سلام من الله عليكم
في العام 2003
في جامعه النيلين جمعتني الصدفه بعدد من الشباب الشعراء الرائعين وكانو حينها منضوين تحت مجموعه شعريه جميله اسموها
(مجموعه شروق )في تلك الايام كتب صديقي الجميل الشاعر عمر سيد احمد قصيده بعنوان امونه وهي تعالج مشكله الزواج العرفي وتناول في قصيدته الجميله قصه احدي البنات الفقيرات خدعها احد الاغنياء وتزوجها عرفيآ علي امل اعلان الزواج وبعد ان اخذ ما يبتغيه تركها
فرد عليه صديقي الاخر عمر عباس في الاسبوع الذي يليه بقصيده يقول مطلعها
في تراب واقعنا بتق
بين شتول اطيان جروفنا
نحن خليناهو يكبر
يسقي بي حيضانو خوفنا
الزمان
وقت قيمنا السمحه نرضي نحطمه
وقت بنيه جميله ساحره تبقي خادمه للشيطان امه
فرد عليه محمد الحسن ابنعوف في الاسبوع الذي يليه وشن حمله علي المرأه في قصيدته التي اسماها قاضي المحكمه ودلل علي ذلك بقصه سيدنا يوسف وزليخه امرأه العزيز
فماكان من احدي الحاضرات في المنتدي الا ان يغمي عليها واكتشفنا بعدها انها متزوجه عرفيآ وحامل كمان
فكتبت هذه القصيده مؤازره لهذه المسكينه
اليكم القصيده التي هي بعنوان
ليه تظلمه؟؟؟؟
الحقيقه مره الا المرار كان علقمه
يوم جيت تفتح لي جراحها
وبي برائتو هي تفحمه
يا ود حسن كيفن
بتجني علي البنيه وتظلمه؟؟؟
تديها احساس بالوضاعه وبالخلاعه
وبي قداستو هي توهمه
جيت تدافع عنو انت ؟؟؟
داير تضل المحكمه
ماقبلك عمر عباس كتب
مسكينه ضايعه محطمه
شايلالا وزرآ في الكتوف
وعينيها سارحات في السماء
بي سبب قرشآ مهين
ذلاها ذله وندمه
وفي عيونه انهار الدموع
ما كانت تمساحه وظالمه
وقت زليخه سوت فعلتها
قدام نسوان متلملمه
وبي السكاكين قطعن ايديهن
ولما ماتن هي موسمه
ماسألت
هي جالسه كانت ؟
ولاحاضره بيناتن جاثمه؟
فكيف بتجني علي الفريسه ؟
وكيفن بعد ده تجرمه؟
لوكان بتلبس لبس عاري
تبقي فاجره وظالمه
لوكان بتركب في الكرسد
وتتغطي بالتظليل اعدمه
لكنها.........
قصدت هنا علشان تصير متعلمه
عشان يفرح ابوها وسيرتو تبقي معظمه
عشان يشيرو الناس عليها يقولو واحده مقيمه
ماقايله انو الدنيا قاسيه
وحقوقها نحن بنهضمه
وزي ماقال ود سيد احمد
الدنيا جارت ب الامه
وقصه امونه البسيطه
تبقي نبراس في العمي
وقصه يوسف نبينا
مابتحل المظلمه
القصه ماقصه لبس
وشوفو ديك متحشمه
القصه قصه وحش غادر
علي الخطيئه هو ارغمه
القصه قصه نبته طلعت
في اراضي مسممه
القصه يامحمد اخوي
قصه بت
جميله
ساحره
منعمه
ختاها في عقلو المريض
ومن سيده حولها لي أمه
ويييييين عداله المحكمه ؟؟؟؟؟؟؟؟؟؟
وين البنرجاها بترقب
جايانا من رب السماء؟؟؟؟؟؟؟؟؟؟؟
لابنقدر نسكت اكتر
لابنقول دي حنرجمه
وبالفجيعه دموع هميله
واقفه في سوح المحكمه
شايلالا شافع في حشاها
ورؤاها صبحت معتمه
كايسه العداله وكلمه طيبه
عشان صحيح هي مهشمه
عشان باكر الناس مايقولو
دي واحده فاجره وآثمه
ومافي زولآ يعرسها
عشان بقت مستخدمه
كيفن بعد ده بتوصمه
بالدعاره واتباع العولمه ؟
وتبري انت شريكها داك
بالادله المبهمه ؟
ويبقي في نظرنا الضحيه
وهي الوحيده الآثمه
ونبدأ نفكر في الدوافع
وكيف ندين المجرمه؟
ونبدأ ننصب للمشانق
ونشوف كيفن نعدمه ؟
ونزيده لهليب نار فؤاده
وللعداله نسلمه
ويبقي دافعنا الحقيقي
نبريهو داخل المحكمه
ونتناسي انو الزانيه معاها زاني
وفي الجريمه ملازمه
عشان نحقق عدل اكتر
وعقولنا برضو نحكمه
لابد نرم الانكسر
العوجاء نسعي نقومه
نديها احساس بالامل
تنسي الهموم التهزمه
وندفن الماضي التعيس
بكل تفاصيلو المؤلمه
حتمآ تعود ليها الثقه
ولي بيت جديده نقدمه
ونبدأ نلعق في جراحها
ولي عريسها نسلمه
ولابد كمان
اختم قصيدتي في معجمه
وليك يامحمد
آخر النصائح اقدمه
ارجوك لاتقسي وتجور
وادعيلها
ربنا يرحمه
واتمني ربنا يرحمه
وان شاء الله ربنا يرحمه
