مرحب بك أخونا الشمشار - المخرج التلفزيوني
اقتباس:
المشاركة الأصلية كتبت بواسطة الشمشار
سلامات
في العام 1998 كنت ادرس في جامعه السودان في كليه الاعلام والعلاقات العامه ومن اول يوم خشينا الجامعه كان في شاب بيدرس في كليه الفنون لحدي تأريخ اللحظه دي مامتذكر اسمو منو لكن كان ملقب بي ابو جداده لانو كان طوالي بكون شايل جداده حيه بلديه في يدو ومن شفت ابو جداده لاول مره ولحدي ما مرقت من الجامعه هو عندو بنطلون جينز واحد كاتب في الرجل اليمني (خنتيني ) وفي الرجل اليسري من البنظاون كاتب (فرطت فيك براي )
بيني وبينكم انا الشمار كتلني خصوصا انو ابو جداده مابتكلم مع زول خالص قلت الا اعرف السبب الخلاهو صامت واقرب للجنون وان كان هو مجنون حقيقه و سبب جنونه انو حب 2 في نفس الوقت انتو طبعا حتكونو محتارين انا من وين عرفت انو اب جداده كان بحب 2
اقول ليكم
انا في الاول خمنت الحته دي لانو العبارتين متناقضات
خنتيني وفرطت فيك براي
وقمت سألت الشباب والشابات الفي كليه اب جداده
(للمعلوميه اب جداده فصل من كليته لانو جن لكن لانو ولوف ماغاب عن الجامعه بجي بلف الجامعه ويقعد براه في مناطق معينه وبعد داك يمشي )
المناطق دي الكان بقعد فيها مع حبيباتو ال2
ومالقيت اجابه
لكن لقيت الاجابه عند محمد بتاع الكافتريا الحكي لي مأساه اب جداده
قال لي محمد
( اب جداده ده ولد شاذ وماشاء الله عليه كان رسام شديد كان بحب واحده وخانتو مع اقرب اصحابو لانو في الايام ديك كان هو بدأ علاقه جديده مع واحده تانيه والزوله التانيه دي خلتو لامن عرفت انو هو كان بحبهم الاتنين في وقت واحد وبقت عليه الصدمه مزدوجه وفي النهايه لاطال عنب الشام ولابلح اليمن وجن وبقي شايل الجداده وبيتكلم معاها ومابيتكلم مع زول نهائي وبقت عنده عقده من البنات )
دي قصه اب جداده الجننوه 2
ماعارف الخلاني اتذكر اب جداده شنو الليله الصباح
تري اين هو الان ؟
وماذا حل به ؟
انا سردت ليكم قصه اب جداده عشان اسال سؤال واحد وبستنبط منو مجموعه اسئله سؤالي هو
ممكن الراجل يحب 2 ؟
ولو ما ممكن ليه في رجال بيتزوجو اكتر من واحده ؟
وهل اي زواج ثاني يمكن ان لايكون مبني علي حب ؟
وليه 2 مادام واحده كفايه ؟
اسئله آخري
لماذا يتذكرهم الاتنين ويكتب في بنطاله خنتيني وفرطت فيك براي ؟
وهل حبه للثانيه كان اقوي من حبه للاولي لانه كتب فرطت فيك براي ؟
وماذا وجد في الثانيه لكي تحتل مساحه من قلبه كانت تشغلها الاولي ؟
سؤال تاااااااااااني
لو كنت مكان اب جداده كنت بتجن ؟
معلومه صغيرونه علي حسب الحكاهو لي محمد بتاع الكافتريا حبيبات اب جداده كانن ماشاء الله عليهن احلي بتين في الجامعه
منتظركم ومنتظر اجاباتكم عشان نتناقش في الموضوع ده
أول حاجة ... مرحب بك أخونا الشمشار
وجاني كده شمار كبييير وتقيييل عنك كلو خير
وعلى فكرة أخونا (الشمـشار) ده مخرج تلفزيوني
اها يا الشمشار لقيتني كييييف بالله عليك ...!
قلت افك شمارك هنا للناس الحلويين ديل
وكان عنده برامج عبر قوون قهوتنا
والرفقه اللطيفه وقومه وقعده
وبرنامج مراره وشيه
شفت الشمار ده كيف
احكي لينا قصة الجداده بتاعت صاحبك
يا حبيبنا الشمشار ... عندي سؤال خاااااارج النص
وخــارج النــص دي لانك مخــــرج وكــده ...
هو خلاص عرفنا قصتو خلاص وسبب جنونو
الجداده بتاعت صاحبك دي قصتها شنو؟
