انا ما فترت من العشق ... انا بشبهك
لذيت هواك
من جوة قدرة منتهاك
لو منتهاي
بعرف مسارات الغرام
انا ليك بكيت
قبلت شان ارتجيك
تفتح
مغارات الولاد
قبال هلاكك في المعياد
قبال مواتك
في
الفؤاد
وانا برتجيك
وانزلة ليك
تنزل من المطر الحراز
تطلع علي البنزل عليك
تفتح مسامك للصباح
تمرق من البشرق عليك
تهطل براك
سيل الغرام
من فوق تصب كل الحنان
شان نزرعك
نزرع هواك
تزرعنا في وش الهلاك
شان نفتديك
شان نوشمك غرة سجود
لما الضلام اتمطى اسرق
قمرتك
والضو اصارع عتمتك
حنيت عليك
لذيت هواك
من جوة جوفك وفرحتك
من بين غناك ورقصتك
قبال تضيع
وتضيع معاك كل الخلوق
التشبهك
لذيت هواي
انا ما فترت من العشق في حضرتك
لو مرة تطلع من حشاك
كل الخلوق التشبهك
تنشرة ذي شيمة
بحر
وتغرق الظلم السكن
كل المساحات والكلام
كل الجراحات يا وطن
انا ما فترت من الغرام
انا ما فترت من الكلام
انا بشبهك
انا بشبهك
