تسـفــارات , شــوق وحنـيــن ..

تالله انه يذبحني بمدية صدئة ذلك الذي يدعي الشوق .. يجتاحني من كل اتجاهـ
فقد تباعدت الخطي وتوالت ايام الفراق وجمعت وضربت ولم تقسم او تطرح
حتي شكلتها سنينا عددا ...
فللقطار عندنا ذكريات ذات دموع واوجاع والام .. وما ان ذكر القطار الا
وكانت هناك لوعة فراق ووداع وفقد لملامح شخص ظل مقيما بدواخلنا ..
***.
من قمت من بيتنا ومشيت
بطاقتي صورة مصغرة
شايل معاي شنطة صفيح
حزمة هموم
ولدا متين بقي للسفر والاغتراب والدردرة

* صبرا ايها الصبي فالغربة مزروعة فينا منذ امد بعيد خلقنا والظروف جدباء
وكاسيها الجفاف وارضها بور خراب .. امسياتنا كالحة نستشف الضوء فيها من القمر
فهو ضوء الله لك ولامثالك .. نفترش الارض ونرجو رحمة الظروف يوما تعلنه عطفا
وتغيير حال .. فالهموم كانت هي ما اختلط لحظة الصرخة الاولي وانت تخرج من بطن
امك وقد امتزجت باول جرعة حليب اعطت اليك وقد سال الحليب من بين جنباتك ولكنها
تلك الهموم قد استقرت واتخذت لها موضعا وسطا ..

كان الزمان لسة رضى
والناس ظروفها مقدرة
وانا في القطار اصغر صبي
امال تفيض متفجرة

* دوما نعاتيه زماننا هذا فما الذي حل به وجعله متغيرا عن الزمن الاول ؟؟
مازلنا نرتشف جرعات من الوجع وكاس الجحيم بدلا من كؤوس الحليب كامل الدسم
وانواع المستطابات من مغذيات الاطفال فانت منهم ذو 12 سنة وتحملها شنطة حديد
وحزمة هموم .. وامال لك تفيض من هذا القطر قررت ان تزرعها فمتي يكون الحصاد
لاعلم لك في حال ان نجح مازرعته ولم تاتيه آفات هذا الزمن الجحيم ..
والناس ظروفها مقدرة .. القلوب وقتها لم تكن هكذا ولم تكن تعرف البغضاء
وسفر العذاب للنفس الآمرة بالسوء ...

لما القطار صفر وقف
بهرتني صورة عطبرة
دي محطة الوطن الكبير كانت تضج متحضرة
ونزلت ماشي على الرصيف
اغبش هدومي مغبرة ...

* عطبرة .. ووجع الذكري .. الالفة .. الحديد .. النار .. وبياض خاطر ..
عيون اهلها الطيبون تنادي بمرحب وجيدا جيت ..
عطبرة جمال النفس وصدق السريرة ..
محطات ذات ابعاد لما بها من حنين اخاذ وشوق نيرانه تتقد كل حين ..
لو تجولت داخل عطبرة لايقنت بان الجمال هناك فقط بين تلك البيوتات ..
ولو تاملت انسان عطبرة لادركت ان الانسان هنا ليس ككل انسان ..
انسان عطبرة تعرفه قبل ان تعرفه او تلاقيه ذو صفات عطبراوية نادرة
وخاصة تفتح لك الابواب منذ الوهلة الاولي بالبشاشة والسن البيضاء ..
الحنين ياخذني الي عطبرة دوما ولكني افتقد ذلك القطر الذي كنت لا امل من السفر به ..
فيالقبح السنين وايام الغربة .. مليون سلام عطبرة ..

الهجرة من زمناً قديم زي ساقية فينا مدورة..
عائلة ابوي عبد الرحيم من حلفا جات متهجرة
اديلة او والله رن فجلي
بلد نفاي اموقا كجلي نورين موقو
كن جواب كفاي
دقيتني نفص كورين لوجي
نفس القطارات والسكك
يوم مقبلة ويوم مدبرة
كان عمري 12 سنة
شايل التقيلة مبكرة
رحال بدون زاد لا متاع
كان لي كتاب ومفكرة
لميت شتات بعض الحروف
وقرايتي تبدو مكسرة

* هي هكذا نفس القطارات وذاتها السكك ثابته ولاتغيير فيها الا الاقبال والادبار
فلكل اتجاهـ طعم وجع فراق او فرحة عودة .. فكنت دوما اراهما طعمهما مرا
عندما افارق اسرتي واتوجه الي عطبرة ياخذني الحنين الي اهلي وقريتي
وعندما اتوجه من عطبرة الي الاتجاه الاخر يذبحني الشوق الي عطبرة ..
فهي ذات الفة بطابع خاص ...
من قمت من بيتنا ومشيت
بطاقتي صورة مصغرة
شايل معاي شنطة صفيح حزمة هموم
ولدا متين بقي للسفر والاغتراب والدردرة

كثيرون هم اهل الكلمة في بلادي .. شعراء صاغوا اجمل الكلمات
وشكلوهـ لنا فنا راقيا خالدا عبــر الاجيال .. من الحقيبة الي يوم قريب
من يومنا هذا .. العاطفة .. الوطن .. الغزل .. لم يتركوا شيئا حتي كتبوا عنه
احرف تشع روعة والفة .. دوما تشدني اشعار الشجن والحنين فاردت ان اقف
مع اهل تلك الاشعار حينا من الوقت علني استطيع ان اكتب شيئا :
* حسين بازرعة :
فهذا الانسان الشاعر يفيض شجنا .. فقد صاغ من الشعر كلمات عُزفت ولُحنت
وتغني بها في بلادي من يعرفون معني الشجن .. ذلك الذي يحسسك بانه لايكتب
من الخيال بل هو يكتب فيك انت .. فمن منا لايعرف الشجن حد الهلاك ..
وقفة :
لمتين يلازمك في هواك مر الشجن ويطول في ايامك سهر ويطول عذاب
ياقلبي لو كانت محبتو بالتمن يكفيك هدرت عمر حرقت عليه شباب
لكن هواك اكبر وماكان لي تمن ..
والحسرة مابتنفع ولا بيجدي العتاب ..
احسن تخليه للليالي وللزمن ...
والكثر من اشعار ذاك المشحون شجنا والفائض روعة وصفاء وصدق
الكثير منها قد انغمس وسط الشجن الذي يجعل الواحد يمزق النفس
ويرحل ببقاياها الي ازمان قد ولت ومضت ..
... اجتمعنا علي المحبة في ثواني
في طريق مفروش بي حبي وحناني
وافترقنا كل واحد في طريقو
انا ضائع وانت مخدوع بالاماني
كل زادي في ضياعي قلبي مفتوح للاحبة ..
فكيف يكون الحال والهيئة والحس عندما تعبرك كلمات ( قصتنا )
التي تجعلك تبحر برا وتقطع فيافي الجغرفيا بكل تشكيلاتها وتجسد
لك محبوبا قد منحته ذات يوم خصوصية التحنان والغلاوة ..
والحب بكل الجوارح واعمق العواطف وحمل كل هم للدنيا فقط من اجله
وكل هذا يحدث في زمان تجد نفسك فيه تائها ولاتشعر بدفء مساءهـ
ولكن بازرعة هو من اولئك الذين يمتلكون المشاعر التي تشتئ صيفا ..
شجن .. قصتنا .. من اجل حبي .. ليالي المصير ..
والكثير من الكلمات الصادقة التي غناها غير الراحل عثمان حسين ..
لك التحية حسين بازرعة وتاكد باننا لم ولن نرتوي من فيضك وشجنك ...

صلاح احمد ابراهيم ..
فيكفيني هنا ان اكتب القليل واقف عن اروع الروائع
التي تسكن دواخلنا ونرتاح عندها عندما يغلب علينا الحنين ..
الطيــــــــــــــــر المهاجر ...
طال بيهو الحنين فاض بيهو الشجن واقف يردد من زمن ..
بالله يا الطير المهاجر للوطن زمن الخريف
تطير بسراع تطير ماتضيع زمن اوعك تقيف ..
وتواصل الليل بالصباح تحت المطر وسط الرياح ..
.. فما القول هنا ؟؟ عند استطالة الحنين بك وفيضان الشجن ؟؟
فهذا الصلاح عندما مسته تلك الصفتين لم يأبه بان يخاطب الطير
وتجدهـ مسترحما له احيانا ولكن استرحام بطعم آخر لما فيه من انواع
الشرط والجزم ( تطير بسراع ,, اوعك تقيف .. تواصل الليل بالصباح ..
تحت المطر وسط الرياح ) ما استوقفني اكثر ان كل هذا يحدث والوقت خريفا
مما جعلني اتساءل .. فهل للخريف عندنا حنين وشجن بطعم غير باقي الفصول
الاخريات ؟؟؟ بالتاكيد نعم .. فأنــّــي لنا ان ننسي اسراب الطير عندما
تعلن الرحيل خريفا الي اماكن تنعم بذاك الفصل الماطر المرعد الموحل ..
ولكن لنري حكمة ذاك المبدع في كيفية جلب الراحة بشيئ
يجلب التعب رغم التعب حين خاطب الطير :
وكان تعب منك جناح في السرعة زيد .....
هنا يجعلك تتفحص نفسك وتقيس درجة الشجن والحنين فيك
فكيف له ان يسرع وجناحه قد اصابه التعب ؟؟؟؟
آآآهـ انه يشجعه بالاسراع حينها لان الذي هو ذاهب اليه
ويمنحه طمأنينة ذاك الموطن الذي يقصدهـ :
في بلادنا ترتاح ضل النخيل اريح سكن ..
وهنا ياتيك بكيل من الحنين وهو يستذكرك بالنخيل والنيل
والقمر والسواقي وغيرها .. ولكن كيف كان التمييز لبلادي
دون سائر البلدان عند صلاح احمد ابراهيم فلنا ان نعرف
ونخاطب انفسنا ونضعها موضع ذاك الطائر او لكل من اراد
ان يعرف كيف هو ذاك الوطن :
** وفوت بلاد وسيب بلاد وان جيت بلاد تلقي فيها النيل بيلمع
في الظلام زي سيف مجوهر بالنجوم من غير نظام ..
تنزل هناك وتحيي ياطير باحترام .. وتقول سلام وتعيد سلام ..
علي نيل بلادنا وشباب بلادنا ونخيل بلادنا ...
كيف يكون شكل بلادي ليلا ولمعان النيل يمسح كل ظلمة فيها ؟؟
وكيف كان التشبيه عند ذاك الجميل ( سيف مجوهر ) ومكمن الروعة
في ( من غير نظام ) بلاترتيب او قصد ..
ولكن عليك بالقاء التحية وبكل احترام .. يجعلك تضحك هنا وبكل حنين
واعادة تلك التحية ثانية .. فيا نيل بلادي وشباب بلادي ونخيل بلادي
مليــــــــــــــــــون تحية ..
ويختم كعادته بروعة دقيقة وحنين فائض وبخصوصية مطلقة وبحق :
** وبالله ياطير قبلما تشرب ؟؟؟؟؟؟؟؟؟ مليون استفهام هنا ..
تمر علي بيت صغير من بابو من شباكو بيلمع الف نور
( وصف دقيق ومفصل للغاية ) فان تشابهت عليك البيوت بذاك الوصف
فلاترجع بل ادخل داخلا لتستبين الامر :
** تلقي الحبيبة بتشتغل منديل حرير لحبيب بعيد
تنزل لديها وتبوس يديها وانقل اليها وفاي ليها
وحبــــي الاكيـــــد ؟؟؟
منديل حرير ... تبوس يديها .. واخيرا تلك الوصية التي من اجلها
تم تكليف الطير بالسفر خريفا .. نقل وعكس ذلك الحب والوفاء ...

اما ان ذهبت الي شرفات الوجع والشجن والحنين
ورصدت بمنظارك روعة الكلمة حتما ستتوقف خطاك
حينها عندما تجد نشيج البوح والشجن اللذيذ من ذلك
المتفرد روعة وجمال :
مدني يوســـف النخلــــي :
وحلاوة الكلمة ودفئها مع ذلك الخيال للصغريات ( طفلة )
وكيف هي ترسم وطنا بالفطرة وبجماله ونيله وخضرته وناسه
ولكن الحال قد جعل ذاك الوطن يبابا .. ونيله حزين ..
وكيف يكون تغيير مجري النيل جراء تلك البسمة البريئة
التي تلبس قرقابا من السمرة والبهاء ...
ما اردت الوقوف عندها احدي القصائد التي دوما اجدني فيها
لما فيها من حزن ووجع وتباعد للالفة ..
** واقـــــــــف بـــــــــــــــــراك :
واقف براك والهم عصف .. ريحا كسح زهرة صباك
ليلا فتح شرفة وجع .. قمرا رحل فارق سماك ..
دوما احادث نفسي كيف يكون الناتج عندما :
تقف وحدك ؟ والهم عاصف ؟ والرياح تكسح زهرات الصبا ؟
والليل يفتح شرفات للوجع ؟ والقمر يعلنه رحيلا ومفارقا للسماء ؟؟؟
انه اجتماع كامل لكلماهو جالب للحزن والهم والشجن ووجع البعاد
فان كان الوقت مساءا فتمهل ياعزيزي ريثما تري لك نورا
للاستدفاء والاستبيان .. فلا قمر هناك .. ليس معك الا ذاك
المساء وهو فاتح شرفات للوجع الجحيم ...
** مطر الحزن عاود هطل جدد عذاب الارصفة
ضي المصابيح البعيدة اتعب عيونك وانطفي
لمتين مواعيد سراب والريد شقي وحرقة وجفا ؟؟؟
ان تمكن الواحد منا من الاجابة علي هذا السؤال
فليطمئن لانه لم يزل يملك العقل والقلب ويمتلك خاصية
الاجابات علي العسير من الاسئلة التي تتضمن الاجابة عليها
الالتزام التام ب ( البروسيوكولجي ) وكيف يكون غدا او العام القادم ..
ماعارف لكن الحزن الذي يصب فيك كالمطر وهو يعاود و ( يتاور )
الهطول حتما سيجرفك ويجعلك يبابا وارضك خاوية والكل حولك مصفر
وباهت ...
** بعد المشاوير البقت ممدودة في نبض التعب
تعود وتلقي رجاك زول حفظ الوداد زمنا صعب
( نبض التعب .. احساس مذاقه مؤلم )
( حفظ الوداد ) متي ؟ في زمن اشتر وصعب وجحيم ..
** والباقي من ليل الهوي
وعطر الصبابة الما انسكب
والباقي من كل الغناء وسيل الكتابة المانضب
( عطر الصبابة .. والنبش في القديم من قبور الذاكرة )
وواقف براك ...
مليون سلام يانخلي ..

اما عن ذاك الدوش :
الشجن .. الحنين .. الالق .. وجمال الكلمة ..
ماذا نذكر وماذا نقول فيه .. انتحدث عن .. :
( ليل المغنين ) .. ونقول :
** أقول
والشمس ِفي عز الأمل
تهتَ ومَشيتْ
أقول يا نِحنَ يا إنتو
وبكيتْ
يا مواعيد ..
يا صباح من غير وسـِم
تهتَ ومَشيتْ
ما ضَـلـّمتْ ..
ما بْـتــَعرِفْ الزول البجيك ..
ولا البـِجيكَ بيـَعرِفكْ ... ( كلام ناس عاقلين جدا )
*****
ام نستكين مع : سحابات الهموم .. والعزاء في المطر ..
سحابات الهموم يا ليل
بَكَن
بين السُكات والقول
وباقات النجوم الجَّن
يعزَّن فى المطر
فاتِن عزاكْ
رَجعَن
*****
ام تلك ال ( تــــــــــــــاجوج ) ..
تاجوج بتكْتب بالشمال
منحوتَهْ في شكل اكتئاب
بتْكحَّل الإبل النحيلَهْ
بالمشاوير النبيلَهْ
*****
قل لي في ماذا نقيف ؟؟؟ رجاءا .. اقل لك دعنا ندوش مع الدوش
ونتدروش حد الدروشة : في الود المشي وماجاء ..
أعيشهْا معاكَ لو تعْرف
دموع البهجَهْ والأفراح
أعيشهْا معاكَ واتأسّف
على الماضى اللّى ولَّىَ وراح
على الفُرْقَهْ الزمانا طويل
****
اقول لك دعنا نستريح مع ود خدوم وناس سعاد ولا نفتش معاهو
عن البلد الرايح .. لالالا .. خلينا مع الحزن القديم احسن فلنا من الاحزان
ماهو مخزون اعوام وسنون عجاف مضت واخري باقية ...
.. الحـــــــــــــــزن القديـــــــــــــــــــــــم :
ولا الحزن القديم
إنتِ
ولا لون الفرح
إنتِ
** لا ادري كيف هو لون الفرح .. ولكني سمعت عن طعم الفرح
وتذوقته ذات مرات قليلة .. اما اللون فهذا دلالة ترك الخيال لك
ايها المتلقي .. اهو لون من تلك التي نعرف باختلافاتها .. ام شيئ خارج
عن قانون القوس قزح وتلك التي نسمعها اليوم .. دعونا نضع له لونا ابيضا
او اخضرا لان معلوماتي التي املك ان الابيض والاخضر فهما الافضل ..
ولا الشوق المشيتْ بيهو
وغلبْنى أقيف
وما بِنْتِ
** لك ان تتأمل كيفية ان تمشي وانت حامل للشوق .. او احتمال
اتخاذ ذاك الشوق متكأً للمشي والرواح .. ومع كل هذا يغلبك ان تتوقف ..
ولا التذكار ولا كُنْتِ
بتطْلَعِى إنتِ من غابات
ومن وديان...
ومنى أنا..
** بتطلعي من غابات .. ومن وديان ( مامشكلة يا الدوش )
بنقبلها وبنحاول نفهمها ان استطعنا ولكن مايجب التوقف عندهـ
( ومني انا ) .. روح مثلا او نفس ؟ بعد التمازج والانصهار العاطفي
تتيح الخروج بعد الاندماج لتلك التي تعشق منك .. حيرتونا ياخ ..
ومِن صحْيَة جروف النيل
مع الموجَهْ الصباحيَّه
ومن شهقَة زهور عطشانَهْ
فوق أحزانهْا
متْكَّيهْ
** جروف النيل ومن غير ماتصحي ومتي ؟ مع الموجة الصباحية شيئ يوحي
باكتمالية الجمال والرهافة .. فكيف يكون طلوعها عندما تصحي تلك الجروف
وموجات الصباح التي احسبها هادئة ولاتعرف كيف تغرق او تغير مسار متحرك
مائي .. اما الاعجب من كل ذلك .. هي تلك الشهقة التي تفرزها الزهور العطشي
وفوق احزانها متكأة ومستلقة .. ( هي الزهور بتشهق وبتزفر ) ..
ويح نفسي وانا اتخبط وكانني اعرف سرد مايكتب الدوش .. احسبه سكــَــر
ومروق لي طرف البلد بس عشان اقرأ شعر الدوش حسب عقليتي ..
بتَطْلَعى إنتِ من صوت طِفلَهْ
وسط اللمَّهْ منْسيَّهْ
** لاتعليق والله ...
تَجينى
معاكْ يجينى زمن
أمتِّع نفسى بالدهشَهْ
** دا المحيرني انا .. ( طعم الدهشة ) ولون الدهشة
والاستمتاع بالدهشة .. فالدهشة تلك ياعزيزي الدوش
ان صح وجودها في كل شيئ فانا الان مندهش حد الاندهاش
مايقيف .. ومستمتع بروعة الدهشة اللقيتها في الحزن القديم
هنا مع شهيق الزهور وحزنها ومع صوت الطفلة المنسية
والمندسة وسط اللمة ...
طبول بتْدُق
وساحات لى فرح نَوّر
وجمّل للحُزن..ممْشى
وتمشي معاي
خُطانا الإلفَهْ والوحشَهْ
وتمشى معاي... وتْرُوحى
وتمشى معاي وسط روحى
ولا البلْقاهو بِعْرِفنى
ولا بعرِف معاكْ ..روحى
** الدوش لك الرحمة والمغفرة ..

محمد الحسن سالم حميد :
الزول المكتول عشقا في الوطن وتراب الوطن وناس الوطن
والتعابة والبسطاء والمساكين والكادحين .. فكم هم كثيرون في بلادي ..
لنقف قليلا عند : مصابيح السماء الثامن ...
يا جاي مارق من دخول الغيث
شرايين التراب السايقة أوردة الوطن
قشرا اليباب ... نشرا العطش
كل ما سرت قطرات درب الرحمة...
في جوفو أرتعش حال الشجر
بال العصافير الخيالها مع الدغش
مشدوه متل خاطر طفل
من ضل برش راكوبة فوق حافة حجر
واقع سجر ...واقف بعد نقط المطر
****
السهل الممتنع ببساطة وجمال سرد وتفصيل للمدخل ..
يجعلك تفهم مايكتب .. لانك تعيش تلك الحالة وتحسها
لرؤيتنا لحال الوطن اليباب وكيف هو متفشي العطش ..
****
اتجمعت سحابة سحابة
وبدا يتلقط طير الجنة
نفس الريح الحرق الغابة
قطم فرحك ليل الحني
رغم بهاظك وعظمة فقدك
إلا إنو الحياة ما وقفت
إلا أنو في ناس بيغنو
** هكذا ختم تلك المصابيح باستمرارية الحياة وعم توقفها
ومازلنا هو وهم ونحن وكلنا نغني وسنغني ونحلم بفجر وغد آتٍ ...
****
هيْ .. أقيفِنْ ..
نورا فِيكِنْ ؟ . ؟
نورا ... نقّاحة الجِّروفْ ..
نورا ... حَلاّبة اللِّبيني ..
للصغيرين والضِّيوفْ
نورا ساعة الحَرْ يولِّعْ ..
تنقلِبْ نسمة وتطوفْ
تَدِّي للجيعان لقيمة
وتَدِّي للعطشان جغيمة
والمَخَلِّي الحال مَصَنقِرْ ..
في تَقَاة اللّيل تَندْقِرْ ..
تدِّي لي باكر بسيمة
تَكْسي للماشين عَرَايا
وفوقا ينقطّعْ هديمه
*** لا ادري ماهو السر عند حميد بنورا ؟؟؟
اهو سر الدوش مع سعاد التي واضح امرها بدون الكناية او الخيال ؟؟؟
ام ان لتلك ال نورا كناية عن شيئ اخر عند حميد ؟؟؟
يجعلك تشر امالك وتكثر من ( لو وليت وعلني ) .. ولو شيئا من تلك
التي تمتلك لتزرع بسمة في شفاهـ طفل عليل .. او تستر جسد بالي
عرته قساوة الايام وجحيم الظروف ..
***
كل ماكتبه حميد اجد فيه نفسي .. ان وقفت عند حال العم عبد الرحيم
تجد نفسك مشغول البال وباستمرار ولتاخذ بالعبرة وتبعد عند سيرك من
حواف الطرق والسكك الحديدية .. دع عبارة ( بكرة احلي ) هي عنوان لك
للقادم من الايام والسنون ...
***
نورا تحلم ..
ولما تحلم ..... نورا ترجِفْ
ولما ترجف .... نورا تحلم ..
ولما ريح الواقع المُرْ ..
لي عشيش أحلاما ينسِفْ
نورا ..... تنزِفْ
وفي الوجود .. وجدانه يهتفْ
حالة .. تقرِفْ ..
حالة تكسِفْ ..
حالة تكسِفْ ..
حالة تقرِفْ ..
وتبدا تقضِفْ ..
ولما تقضِفْ
بالا يهتِفْ ..
وتملا باله أحلام بتلصِفْ
يوم حا تنصِفْ
يوم حا تنصِفْ
** متي هذا اليوم ؟؟؟
والطرقات قد كساها التعب والكل يعيش تحت رحمة الظروف
والوجع المقيم ... لا نملك الا الحلم فهو حق مشروع للجميع ..
*****
هَرَدْتَ لهاتي بالغنوات ...
وقُتْ يبُردْ حَشَاك يا امِّي
من التّعب البلا صَالِحْ ..
تفيقي ..
تروقي ...
تنجمِّي
تسوِّي مكانسِكْ المطرة ..
تضوِّي البيت وتنحَمِّي
تمرقي صبوحة للجيران ...
قدح فوق ايد وفي ايد أَلمْي ...
** استخدمت الجزئية الاولي منها توقيعا لي ذات يوم
في ما اكتب وهي دندنتي التي تلازمني صباح مساء
هرد اللهات من اجل شيئ جميل ( برد الحشا للحبيبة الام )
عندما تجد نفسك تهتف وتجري وتكد واخيرا تجدهـ بلا صالح
السجن كبير هناك بمساحة تفوق السجون الاخريات اينما وليت
وجهك قابلك جدار وحرس وبندقية ..
***
يا بلدي يا فردة جناحي التاني وكت الناس
تطير لي عالما واوجعة الزول البيجيك
ما يلقي فيك غير الهجير
ناسا تواتي مسالما كل البشاشات القبيل
يلقاها ميتة مسمة
والجاتا جاتا من الأرض ما جاتا من تال السماء
ما أعتي غبنك يا ولد وأعدل قضيتك وأعظما
لا ترجع السيف الجفير والدنيا فايرة مصادمة ...
** ماذا تقول هنا وكل المساحات هجير .. والبشاشات والمسالمة
والبسمة البيضاء قد سرقت وقتلت ودفنت ؟؟
الزم الصمت وتحدث همسا ( وطني كيف حالك ) ...
***
وريني شن طعم الدروس
ما دام بكانا مشي قطر
وكيف ذاتا ترتاح النفوس
تقبل قرايتاً في سفر
يا يمة حان الامتحان
من وقتو بس فاضل شهر
ما اظنِي من جور الزمان
انجح واجيب ليكم نمر ..
**
حميد انسان الدهشة .. له من الاشعار والنصوص مالا يحصي
كتب عن حالنا وبكل صدق ..
له التحية والشكر الجميل ...

ولنختم بالزول السمح ... كسلا والتاكا والقاش
صاحب الضمير الابيض .. والكلمات الرصينة
***
إنت يا الأبيض ضميرك
صافي زي قلب الربيع
في كلامك وابتسامك
أندي من زهر الربيع
عشت متهيئ لحبك
كل أيامي وحنانها
ابتسامك عزيزة
بحرق الآهات عشانا ..
***
تلاقحت الكلمات هنا واللحن والاداء ونتج هجينا من الروعة
والجمال .. الطيب عبد الله .. المتفرد دوما .. لك ان تسترخي
وعلي اي وضعية كنت وتنصت فقط لتسمع وترتاح مع الابيض ضميرك ...
***
ياريت تعود أيامنا ...
نكمل المشوار ...
يا قلبي يا سواح ...
قول لي متين أرتاح ...
دمع الحنين عاودني ...
لقلبي السواح ...
*** وان هاجت بك الاشجان وغلبت عليك
انبش مخابئ ذاكرتك ان لم يصبها الخراب
واجعل لك في المستقبل امال وتمنيات لرجوع ايام خلت
وبقيت ذكراها في الوجدان ...
****
حبيت عشانك كسلا
خليت دياري عشانك ...
عشقت أرض التاكا ...
الشاربة من ريحانك ...
*** عند اللوعة ووجع العشق لاي كان
انسان او مكان في جغرافية الدنيا .. فقد اخصها الحلنقي
تلك كسلا .. بشيئ من الشعر والكلمة الصادقة فكسلا
هي ارض الجمال وحسن الطبيعة .. التاكا والقاش وغيرها
من الاماكن التي تسر الناظر وتشرح الخاطر ..
****
هجرة عصافير الخريف ...
في موسم الشوق الحلو ...
هيج رحيلها مع الغروب ...
إحساسي غلبني أتحملو ...
وكتمت أشواق الحنين ...
داير الدموع يتقلو ...
ورجع خليت الدموع ...
يرتاحو مني وينزلو ...
ليه يا عصافير الخريف ...
خضرة مشاعري أشيله صيف ...
*** وردي .. ومعني الفن الحقيقي في هذه الثنائية
الجميلة مع الحلنقي في عصافير الخريف ..
فنصها كافي ولا يحتاج لوقفة حتي لا يتشوهـ بمانكتب ..
والكثير جدا من الاغنيات التي غناها كبار الفنانين والشباب الحاليين ..
ولاننسي .. اسمعنا مرة التي غناها الراحل / خوجلي عثمان ..
واديني رضاك ... اسماعيل حسب الدائم ..
كل هذا علي سبيل المثال ...
فاللحلنقي اشعار رصينة وذات معاني وخالدة ..
فله التحية ...

وحتي لاتختلط الامور
وحتي ابعد نفسي من حكاية ( الناقل والمنقول )
اريد ان اوضح :
انّ كل المواضيع التي اشارك بها ( هنا )
تخص ( ود الضو ) , ومـُشارك بها في منتديات اخري عديدة ..
الكل يشاهد طريقة سرعتي في انزال المواضيع
فماهي الا بـ ( نسخ ) من تلك الجهات الي هنا ..
فهي تخصني وانا مسئول عنها امام الله ..
كتبت هذا فقط للتوضيح ..
واقعدوا عافيــة آآآآالزينين ..

سلامات ياودالضو ياخي
الكلام ده كلام جميل يا راجل .. وقيم .. وفيهو اجتهاد شخصي كبير لزول مرتب جداً

استمتعت حقيقي بكل كلمة وكل سيناريو وكل مشهد في السرد ده ..
ولا أدري هل فرغت من إنزال كامل السرد أم أن هنالك بقية .. لي مسببات في السؤال أولها رغبتي الأكيدة في أن تواصل في الكتابة.. هنالك الكثير في اعتقادي أنك تستطيع الكتابة في مداه فلك حصيلة لغوية شاسعة بالإضافة إلى الموهبة .. والثاني لأني حابي أدردش معاك شوية في السرد ده ..
متعك الله بالصحة والعافية أخي ودالضو وكن بالجوار

اقتباس:

---

المشاركة الأصلية كتبت بواسطة كاظم

سلامات ياودالضو ياخي
الكلام ده كلام جميل يا راجل .. وقيم .. وفيهو اجتهاد شخصي كبير لزول مرتب جداً

استمتعت حقيقي بكل كلمة وكل سيناريو وكل مشهد في السرد ده ..
ولا أدري هل فرغت من إنزال كامل السرد أم أن هنالك بقية .. لي مسببات في السؤال أولها رغبتي الأكيدة في أن تواصل في الكتابة.. هنالك الكثير في اعتقادي أنك تستطيع الكتابة في مداه فلك حصيلة لغوية شاسعة بالإضافة إلى الموهبة .. والثاني لأني حابي أدردش معاك شوية في السرد ده ..
متعك الله بالصحة والعافية أخي ودالضو وكن بالجوار

---

-----------------------
حباب الزول السمح كاظم
حبابك مليون آآآالحبيب
شكرا لهذه الكلمات في حقي
للبوست بقية وافرة ان شاء الله
بس انتوا اجدعوا معانا شوية جدعات فانتم اهل لها
سأكون حضورا هنا ان شاء الله , خليك قريب ..
ماتنسي تقعد عافية ..

مواصـــلة :
نفسي القاك وأكون انا كُلِّي من بعضك
اوبعضي من كُلِّك ( بدَن ) ..
..
( الكُل والبعض ) , يعني هسي زي الكلام دا بنشاف كلام عادي لكن وحاة الله ابداً ماهو عادي , دا غزل ورومانسية من النوع البطلع ( بصدق ) ولايوجد عند ( كل من هبّ ودبّ ) وقال ( أنا بحب ) , أزهري بكون كتب الكلام دا في لحظات ( صادقه ) كيف يعني صادقه ؟ مثلاً لو كان كتب في غرفه تأكّد بأن الغرفة دي مافيها الاّ نفس الزول دا براهـ ( لاثاني معه ) الا خياله وفي الحالة دي ( خياله يحسب بـ بعضاً من كله ) والاحتوائية دائماً تكون للكل , إذاً هناك تلقيح لكن تلقيح لشنو ؟ اقول ليك لشنو , تلقيح تام وواضح لـ ال 28 حرف للغة العربية ( حرف يلاقح حرف ) , ( والناتج يتلاقح مع الخيال ) , ويجي هجين زي دا ( نفسي ألقاك وأكون انا كلي من بعضك او بعضي من كلك بدن ) , للمتأمل هنا في هذا الكلام يجد كثيراً من الحب المكنون , وكثيراً من التميُّز , ومن اعطاء صفة التفرُّد , للزول الذي يخاطبه حين قال ( اكون كُلي من بعضك ) يعني انا لو كُلي اكون جزء بسيط من بعضك الذي هو جزء من كُلِّكْ ( رضيان ) او اكون بعضي من كُلِّكْ ( برضو رضيان ) .. تجي تقول لي انا ( قاعد أحب ) وكل ساعة في شارع النيل او الريفيرا , حروف بسيطة لكنها تجمع كم هائل من الجمال واحترام شيئ يدعي ( الحب ) ..

داير القاك وداير أبقاك وأوحِّدْ دورة الدم المقسّمه بيني بينك والشجــــــــــــــن ؟؟؟؟
..
هسي عليك الله لو ايِّ واحد خاطب نفسه بالكلام دا واعتبرهـ جائيه من زولاً بشوف فيه نفسه ( مرايه ) حيكون الناتج شنو ؟ كدي نمسك الحتة بتاعة ( أوحِّدْ دورة الدم ) دي , دا معناهـ شنو يعني ؟ دا جمع البعض عشان يبقي كُلْ , دورة دم واحدة بس ترُش قلب واحد ( لأثنين ) اندماج تام يعني ( دا فهمي ليها ) وماعندي ليها فهم غير الفهم دا , ياخي بدَل اي واحد عندهـ دورة دم براهـ ليه مانجي نعمل ليهن ( ميكسينق ) ونخليها دورة واحدة مدوِّرهـ عشان الرَّش والنبض يكون قوي ( ونبضة ليك والتانية لي ) , واصلاً قلوبنا كانت بتنبض لي بعض , وبتبكي لبعض , وبتحن لبعض , وبتموت زاتو لبعض .. ونفسي القاها ياخ وأوحِّد دورة دمي دي مع دورة دمها ..

أبداك مني ولا منك أبتديك محل محل , من ياتو منفذ أدخلك وكل المنافذ فيك سدّاها النحل , من ياتو شارع أوصلك وكل الدروب معطونه لي آخر الوحل ...
...

كدا نكون وصلنا لمرحلة غريقة غرق شديد , شوف حتة ( أبداك مني ) دي , يعني حافظها ( صـَمْ ) وعارف ليك كل تفاصيل الزولة دي وساكنه جوّاهـ , وفي شكل ( مشـَاورهـ ) قاليها هوي يابنيّه , ابداك مني ( زي ما انتِ قاعدة فيني ) , ولا ( منك ابتديك محل محل ) يعني ايِّ حاجة فيك ( كل ماتحتوين ) بدون فرز , ويكتمل الجمال حين يقول ( وكل المنافذ فيك سدّاها النحل ) , ( حناك زاتو ياخ ) , الكلام هنا بيقودنا لاحتمالين وكل كلام الزول الجميل الاسمه أزهري دا لو مادخلت مرحلة مابعد اللاوعي مابتفهمه زي ماقلنا قبيل , الاحتمال الاول هو : أيّ منفذ فيك قاعده حارساهـ ( نحله ) والشهد متدفق فيك منك , يعني الزولة دي ( تنقــِّطْ عسل ) نحل ( بـِكْر ) مش مغشوش , وهو في أحلي من العسل ياخ ؟ دا حتي النحل في أحلي منه ؟
اما الاحتمال التاني : ان هذا الازهري ماقادر يدخل في الزولة دي خوفاً من النحل , العامل حراسة مشدّدة لمنافذ الزولة المقصودة .. فالاحتمال الاول هو الارجح ..

أستبيح كل الحواجز وأدخلك .. من كلامك أدخلك .. من بين مساماتك أدخلك .. من ايِّ قاسم مشترك , ونتلاقي نهرين في تسامي وإنتشاء ..
...

شفت هنا زولك بدأ يتمرَّد تمرد واضح وضوحية شديدة , وقرر ( الاستباحة ) التامة لكل الحواجز بس داير يدخل ولاهاميهو ايِّ شيئ يحصل ( زي مايكون يكون ) و ( زي ماتجي تجي ) , ياخي والله دا كلام يخليك تضحك جنس ضحك ( مش ضحك تريقه ) زي تريقتي القاعد اعملها مع الهلالاب لا دا ضحك بمتعه وإنتشاء وتذوُّق في الكلام الطاعم دا .. ( من كلامك أدخلك ) دي كيف آآآأزهري ؟؟ يعني مع ( فتحة الخشم ) تقوم تدخل , ولا لما تسمع صوتها بتكون دخلت , ولا كيف وضـِّحْ ياخ ,, ( من بين مساماتك ادخلك ) , ماقلنا ليكم نحنا وصلنا الغريق ياخ , يعني الزول دا ( يتحلّل ) ويبقي زي الهناي وتوش يدخل من بين المسامات , وعشان مايكتـِّر معاها الكلام و ( يزعجها ) ويقلقلها قام رماها ليها فدْ مرّة ( من أيِّ قاسم مشترك ) بينـّا نحن الاتنين انا حأدخلك وكم من قاسم مشترك يتيح له الدخول ضـُحيً , نجي لنهاية المقطع دا ونشوف ختمه بشنو : ( ونتلاقي نهرين في تسامي وإنتشاء ) , والله جملة لاتستحق ان يتحدث بعدها أمثالي من ( المخرمجين ) واصحاب المشاققات البدون توقيت , بعد ماتب يدخل , يكون التلاقي كنهرين ( في تسامي وإنتشاء ) هو في إنتشاء احلي من الإنتشاء مع حروفك دي ياخ .. ادخل يازول من أيِّ حتة وخلينا ننتشي نحن زاتنا معاكم ...

وأبداك من حيث إنتهت عندك خواتم الإنتهاء ..
أبداك وأخلع زيف خيام عمري المضي ..
وألقاك مبسوطة اليدين مفتوحة ابواب الرضي ..
أبداك من لحظة آنستك وأخذت من قبسك هدي ..
أنا ظلمة زاهد في الدروب المابتجيبك ولابترجِّع ليَّ من تالاك صدي ..

ختـم حرفه وفنه وروعته ( متعه الله بالصحة والعافية ) ..
وبدأ متفاءلاً وأتي بالامنيات الرويانه ومابتعرف الفتر والنعاس او الخـَدَرْ , لو يلقي اليدين مبسوطة وابواب الرضي عندها مفتوحة كما شهيته لدخولها ولقاءها ...
أبداك من لحظة آنستك وأخذت من قبسك هـــدي ..
لك تحية بحجمك ايها الجميل , حرف متمرد بجمال مذاقه خاص يدخل الواحد منـّا غصباً ويقتحمه كيف يشاء ..

في الكثير من الأوقات أجدني أدندن بتلك الرائعة للعملاق محمد وردي ( وااأسفــاي ) , وكثيراً مابتُّ أستخدمها لمواقف بالجملة إن كانت مباشرة أو عن طريق المرئيات وما أكثرها , فعندما أسمع : منو البدور يساهر الليل ويسافر فوق جناح نجماً بعيد ضوَّاي , منو إذا وصفولو أرض الحور تلاقي قوافلو طول الليل تشق التيه تجر النـَّم مع الحردلو في الدوباي ..
وفي نفس اللحظة لو إفترضنا إفتراضاً أنّ تلك الجهة التي اسمع منها تلك الـ ( وا أسفاي ) بالغلط قامت دخلت واحدة من مطربات أو غنايات هذا العصر الفجيعة وأوصلت الي مسامعي ( تقوم بينا العربية تودينا للسادة ) أو يمة الزول انا يارب تجيب الزول , وإنت ماشي الي ان تصل الي طور ناس لندن ومنو كدا جبجبة وعوضية شمارات بكل تلك التفاهات الغنائية والعجن الآدائي المكوجن وهنّ يُسمعنك ( نيفا نيفا , و الحب وقع مني , و.....هلمجرا ) لن أجد ما أقوله مناسباً في تلك اللحظة غير واااأسفاي ثم وااا أسفاي مليونين مرّة .. فعندما يتحدث وردي عن مثل هذه الحالات الغنائية بكل صراحتة المعهودة يأتي من يقول بأنّ هذا الـ وردي زول ( طغيان ومتعجرف ) فأنـَّي لوردي ألاّ يتعجرف ويطغي علي مثل هذا الغناء وعلي هذا الزمان الذي لم يجد أن ينجب غير هؤلاء , وهو من غني للوطن وللحبيبة وللجمال بأروع الكلمات وجميل الالحان , وردي فنان مبدع حد الدهشة يجعلك تسافر عبر اغنياته شرقاً وغرباً ولن تجد غير ان تستمتع وتدخلت الراحة من كل فـج , يمكنك ان تمارس التسفار الي الوطن مع ( الطير المهاجر ) رائعة الجميل صلاح أحمد ابراهيم في زمناً خريفو منقط ونوارو شايل في جروف كسلا وحواشات الجزيرة ومخمسات كردفان ( بالله يالطير المهاجر للوطن زمن الخريف , تطير بسراع تطير ماتضيِّع زمن أوعك تقيف وتواصل الليل بالصباح تحت المطر وسط الرياح , وكان تعب منك جناح في السرعة زيد ) , ومن هناك لك أن تنادي علي الحبيبة ( بناديها ) من الدوش إنسان الدهشة والحرف الصريح ( بناديها وبعزم كل زول يرتاح علي ضحكة عيون فيها ) , ياجميلة ومستحيلة , والي تلك التي قد أضحت نديدة الزهر ( عمراً ) فكان لها من العشق نصيب وافر , بعد ان بلغت تلك الـ تسعتاشر سنة ( وفي تلك التاشرات ) يطيب المقام للشعراء وتأتيهم الاشعار ( بكراً ) , غني وردي للوطن ( يابلدي ياحبوب , ابو جلابية وتوب , سروال ومركوب , جبة وسديري سيف وسكين ) , وما اروع تلك الكلمات التي غناها وردي للجميل ( ابوقطاطي ) بتلك الدارجية السودانية السمحة ( سوات العاصفة بي ساق الشتيل النـَّي ) وفيها مايجعلك ان تمارس الاستمتاع بدهشة ( صعيب وصفك لانك هالة كلك ضيْ وفوقك هيبة واجمل قامة واسمح زي , جمالك في البنات معدوم شبيهك ماكَحَل عيني ( أقدلي وسكِّتي الخشـَّامة , وانزلي في العوازل كي ) , وردي قامة فنية تستحق الاحترام , فقد أمتعتنا ياوردي متعك الله بالصحة والعافية , ومازلنا نستمتع طرباً اصيلاً من تلك الاغنيات الخالدة , الحزن القديم , عصافير الخريف للحلنقي وعن ذاك الحلنقي يقف الحرف خجِلاً ( هجرة عصافير الخيف في موسم الشوق الحلو , هيّج رحيلا مع الغروب احساس غلبني اتحمّلو ) , وايضاً مع الحلنقي ( أغزّ الناس ) حبايبك نحنا , وتلك الجميلة ( أرحــل ) قلت ارحل اسوق خطواتي من زولاً نسي الالفة ( مامتأكد من شاعرها منو ) , ولذلك العملاق ابو آمنة حامد ( بين الريد والهوي ) , ومع الشريك اسماعيل حسن كان هناك كم هائل من الاغنيات الفريدة التي لاتحصي ولا تعد والغريب انها كلها مكتملة الجمال كيف لا فهي لم يتم إخراجها ( عبثاً ) ولا من اجل المادة بل هي لنا نحن كبشر لنستمتع ونرتاح عندها وتبقي موهّطة في دواخلنا الجوّانية ( ياسلام منك أنا آآه ياسلام ياسلام , العوازل قالوا ايه قالوا بيحب والله انتِ وبس انتِ في قلب المحب ) , وكثير من الاغنيات لذلك العملاق اسماعيل حسن كانت هي من أتتنا بوردي وبتنا نعشقه حد العشق مايقيف , ولكن ليكون لحن الختام مع زول الدهشة ( الدوش ) فحروفه تهب لك مرافئ آمنة للإنتكاية وقت تشاء ( الوُدْ )

أعيشهْا معاكَ لو تعْرف
دموع البهجَهْ والأفراح
أعيشهْا معاكَ واتأسّف
على الماضى اللّى ولَّىَ وراح
على الفُرْقَهْ الزمان طويل
على الصبر الّى عِشْنَاهو
مع طُول الألم والليل
زمان كُنّا بنَشيل الوُّد
ونَدِّى الوُّد
وفى عينينا كان أكْبَر
حناناً زاد
وفات الحدَ
زمان ما عِشْنَا فى غُرْبَهْ
ولا قاسينا نِتْوحّد
وهسَّع
رُحْنا نتْوجّع
نعيش بالحسرَهْ نتأسّف
على الماضى اللِّي ما بِرْجَع
أحبَّك
لا الزمن حوّلْنى عن حُبّك
ولا الحسرَهْ
وخوفي عليكَ يمْنَعْنى
وطول الإلفَهْ والعُشْرَهْ
وشوقي الليك طوَّل
لسّه معاي
ولى بُكْرَهْ ..

ود الضوء .. يا فنان ..

وكما قال صديقي .. كاظم .. يا خ ده كلام عجيب .. ونعم المبتدأ عطبرة

وولداً بتين بقى للسفر والدردرة وأصوات فتية عقد الجلاد وجوغة نشيد

حدود إبداعها السماء .. وعطبرة بذاكرة صبي وبتفاصيل غير كافية تحضرني

وأولى الخطوات نحو استهلالية التعليم والتعرف إلى الحرف تقودني ساقاي

اليافعة نواحي المدرسة الشرقية .. ثم أدلف عائداً لحي الموظفين وأنا

ملئ بالفرح وقد أكتحلت عيني لأول مرة بالآلات الموسيقية على الهواء

مباشرة .. بالمدرسة غُنا وموسيقى!! ومساء حيث المنزل مقابل للشئون

الدينية نسمع المحاضرات الدينية ونحن في باحة منزلنا .. والقطار

صفر وقف .. بهرتني صورة عطبرة .. ونقابة عمال السكة حديد وصافرة

الفطور والانضباط التنظيمي المترجم في كل سلوكهم .. وسيرة موسى متيو

وقريبي عبد الرحمن حمزة الذي ناضل من أجل سودان يسع الجميع ثم

أكتفى بالاعتكاف على نفسه وقصر حدود رؤاه لدرجة أنك لا تصدق أن هذا

هو العبد رحمن حمزة بذات لحمه وشحمه .. شفته كيف يا ود الضو هذه

العطبرة حينما تسكننا سيرتها ولقطارها في الذاكرة رحلات ماتعة ونحن

نتسابق لحجز شباك القمرة في قطر كريمة فندخل الخرطوم على ظهر قطارنا

وكأننا غازون لها فاتحون نحس بالكبرياء في حضرتها من دون خلق الله بها

وتستصغرهم لأننا ولجناها صبحاً على ظهر هذا العملاق فمن مثلنا .. وفي

عمق صحراء نجد نقرشة على نورمل جيتار أصر على أن أتعلمه لأهزم به هذا

التحور غير المتوقع وأبو السيد التشكيلي الحريف ابن عطبرة بذات حرفنته

في اللون يجيد العزف على الأوتار فيجتهد معي فتميل نفسي الأمارة بالفن

إلى اتجاه اللون فنرسم ما شاء لليل أن يحتمل .. ثم يخرج من حقيبته

العجيبة شريط كاسيت لذاك الفتى ذا الحنجرة الندية خوجلي هاشم ويمده

لي قائلاً يا سوباوي أسمع الزول ده ياخ وأديني رايك وبالمناسبة كنت

عازف الركوردين في فرقته .. وإلى يوم أمس آخر ما سمعته من طرب كان

لهذا الخوجلي .. وشكلك يا ود الضوء ستقودني في هذا الخيط لدروب

عجيبة واليوم سبت ياخ وأنت أدرى ..

تعرف يا ود الضوء وبرغم اختلافي في تفاصيل كثيرة مع حسين خوجلي إلا أنني

استمتع حد المتعة بتواشيح نهره الخالد ولسبب ما أحسست بذات المتعة وأنا

أتجول في هذا الجمال الذي نثرته يداك هنا ..

يا سلام عليك يا ود الضو ياخ حسين با زرعة وعثمان حسين مرة وحدة غايتو

بطريقتك دي بتقتل ليك زول في البوست ده .. ياخ بازرعة ده سيرة إبداعية

تقرأ من جميع الاتجاهات .. وما يعجبني فيه يا ود الضو تلك الشفرات التي

يودعها كمحطات للتوقف في معظم نصوصه يعني مثلاً زي (قصتنا)

شوف وكل الطيبات دي راميها وين ..

بالمعزه بالمودة البينا بي اغلى الصلات

بالهوى العيشناهو بي اعصابنا خمسه سنين ومات

بالعذاب الشفتو والسر الكتمتو

وباقي الطيبات

أنت صحي حكاية الخمسة سنين مع الحب دي سرها شنو ..

صلاح أحمد إبراهيم .. إنا لله من هكذا إبداع تراشقنا به هنا

يا ود الضو فهذا الصلاح سيرة لا قبل لنا بها ..

لكما حضرني إبداع العملاق يا ود الضوء أجد أمامي هذا المنظر

البديع لوصف النيل ووصيته لذاك الطائر ..

وفوت بلاد وسيب بلاد وان جيت بلاد تلقي فيها النيل بيلمع

في الظلام زي سيف مجوهر بالنجوم من غير نظام ..

تنزل هناك وتحيي ياطير باحترام .. وتقول سلام وتعيد سلام ..

علي نيل بلادنا وشباب بلادنا ونخيل بلادنا ...

وبعدها طوالي وبدون أي فواصل بلقى روحي سمعت لروحي حكاية مرية

بتمام جمالها ومناقب سحرها وبتتحكر في خيالي هيلين اليونانية

الخطيرة وأقرب أبوسها في رأسها وأقول ليها شكراً لأجل أنك جعلتي

هذا الفنان يخرج لنا لوحة أسوح معها ثم أعود إلى وعي متسبحناً

ومتحوقلاً فتمسخ علي كل الحروف والبنات والسمحات شفته كيف ..

يامريّه:

ليت لي ازْميل((فدياس)) وروحاً عبقرية

وأمامى تل ُ مرمر

لنحتُ الفتنة الهوجاء في نفس مقاييسك

تمثالاً مُكبر

وجعلت الشعر كالشلال : بعضُُ يلزم الكتف

وبعض يتبعثر

وعلى الأهداب ليلاً لا يُفسر

وعلى الخدين نوراً يتكسر

وعلى الأسنان سُكر

وفماً كالأسد الجوعان زمجر

يرسل الهمس به لحنا معطر

وينادى شفة عطشى وأخرى تتحسر

وعلى الصدر نوافير جحيم تتفجر

وحزاماً في مضيقٍ ، كلما قلتُ قصيرُُ هو،

كان الخصر أصغر

يا مريه

ليت لي إزميل ))فدياس)) وروحاً عبقرية

كنت أبدعتك يا ربة حسنى بيديَّ

يا مريه

ليتني في قمَّةِ ((الأولمب)) جالس

وحواليَّ العرائيس

وأنا في ذُروة الإلهام بين المُلهماتْ

أحتسي خمرةَ ))باخُوس)) النقيَّة

فإذا ما سرتْ النّشْوةُ فيَّ

أتداعى ، وأُنادى : يا بنات

نقٍّّروا القيثار في رفقٍ وهاتوا الأغنياتْ

لمريه

يا مريه

ما لعشرينين باتت في سعير تتقلب

ترتدى ثوب عزوف وهي في الخفية ترغب

وبصدرينا )) بروميثيوس)) في الصخرة مشدوداً يعذب

فبجسم الف نار وبجسم الف عقرب

أنتِ يا هيلينُ

يا من عبرت تلقاءها بحر عروقي ألفُ مركبْ

يا عيوناً كالينابيعِ صفاءْ…ونداوة

وشفاهاً كالعناقيدِ امتلاءْ…وحلاوة

وخُدوداً مثل أحلامي ضِياءْ ….وجمالا

وقواماً يتثنّى كبرياءْ…واخْتيِالا

ودَماً ضجَّتْ به كلُّ الشرايينِ اشتهاءْ..يا صبيَّة

تَصْطلي منهُ صباحاً ومساءْ….غجريَّة

يا مريّه

أنا من إفريقيا صحرائها الكبرى وخطِّ الإستواءْ

شحنتْني بالحراراتِ الشُموسْ

وشوتني كالقرابينِ على نارِ المجُوسْ

لفحتني فأنا منها كعودِ الأبنوسْ

و أنا منْجمُ كبْريت سريعِ الإشتعالْ

يتلظَّى كلًّما اشتمّ على بُعدٍ :((تعالى))

يا مريه:

أنا من إفريقيا جوْعانُ كالطِّفلِ الصَّغيرْ

و أنا أهْفو إلى تُفاحة حمراء من يقربها يصبح مذنب

فهلُمي ودعي الآلهةَ الحمقاءَ تغضبْ

وانْبئيها أنها لم تحترم رغبة نفسٍ بشرية

أيُّ فردوسٍ بغيرِ الحبِّ كالصَّحراءِ مُجدبْ

يا مريه

وغداً تنفخُ في أشرِعتي أنفاسُ فُرْقة

و أنا أزدادُ نأياً مثْل ((يوليوس)) وفي الأعماق حرقة

رُبما لا نلتقي ثانيةً

يا ….مريه

فتعالى وقّعي أسمك بالنار هُنا في شفتي

ووداعاً يا مرية مريه

مررت يا ود الضوء بكل هذا السحر الذي أقمته هنا أنهم محطات

يا صديقي لا يمكن تجاوزها

مدني يوسف النخلي وأوجاعه .. الدوش وأشجانه وحنينه..

يا سلام يا ود الضو ياخ ..

أما .. محمد الحسن سالم حميد .. ومصابيح سمائه الثامنه ..

والذي دس فيك كل هذا الجمال يا ود الضو

فإن هذا النص تحفة وحكاية ما أظنها تتكرر قريب ياخ معقول ..

في أبها وأنضر وأقوى من طاقة العريس ليلة عرسه يعني لما يقول ..

تبقى الشوارع أوردة

وجسد البلد عافية عريس

وال المغيب يا ود الضو والشفق أنه الفن بتمامه لا قبله لا بعده ..

وذلك الملاك يرسم وينفض ريشته فحصل ما حصل ..

شفق المغيب

قفا غيم بِهِت

كان نفضة الريشة الأخيرة

حَمَاره .. فوق لُوحةْ الوكت

يَا كرْكُدَايْةَ الله

إترشق ناقع عصيره

من إيد ملاك

فوق المغارب بي تحت ..

الجميل ود الضو .. ياخ معليش لكل هذه الخرمجة وزي ما قال صديقي

وشقيقي في الحبر كاظم ..أنت انتهيت ولا لسه .. أكتب يا صاحبي على

هذا الخيط أنه للقراءة فقط حتى لا أفتله لك يمثل ما فعلت عاليه ..

يا كاظم يا خ مشتاقين ومستني دردشتك مع ود الضو على أحر من الجمر..

مؤكد تحياتي ومحبتي للجميع،،،

اقتباس:

---

المشاركة الأصلية كتبت بواسطة سوباوي

مررت يا ود الضوء بكل هذا السحر الذي أقمته هنا أنهم محطات

يا صديقي لا يمكن تجاوزها

مدني يوسف النخلي وأوجاعه .. الدوش وأشجانه وحنينه..

يا سلام يا ود الضو ياخ ..

أما .. محمد الحسن سالم حميد .. ومصابيح سمائه الثامنه ..

والذي دس فيك كل هذا الجمال يا ود الضو

فإن هذا النص تحفة وحكاية ما أظنها تتكرر قريب ياخ معقول ..

في أبها وأنضر وأقوى من طاقة العريس ليلة عرسه يعني لما يقول ..

تبقى الشوارع أوردة

وجسد البلد عافية عريس

وال المغيب يا ود الضو والشفق أنه الفن بتمامه لا قبله لا بعده ..

وذلك الملاك يرسم وينفض ريشته فحصل ما حصل ..

شفق المغيب

قفا غيم بِهِت

كان نفضة الريشة الأخيرة

حَمَاره .. فوق لُوحةْ الوكت

يَا كرْكُدَايْةَ الله

إترشق ناقع عصيره

من إيد ملاك

فوق المغارب بي تحت ..

الجميل ود الضو .. ياخ معليش لكل هذه الخرمجة وزي ما قال صديقي

وشقيقي في الحبر كاظم ..أنت انتهيت ولا لسه .. أكتب يا صاحبي على

هذا الخيط أنه للقراءة فقط حتى لا أفتله لك يمثل ما فعلت عاليه ..

يا كاظم يا خ مشتاقين ومستني دردشتك مع ود الضو على أحر من الجمر..

مؤكد تحياتي ومحبتي للجميع،،،

---

كيف قيلت آآود الضو
ياخي بستأذنك أسلم على سوباوي ... ووووين يا سوباوي ياخي والله مشتاقين ياخ وانتظرتك هناك مع محمد الجزولي لكن الظاهر عليك كنت مضيوف .. عموماً نورت المكان والبركة في ودالضو ناصب ليهو (شرك حروف) وأهو صيدو ما طلع ناجع وخليك قريب ياخ
شكرا يا ودالضو وراجع ليك في كم حتة كده واجعاني في الكلام في ده

مودتي يا شباب

ود الضو
كاظم
سوباوي
يا الله .. يا الله
عمالقة الحرف هنا
يا لجمالكم .....
ساعود حالما تنقشع سحابة الدهشة التي اظلتني
وحالما استوعب كل هذا الجمال الذي سكبة الرائع ود الضو حرفا هنا
تحياتي لكم ود الضو ... كاظم ... سوباوي

اقتباس:

---

المشاركة الأصلية كتبت بواسطة سوباوي

وشكلك يا ود الضوء ستقودني في هذا الخيط لدروب

عجيبة واليوم سبت ياخ وأنت أدرى ..

---

---------------------------
سوباوي
هاك السلام بالكوم
( دا أول شيئ )
تاني شيئ
علي الجزيمة انا وصلت مرحلة بتاعة اندهاش ( لامحدودة )
وانا اقرأ تلك الحروف منك يا سوباوي
دحين يا اخوي :
تعال خلينا نصنقر في البوست دا
باقيلك العبد لله ( مكتول هوي تلك الـ عطبرة ) ومعها اخريات من تلك المدن
التي تسكنني رغم كل هذه المسافات ..
مشاققة :
اقولها ليك بالواضح ياحبيبنا :
داير اسوقك لدروب عجيبة
وما احلاها من دروب ونحن نسيرها علي حرفك ..
راجيك هووووي لاتطوِّل الغيبة ..

اقتباس:

---

المشاركة الأصلية كتبت بواسطة سوباوي

تعرف يا ود الضوء وبرغم اختلافي في تفاصيل كثيرة مع حسين خوجلي إلا أنني

استمتع حد المتعة بتواشيح نهره الخالد ولسبب ما أحسست بذات المتعة وأنا

أتجول في هذا الجمال الذي نثرته يداك هنا ..

يا سلام عليك يا ود الضو ياخ حسين با زرعة وعثمان حسين مرة وحدة غايتو

بطريقتك دي بتقتل ليك زول في البوست ده .. ياخ بازرعة ده سيرة إبداعية

تقرأ من جميع الاتجاهات .. وما يعجبني فيه يا ود الضو تلك الشفرات التي

يودعها كمحطات للتوقف في معظم نصوصه يعني مثلاً زي (قصتنا)

شوف وكل الطيبات دي راميها وين ..


يامريّه:

ليت لي ازْميل((فدياس)) وروحاً عبقرية

وأمامى تل ُ مرمر

لنحتُ الفتنة الهوجاء في نفس مقاييسك

تمثالاً مُكبر

وجعلت الشعر كالشلال : بعضُُ يلزم الكتف

وبعض يتبعثر

وعلى الأهداب ليلاً لا يُفسر

وعلى الخدين نوراً يتكسر

وعلى الأسنان سُكر

وفماً كالأسد الجوعان زمجر

يرسل الهمس به لحنا معطر

وينادى شفة عطشى وأخرى تتحسر

وعلى الصدر نوافير جحيم تتفجر

وحزاماً في مضيقٍ ، كلما قلتُ قصيرُُ هو،

كان الخصر أصغر

يا مريه

ليت لي إزميل ))فدياس)) وروحاً عبقرية

كنت أبدعتك يا ربة حسنى بيديَّ

يا مريه

ليتني في قمَّةِ ((الأولمب)) جالس

وحواليَّ العرائيس

وأنا في ذُروة الإلهام بين المُلهماتْ

أحتسي خمرةَ ))باخُوس)) النقيَّة

فإذا ما سرتْ النّشْوةُ فيَّ

أتداعى ، وأُنادى : يا بنات

نقٍّّروا القيثار في رفقٍ وهاتوا الأغنياتْ

لمريه

يا مريه

ما لعشرينين باتت في سعير تتقلب

ترتدى ثوب عزوف وهي في الخفية ترغب

وبصدرينا )) بروميثيوس)) في الصخرة مشدوداً يعذب

فبجسم الف نار وبجسم الف عقرب

أنتِ يا هيلينُ

يا من عبرت تلقاءها بحر عروقي ألفُ مركبْ

يا عيوناً كالينابيعِ صفاءْ…ونداوة

وشفاهاً كالعناقيدِ امتلاءْ…وحلاوة

وخُدوداً مثل أحلامي ضِياءْ ….وجمالا

وقواماً يتثنّى كبرياءْ…واخْتيِالا

ودَماً ضجَّتْ به كلُّ الشرايينِ اشتهاءْ..يا صبيَّة

تَصْطلي منهُ صباحاً ومساءْ….غجريَّة

يا مريّه

أنا من إفريقيا صحرائها الكبرى وخطِّ الإستواءْ

شحنتْني بالحراراتِ الشُموسْ

وشوتني كالقرابينِ على نارِ المجُوسْ

لفحتني فأنا منها كعودِ الأبنوسْ

و أنا منْجمُ كبْريت سريعِ الإشتعالْ

يتلظَّى كلًّما اشتمّ على بُعدٍ :((تعالى))

يا مريه:

أنا من إفريقيا جوْعانُ كالطِّفلِ الصَّغيرْ

و أنا أهْفو إلى تُفاحة حمراء من يقربها يصبح مذنب

فهلُمي ودعي الآلهةَ الحمقاءَ تغضبْ

وانْبئيها أنها لم تحترم رغبة نفسٍ بشرية

أيُّ فردوسٍ بغيرِ الحبِّ كالصَّحراءِ مُجدبْ

يا مريه

وغداً تنفخُ في أشرِعتي أنفاسُ فُرْقة

و أنا أزدادُ نأياً مثْل ((يوليوس)) وفي الأعماق حرقة

رُبما لا نلتقي ثانيةً

يا ….مريه

فتعالى وقّعي أسمك بالنار هُنا في شفتي

ووداعاً يا مرية مريه

---

------------------------
مالك علينا ياسوباوي ؟ مالك ياخ بتهابش
في الحاجات البتخلي جروحنا تتاورنا من تاني وتلتمية زاتو
شوف يا انيق البتاعة دي ماتجدعها لي هنا وتمش تخليها لي مقفولة كدا
دحين تعال فرتقها آآآآآالحبيب
آآآي تعال فرتق لينا تلك الـ مرية ..
اما عن عثمان حسين ( خليني اتكلم وانا ساكت ياخ )
بتقوم هسي تجيب لي ( عُشرة الايام ) لذلك الرائع عوض احمد خليفة
وبتخلينا نجعـِّر
هنا في البوست دا ..

اقتباس:

---

المشاركة الأصلية كتبت بواسطة سوباوي

الجميل ود الضو .. ياخ معليش لكل هذه الخرمجة وزي ما قال صديقي

وشقيقي في الحبر كاظم ..أنت انتهيت ولا لسه .. أكتب يا صاحبي على

هذا الخيط أنه للقراءة فقط حتى لا أفتله لك يمثل ما فعلت عاليه ..

يا كاظم يا خ مشتاقين ومستني دردشتك مع ود الضو على أحر من الجمر..

مؤكد تحياتي ومحبتي للجميع،،،

---

-----------------------
شوف قال شنو ( خرمجة )
يارااااااااااااااااااجل
علي الجزيمة انا استمتعت بمشاركاتك دي متعة ماتتوصف
وبعدين اقول ليك حاجة مش انت قلت دي خرمجة
اها انا ح اقول ليك :
تعال واصل خرمجتك آآآآآخوي
عليك دينك في خرمجة احلي من كدا
تعال انت والحبيب كاظم وانا معكم
تعالوا نمشي في هذه الدروب
( علـَّنا نستريح قليلاً )
راجيكم آآآآالزينين ..
شكرا بقدر هذا الجمال الذي صببته انت هنا ياسوباوي ..
راااااجيك
وحات الله راجيك تجي صاد من تاني ..

كيف قيلت آآود الضو
.. حبابك مليون ,,
ياخي بستأذنك أسلم على سوباوي ...
.. سلم عليهو وبعد ماتسلم عليهو ( سلم لي عليهو برضو ) وأديهو مني وصية
قوليه ( لاتبعد عن هذا البوست ) فهو يحتاجكم ..
شكرا يا ودالضو وراجع ليك في كم حتة كده واجعاني في الكلام في ده
.. راجيك , وحات النبي راجيك ياخ
تعال أخد ليك سندة وشوية مشاققة
شكرا يافخيم ..