من قال ان الحمار والغنماية أغبياء
سيداتي انساتي سادتي 000 كلمة حق وانصاف في حقهم
شئ محير جداً كان انا غلطان قولي لي عووووك
أولاً : من الذي قال ان الحمار غبي ! ولماذا؟ وكيف؟ وعشان شنو انا شخصيا بعتبروا من اذكى الحيوانات واطيبها وانفعها للانسان تخيلوا الخدمة الكبيرة التي يقوم بها الحمار في المزارع والحقول وفي نقل الموية واحيانا كارو واحيانا رملة وبتاع اللبن وبتاع الخضار و و و وفي خلال يوم ولا اثنين يتعود على هذا العمل ويتقنه احسن اتقان يعني المزارع من الصباح بخت فيهو البردعة وبمجرد ان يركب عليه اتوماتيك على الحواشة وبالعكس في الرجعة ينزل صاحبه وعلى بيته عدل بانتظار الاكل ، كذلك حمار بتاع اللبن يقيف عند كل بيت اتوماتيك بصراحة يا جماعة الكلام دة مش كتير منو ( والله في احياناً كتيرة بكون ذو نفع وفايدة ونشاط احسن من البني ادم) ، وين الغباء هنا ؟؟ّّّ!!
ثانياً : الغنماية : لا ارى انها غبية او ( طيرة) ذي ما بنعتونها فهي مخلوق طيب وودود وتمنحنا لبن خالصا سائغاً للشاربين وتتوالد وفاتحة بيوت بالمال والبنون
طبعا واحد ح يقول لي بتاكل الشجر والزهور والدقيق ، طيب مالو اذا كانت الحكاية سايبة ما تاكل ، اها تاني شنو ، وين الغباء ؟! بالمناسبة هذا قليل من كثير في حق الحمار والغنماية ارجو ان اكون ما قصرت في حقهم
هل من منصف ومؤيد او معارض اذا كنت معارض يرجى توضيح الاسباب وامثلة لغباء هذين الحيوانين المسكينين ، الذين احبهماواحترمهم من كل قلبي
ما في زعل اياً كان التعليق .
الى اللقاء
