هترشات زميل : سيد نفسك من اسيادك
بسم الله الرحمن الرحيم
سلامات للاحباب
جاى من وين
جاى من السماء الاحمر ، انتو ما قالوا ليكم اياكم والاسعله التعسفية ، انت شايفنى لابس هدوم المدرسة وشايل شنطة الكتب اكون جاى من البحر
البحر الياخدك ، ما تصلح لسانك الداير قطعوا دا وتتكلم كويس
وانت لسانك مرفوع منو القلم ولا مضموم ، اسعلتكم دى ما ينفع ليها رد الا زى دا والله قصة "ضربنى وبكى وسبقنى اشتكا" وانتو بس زى
والقاه فى اليم مكتوفا وقال اياك اياك ان تبتل بالماء
ويقولو ليك تعليم قال ، يا خى قوموا لفو بالا تعليم بلا تأليم ، نحن لا اتعلمنا ولا مشينا مدارس لكن اهلنا علمونا القلم ما بزيل بلم
طيب ما تعلمنا من الحاجات العلموك ليها اهلك ديل تتفاصح فينا كدا تقول هناى
من الحاجات الما بتتعلما فى المدارس حاجة علمنى ليها خالى الله يرحموا قال لى
Your behavior is your responsibility
يعنى سلوكك او تصرفاتك مسؤليتك عشان كدا انا قلت ليك قبل كدا انت ما تشتغل بى كلام الناس واسعى تسوى الصاح اما هو صاح وانت سويتو او هو غلط وانت اجتهد تعمل الصاح حسب علمك والصاح نسبى كل زول بسويه حسب علمو والصاح البتعملو او الخطأ البتعملو راجع ليك وانت مجزى بيه والدنيا دى اسمها لعبة الكيد المرتد البتسوى كعب كلو برجع ليك والبسوى خير ما بضيع والشعراء بقولوا
ازرع جميلا ولو فى غير موضعه فلا يضيع جميلا اين ما زرعا
وبقولوا
من يفعل الخير لا يعدم جوازية لا يذهب العرف بين الله والناس
كان احدهم يحلف ان هذا البيت " الشطر الثانى من البيت " مكتوب فى التوراه لا يذهب العرف بين الله والعباد وصنايع المعروف تقي مصارع السوء واى زول حسب نيتو ورسولنا صلى الله علية وسلم قال : " انما الاعمال بالنيات ولى كل امرى ما نوى" وربنا قال : "مَنْ عَمِلَ صَالِحًا فَلِنَفْسِهِ وَمَنْ أَسَاءَ فَعَلَيْهَا وَمَا رَبُّكَ بِظَلَّامٍ لِلْعَبِيدِ (46)فصلت " وقال :" مَنْ عَمِلَ صَالِحًا فَلِنَفْسِهِ وَمَنْ أَسَاءَ فَعَلَيْهَا ثُمَّ إِلَى رَبِّكُمْ تُرْجَعُونَ (15)الجاثية" وقال : "وَمَنْ يَعْمَلْ مِثْقَالَ ذَرَّةٍ شَرًّا يَرَهُ (8)الزلزلة"، وفى قول اهلنا التسوى كريت تلقى فى جلدى .
ذكرتنى قصة حكوها لى قالوا الشيخ فرح مشى الخلوة يتعلم القران ولما حفظ سورة الزلزلة الفيها الاية القلتها دى، شال بكجتو وقال ماشى قالوا ليه انت ما قلت عاوز تتعلم قال : هو العلم ال انا اتعلمت دا شوية فمن يعمل مثقال ذرة خيرا يرى ومن يعمل مثقال ذرة شرا يرى ، والخواجات بقول "العلم القليل شئ خطر " وبعدين العلم دا مشكلة كبيرة
كيف يعنى مشكلة كبيرة يعنى الواحد ما يتعلم
لا طبعا ، المشكلة ما فى العلم ، المشكلة فى حفظ العلم موش الجماعة بيقولوا من السهل الوصول الى القمة ولكن من الصعب المحافظة عليها ،والعلم دا قمة والعلم يحفظ بالعمل ، انت ما سمعت بالولد الوداه ابوه الخلوة عشان يحفظ القران وجا بعد اسبوع يسأل الشيخ عنو والشيخ قال ليهو ولدك دا ما بنفع فى التعليم اخير تعلمو صنعه يستفيد منها من ما جبتو ونحنا بنحفظ فيه بسم الله الرحمن الرحيم ( التى ذكرت فى القران 114 مرة على عدد سور القران فى بداية كل سورة عدا سورة التوبة وذكرت فى اوسط سورة النمل على لسان ملكة سبا : " إِنَّهُ مِنْ سُلَيْمَانَ وَإِنَّهُ بِسْمِ اللَّهِ الرَّحْمَنِ الرَّحِيمِ (30) ") غالبو يحفظا ، ونادو الولد والابو زعلان يا ولد انت ليك اسبوع ما قادر تحفظ بسم الله الرحمن الرحيم قال ليو يابا بسم الله الرحمن الرحيم ما بتغلبلها راجل انا خايف من البعدا .
نصيحتى ليك يا زميل سوى الصاح البتعرفو والانسان دا عندو زمن بتعلم فيهو وبسمع كلام الاكبر منو لحدى ما يصل سن التكليف بعد داك تبقى تصرفاتو كلها محاسب بيها يعنى لو زول قال ليهو سوى حاجة غلط وعملها ما بحاسب القال ليه بحاسب هو وفى ناس كتيرة بتخلط بين الاحترام وطاعة الناس الكبار فى عمل الغلط وبين جبر الخواطر والنفاق وبين عزة النفس والتكبر وبين الكرم والتبزير وانت انفق ولا تخشى من ذا العرش اغلالا وقول ليهم منع الجود سوء ظن بالمعبود ولو قالوا ليكم اما علمت ان لا خير فى السرف فقل لهم كما قال فلان أما انا فقد علمت ان لا خير فى السرف فهل علمتم انتم ان لا سرف فى الخير والكرم صفة للمسلمين وابو الضيفان سيدنا ابراهيم عليه السلام "مِلَّةَ أَبِيكُمْ إِبْرَاهِيمَ هُوَ سَمَّاكُمُ الْمُسْلِمِينَ" - "جزء من الاية 78 من سورة الحج" ، وفى النهاية برضو الناس ما بتريح كان بقيت نضيف ومهذب وذوق يقولوا ليك فاكيها فى روحو وكان بقيت مضفر شعرك ومبهدل وعامل استايل ومفتح يقولوا ليك قليل ادب وانت اهم شي تسوى البخليك تنوم مرتاح وهادى البال والله يرحم محمد وردى كان يغنى " انوم مرتاح وهادى البال" وبرضو ما ها تنجى منهم ها يقول مهترش .
