مقطعين شليل وحجر للوطن
مقطع اول
ما جيتك في نص الليل
ولاطفرت فوق بابك
كاني شليل
حليلك ياصباح الخير
كانك في السماء السابع
تضوي تفرهد الدنيا
وطن ممشوق
ممد في النجوم رسمك
وخاطر الليل
ما جيتك كاني غريب
ولا فتشت لون نيلك
في نص الغيم
انا الراكز على ريدك
سنين وسنين
انا المجروح
علي ضهبك وكت كل النجوم
سربت في بطن القيف
لقاني الحوت
لما بلغت ما بينك وبين الخوف
نسيتك جوة
في نسمة كلام الريد
ما جيتك في نص الليل
ولا طفرت فوق بابك كاني شليل
افتش في عتم روحك
محل المك
وايدك في سراب عمري
تصب مطرة
تدفق في شقوقك سيل
حليلك انت لمن كانت المطرة
تكب مطمورة لي هجعة ضيوف الليل
وموية تصب من سبلوقة
مشنوقة على سدرة صباحك حيل
وفاتحة على الشوارع
باب
وخاتية الميل
حليلك يا بلد غرقان
في نص النوة تتلوى
وفي طرفة رموشك
ويل
ويلك ويل
من وليداتك
من بنياتك
من شيوخك ديل
ماجيتك فراق نورك
ولا طفرت في حجرك
كاني الليل
انا الساكن مسام نفسك
شرق شمسك
شمال نخلك
غرب سعفك
جنوبك ديش
ونصك فيني مخلاية
تشيل بطنك
على فجة ربوعك خيل
وخيل معقودة في جبهة وشيها الخير
.................
مقطع تاني
,,,,,,,,,,,,,,,,,
ماجيتك مع العسكر
ولا دونت في رحمك
ولد بسكر
ولا فرقعت في بابك
قنابل الغاز
وكت تعكر
ولا سامرة كيف الخمرة
كيف اسهر
ولا صعلوق
وكت جيتك بدور اتغابى
معرفتك الف افتر
ولا سجلت عنوانك على الواطة
ولا نحتك في قليب اشتر
اظنك يا وطن ظني
رجيتك في حلم اخطر
وما جيتك يابلد درويش
لقيتك يابلد اعسر
وما جيتك يابلد غناي
لقيتك في الحزن امهر
لقيتك ياوطن لولاي
تنوم في حجاي
سهر
وما جيتك في نص الليل
ولا طفرت فوق بابك
كاني
حجر
اريتك يابلد تسلم
عشان حبك وحبي قدر
