاملينها شماعه مما قد يتبادر للذهن لكن دي الحقيقه وده الوضع العايشناهو )
وختاما لك الشكر العزيز ابو هاشم علي هذا الموضوع الجميل والذي يطرح قضايا مهمه !

بسم الله الرحمن الرحيم
الاخ الحبيب خالد لك التحية 0 كل ماذكرتة ترجع للعلاقة بين الطالب والاستاذ
وكيف كانت 0
وانقل لك مني تلك الذكري التي ماذالت عالقة من تلك الايام
اذكر فيه انة اول يوم ندخل فية للدراسة في المرحلة الاسطي 0واول حصة لنا في تلك المرحلة كانت ان جاء لنا ابة الفصل وبداء التعارف 0
بينة وبيننا 0ثم بدات بعض الاسئلة منه لنا 0 فما كان من احدنا ان ذكر اسم لاستاذ بدون تقديم كلمة الاستاذ مقرونة باسمة 0 والله ما اخذة زميلنا من العقاب ارتجف له كل الفصل 0 ثم اقيمت لنا محاضرة عن تلك العلاقة كيف تكون 0من هو المعلم لك 0وكيف انت بالنسبة له 0 ورقم شدة العقاب لنا كانت هناك 0تنم عن وعي لتلك المرحلة 0 وبها نوع من الرحمة والمودة 0 ايضا 0عندما تكون انت في حوجة لها تجد الاستاذ 0اولهم 0شدة في لحظتها 0ورحمة في مكانها 0
والله ساعة الافطار نجدهم يتفقدونا وفيهم من يقوم بافطار0 الجائع 0او المحتاج ومن جيبة 0 والله اذكر احد هم انة قام بحضار قماش رداء ايامها لاحد الزملاء 0 اين هولاء 0 ايام خوالي لن تنسي 0

شكراً أحبتي ضياء وأبوالمهتدي علي هذة المداخلة. لكن انا أيضاً أختلف مع ضياء شوية في ناحية السبب والمسببات. فلو كانت الظروف الإقتصادية بتغير الثوابت فعلي الدنيا السلام. وأنا أعتبر أن العلاقة بين الطالب والمعلم هي من الثوابت مثل علاقة الإبن بوالده.فالموضوع كبير وحتي والسبب الأساسي في رأئي هو التربية الحديثة. زمان كان جاركم في الفريق يقدر يربيك ويكسر راسك لو عملت غلط ومافي واحد يقول ليهو ليه ضربت الولد ده ليه. لكن شوف هسه. ماتقدر تمد يدك ولا حتي تتكلم مع ( ولد اخوك ولا ولد اختك) خوفاً من المشاكل (إلا من رحم ربي).
وتعقيباً علي الأخ أبو المهتدي أقول له نعم كان معلمين زمان شديدين وقت الشدة ورحيمين بالزيادة عندما يتطلب الأمر ذلك. والأهم من كده إنك بتكون عارف ومتأكد من غلطك قبل ماالمعلم يعاقبك يعني بتكون مقتنع بغلطك. عشان كدة ماشفنا واحد إنجلد في المدرسة قام ولي لمره جاء المدرسة وقال ليه ضربتوا الولد ده. يعني تاخد علقتك في حنانك وتسكت لأنك لو كلمت أبوك 100% حتأخد علقة تاني من أبوك لأنك غلطان.

أخونا أبو هاشم ........................ سلامات

الموضوع المطروح فى غاية الأهمية ، وأعجبتنى طريقتك فى طرح الموضوع

عبر تقسيمه لمحاور تسهل عملية النقاش ، وهو أسلوب علمى ومفتقد فى

معالجاتنا الأدبية .

فيما يتعلق بالمحور الأول والخاص بهيبة المدرس فأعتقد أن التغيرات الإجتماعية

قد أثرت بشكل أو بآخر فى النظرة للمدرسين ، فلم تعد للمدرس الهيبة المعهودة

على أيامنا ، أضف لذلك نقص التأهيل لمدرسى اليوم ، ففى السابق يتم تدريب

المدرس ببخت الرضا ، ويتم إعداده مهنياً ونفسياً لهذه المهنة ، أما الآن فالمسألة

لاتعدو اكتمال إجراءات التعيين بالوزارة وبعدها تصبح مدرساً .

فى المحور الثانى والمتعلق بالمناهج الدراسية فينصرف عليها ماأسلفنا بشأن

المدرسين ، إذ أن المناهج الدراسية تعدها نخبة من أميز التربويين ويتم تجريبها

بمدارس أعدت لهذا الغرض للوقوف على مدى تقبل الطلاب واستيعابهم لها .

أما المحور الثالث فالسلم التعليمى أضحى مطيةً لأهواء أهل السياسة من

فاقدى الكياسة ، وقد علق أحد الظرفاء قائلاً :

تمنية سنوات فى حوش واحد !! دى مدرسة ولاسجن !!!!!!!

وأتفق معك أخى أبو هاشم أن أروع أيام الدراسة هى المرحلة المتوسطة ،

ومازلت أذكر تفاصيل الجمعية الأدبية وعصام محمد نور يشدو " الزينة جات

تتبسم" .

مع مودتى

ود الماذون

شكراً عزيزي ود المأزون علي مداخلتك وتحليلك الدقيق للموضوع وزي ماقلت الموضوع بقي إجراءات تعيين. وحتي بقت منفذ لمجندي الخدمة الإلزامية. يعني اي واحد جامعي بقضي فترة الإلزامية علي طول يبقي معلم. ضاربين بأصول هذة المهنة الرسالة عرض الحائط.
قم للمعلم وفه التبجيلا.... كاد المعلم أن يكون رسولا...