شيئُُ من هــــاتيك .. العيـــــــون ..

وجعلتُ من عينيكِ خَيمـةَ مُهْجَتـي
وأَضَـأتُ كـلَّ َمجاهِلـي بِسَـنـاك
**
كم كنتُ أخشى عومَ شُطآنِ الهوَى!.
وببحرِ عينِـك غُصْـتُ كالأسمـاك
**
مَن قال لَحْظُ العينِ سهـمٌ جـارحٌ؟
أيكونُ مَـرْجُ الـوردِ كالأشـواكِ؟!
***
لحظُ العيون جَنـاحُ طيـرٍ سابِـحٍ
حَضَنَ الفـؤادَ وهـامَ فـي دنيـاك
**
استوقفني هذا الكلام وهو يحكي عن تلك ( العيون )
ان لم ابالغ اغلب الشعراء قد كتبوا عن العيون وجمالها
وسحرها .. وكم هي آسرة حتي اعطيت لها لغة غير التي
نعرفها ونتعامل بها ( لغة العيون ) ..
وتعطلت لغة الكلام وخاطبت عيني في لغة الهوي عيناك ..
اذن يمكن للعيون المخاطبة وهي بلا شك لذيذة ومعبرة وذات
دلائل واضحة ( وما اجملها عند الانثي تلك اللغة العينية ) ..
الشعراء السودانيين ( بكايين للطيش ) .. نقطة ضعفهم احسب انها في العيون
منذ شعر الحقيبة حتي يومنا هذا .. كلهم تغزلوا في العيون ووصفوها
وأتو لها بتشبيهات جملة في غاية الجمال ..
.....
دعوة للغوص في ماكُتب عن العيون وجمالها ..

لنقف عند الرائع دوما شاعرنا ود الرضي
ووصفه للعيون حين قال :
بوبح المبروم وإنصقل
حاكي ظبي الريل الوقل
ياسلام هاتيك المقل
مارآهن عاقل عقل ..
***
ماهي نتيجة ان تنظر الي تلك المقل ؟؟
وانت بكامل عقلك وما ان تقع عيناك علي تلك
العيون .. ودِّع عقلك ..
شيئ من المبالغة اللذيذة
احسب هذا في كلام ود الرضي ..

بوست ح يكون قمة في الجمال
طالما يتحدث عن العيون


---------
تسلم ود الضو

ولو تأملنا بعضاً من كلمات اغنية ( نعيم الدنيا ) التي غناها الراحل ابو داؤود
نجد فيها العيون :
* سيوف الهند من لحظات عينك
ليش بيها تصيبني إيش بيني وبينك
..
فاذا كانت تلك العيون لحظها كسيوف الهند
بالتاكيد اصابتها لن تبري وان حصل
سيكون لها التاثير والجرح ( البتاور سيدو )
* وفي جسمي المنحول ياتيك بذكر الطرف الغفول المتناعس
( هو في احلي من كدا ؟؟ )
.. طرفو غفول أحور متناعس وطرفي صحي
تشوف في قوامو المامثقول
الظلمة شعور والقمرة محي ..

[QUOTE=مدنيّة;631167][COLOR="red"]بوست ح يكون قمة في الجمال
طالما يتحدث عن العيون
-----------------------------------
يسعد مساءاتك اختي مدنية
العيون وماادراك
....
عيون حبيبي
ديار ساحاتا حنَّية
رسالة من الروح
أنشودة صوفية
حكاية للأطفال أو رقصة زنجية
بيتين من الدوبيت
في ليلة صيفية

ولو مشينا للكبير الشاعر ابو آمنة حامد
في تلك الرائعة التي غناها / احمد الجابري : مانسيناك
حين قال :
الرهيف قلبو بيعيش في شكـُو اكتر من يقينو
تستبيهو نظرة جارحة وتحترق بالحب سنينو
قلبو عائش في العيون الشاربه من حبو وحنينو
ماكفاه العذاب الهو فيهو
ليه تزيد آلامو اكتر ..
**
ياسلام قمة الروعة شعرا وآداءا
تستبيهو نظرة جارحة .. غايتو جنس وصيف ..
دا كلو هين وعادي نقول ..
لكن الماعادي شنو ؟
عيشة القلب في تلك العيون
( الشاربة من حبو وحنينو )

* عيونك كانو في عيوني
( عبد المنعم حسيب .. آداء )
* ناعسات كاحلات .... ( حقيبة )
* ولاطرفك من طبعو نعسان ... ( حقيبة )
* وقلت ليها الحقيقة الضائعة بين قلبي وعيونك
اني لاقادر افوتك لا اجيك .. ( صلاح حاج سعيد )
* عينيك وحاتك غربتي واهلي وبلادي الفيها ضائع لي زمن ..
( صلاح حاج سعيد )
* في عيونك ضجة الشوق والهواجس ريحة الموج البنحلم فوقو بي جية النوارس ..
( ابوذر الغفاري )
* تلوح لي مدن عينيك وترفع لي منارة بسمتك سارية ..
( عبد القادر الكتيابي )
* ياعيونك يامدائن الفرحة والحب والجسارة
( صلاح حاج سعيد )
* عينيك حس اطفال بنادوا القمراء للغائب يعود ..
( ايضا صلاح حاج سعيد )
* عينيك تصاوير المني
عينيك وطن مشدود
عينيك سفر
عينيك لو معاي الاصعبة
عينيك لو اعرف ختام الاغنية
( صلاح حاج سعيد ) مكسر العيون ..
والكثير جدا ماكتب عن العيون وجمالها ...

لها مقلةٌ لو أنها نظرت بها إلى راهبٍ قد صام لله وابتهل
لأصبح مفتوناً معنىّ بحبها كأنْ لم يصُمْ لله يوماً ولم يصلْ

-----------------
بالغت عديل يا امرؤ القيس

والعيون زي جدي الغزال واسعي تتحدي موانسه
والرموش الفوق فاترات للتحت دايري تلامسه
شوقن انو يقالدن بعض, والوصال بيناتن قسي
ومابيطيب القلب ان وقع بين رموش عينين ناعسه
---------------

(فادنُ منّي وخذ إليك حناني
ثم
أغمض عينيك حتى تراني)
-------------
؟؟؟؟؟؟؟؟؟؟؟؟؟؟؟؟؟؟؟؟

انا والعيون ضمانا كون
احلا الكلام لغة العيون
اقواس قزح تمطر فرح تسكر
شعور تطفي الشجون
همسات دلال فيها ابتهاج
تهدي الخيال اروع فنون
مهما الخيال يبدع جمال
يرسم ظلال حول الجفون
انا ارجع اقول يا احلا زول
احلا الكلام لغة العيون
سرحن بعيد عزفن نشيد
خلن عقول ترقص تدور
خفقات كمان يرشق حنان
ورنة رباب بين الزهور
نفحات حروف ياسمين تطوف
ورحلة عبير في ليل عطور
ومهما االخيال يبدع جمال
ويرسم صور من كل لون
انا ارجع اقول يا اعز زول
الطف كلام لغة العيون
شفت يا الحبيب ود الضو محمد يوسف موسى ده خطير كيف
انا والعيون ضمانا كون
واي كون
اقواس قزح تمطر فرح
و همسات دلال فيها ابتهاج
تهدي الخيال اروع فنون
غايتو يا ود الضو شكلي كده ح اقيل في البوست بتاعك ده
منتظرنك دوما يا جميل

[QUOTE=محمد الجزولى;631353][SIZE="5"][COLOR="blue"][CENTER]
شفت يا الحبيب ود الضو محمد يوسف موسى ده خطير كيف
انا والعيون ضمانا كون
واي كون
اقواس قزح تمطر فرح
و همسات دلال فيها ابتهاج
تهدي الخيال اروع فنون
غايتو يا ود الضو شكلي كده ح اقيل في البوست بتاعك ده
منتظرنك دوما يا جميل
------------------------
محمد الجزولي
لك التحية
محمد يوسف موسي شاعر جميل بالحيل
واغلبهم شعراء السودان قد مروا شعراً بتلك العيون
مشاققة :
يازول قيِّل ولو بتساهر برضو تعال ساهر
هو في احلي من المقيلة مع العيون ؟؟
دمت بخير ..

قمة الاستمتاع معك فى رحلة العيون اخى ود الضو

اقتباس:

---

المشاركة الأصلية كتبت بواسطة ياسر عمر الأمين

قمة الاستمتاع معك فى رحلة العيون اخى ود الضو

---

------------------
ياسر اخوي
باقيلك العيون الكلام فيها بيحلو حلا شديدة
هم الشعراء ياخ قصّروا
والله ماخلوا لينا فرقة زاتو نشاقق فيها
..................
شوف دا قال شنو :
علَّمي عيوني السفر
المسافر في عيونك سكَّتو بتبقي السّلامه ..
لك التحية يا ياسر عمر

قال الشاعر امل دنقل
عيناك لحظتا شروق
أرشف قهوتي الصباحية من بنهما المحروق
وأقرأ الطالع
وفي سكون المغرب الوادع
عيناك يا حبيبتي شجيرتا برقوق
تجلس الشمس في ظلهما ...
عليك الله يا ود الضو دنقل ده ما بالغ
يعني شوف التشبية العجيب ده
لحظة الشروق بكل صفائها وخدرها .. لحظات تتمني ان تطول لتستمتع بسحرها الانيق
وتخيل بس لما ( تتقرفص ) الشمس بكل عزتها وقوتها بين تلك العيون المكتحلة بلون البن
ود الضو .. وينك انت ياخ ... تعال زدنا من كلام العيون السمح ده

[QUOTE=محمد الجزولى;632235][SIZE="5"][COLOR="blue"][CENTER]
قال الشاعر امل دنقل
عيناك لحظتا شروق
أرشف قهوتي الصباحية من بنهما المحروق
وأقرأ الطالع
وفي سكون المغرب الوادع
عيناك يا حبيبتي شجيرتا برقوق
تجلس الشمس في ظلهما ...
------------------------------------
صباح الخير ياوريف
ياخي دا كلام يجبرك تقيف عنده و يجبرك ( تعيشه )
( أرتشف قهوتي الصباحية من بنهما المحروق وأقرأ الطالع )
ديشااااااك
لك التحية يامحمد الجزولي
ولي عودة الي هنا ان شاء الله ..

ود الضو صباحك نور ..
عيونك زي سحابة صيف تجافي بلاد وتسقي بلاد
وزى كلماتا بتتاوه تتوه لمن يجي الميعاد
وزي فرحا يشيل مني الشقا ويزداد
وزي عيدا غشاني وفات عم البلد اعياد
وزي وطنا وقت اشتاقلو برحل لية من غير زاد
بدون عينيك بصبح زول بدون ذكري وبدون ميلاد

[QUOTE=ريمون;632259][B][SIZE="5"][COLOR="indigo"]ود الضو صباحك نور ..
عيونك زي سحابة صيف تجافي بلاد وتسقي بلاد
---------------------------
حباب ريمون
يسعد نهاراتك
كم هو جميل : التجاني سعيد
أطرب لها كثيراً عندما اسمع مصطفي يغنيها
التحيه للقامه وردي
ولك انتِ ياريمون

-----------------------
عيونك زي عقود الماس زي موجاً يفيض طربان
وتسبح في بحار الحب زي عاشق فريد ولهان

معقول يفوتني كل هذا الجمال


تسلم عيونك يا ود الضو

والشاعر الأشهر بالكتابة عشقا و ولعا بالعيون هو الشاعر الأستاذ / عبدالله

النجيب و الذي لقب بشاعر العيون , وقد سأل الأستاذ عن هذا اللقب فقال :

لماذا لقبت بشاعر العيون؟

- لأن العيون تمثل رسالة الجمال في عالم الحياة، وهي اتكاءة الحب على سطح الحياة، وهي التي ترسي الأنوار وتفسر الأسرار وترى الليل والشمس والقمر والوجوه المشرقة، وهذا اللقب بدأ في الشارع إلى أن ذهب للصحف والمجلات وأجهزة الدولة الرسمية، وعندما كنت أذهب إلى القاهرة يقولون شاعر العيون في القاهرة.


ومن أجمل ما كتب عبد الله النجيب في العيون

عيونك كانو في عيوني

أحلى الكلام لغة العيون

صدقت العيون

[QUOTE=مصطفى هاتريك;632453][COLOR="blue"][B]

تسلم عيونك يا ود الضو
----------------------
تسلم عيونك انت دا
الجمال جانا معاك يامصطفي
يدك معانا ..

[QUOTE=مصطفى هاتريك;632461][COLOR="blue"][SIZE="5"][FONT="Arial"]


لماذا لقبت بشاعر العيون؟

- لأن العيون تمثل رسالة الجمال في عالم الحياة، وهي اتكاءة الحب على سطح الحياة، وهي التي ترسي الأنوار وتفسر الأسرار وترى الليل والشمس والقمر والوجوه المشرقة،
------------------------
وكفــــي ..
حقاً كلام لايحتاج الي اضافة ..

اقتباس:

---

المشاركة الأصلية كتبت بواسطة ود الضو

( هو في احلي من كدا ؟؟ )

---

لا والله ما في احلي من كدة

جمعت لنا كل الجمال في بوست واحد

عمل جميل وجهد مقدر يا ود الضو

أستمتعت جدا بتصفح كل البوست وحتي التعليقات

فهو بوست متكامل كانت العيون هي ملكته وانقي ثماره

تقبل تحياتي واعجابي بهذا البوست

وامنياتي بالتوفيق دوما

اقتباس:

---

المشاركة الأصلية كتبت بواسطة تغريد

تقبل تحياتي واعجابي بهذا البوست

وامنياتي بالتوفيق دوما

---

-----------------------
لك التحية الاخت تغريد
شكراً علي المرور والاعجاب
دمتِ بالف خير ..