دائما بيوت الاعراس والبكاء بتلم وهنالك الونسة الجانبيه التي تتفقد احوال الاهل والاصدقاء وفي بعضها علي قولة النسوان تلقي القطيعه.
لاحظت علي احد الاصدقاء بعض التغيرات في الشكل وطبيعي السؤال التقليدي ((يا فلان انت مالك ضعفته كده ... أو سمنته ..أو شكلك اتغير وبقيت شين ....الخ)).
بدأ صديقنا في روايته مع العروس الجديده !!!!!!!!!!
يا زول ربك رب الخير في جماعه انا بمشي ليهم طوالي صداقه بيني وبينهم ناس اولاد قبائل يوم لمحته ليك بت عندهم الجن ركبني زولة ماشاءالله اتقول بت حور لونا كيف كيف ما تعرف تقول اصفر لا تقول اسمر لا تقول خمري لا المهم لون ربنا جعل فيهو ايات جمال الالوان (( كسره خارج الموضوع طبعا الراجل البحكي مولانا ودقنو لي صرتو)).
نرجع لي حكايته: الشعر بالله تقول الديسه كثيف ماشاءالله زي سواد الليل مديها مع وشها مسحه من الجمال ملائكيه اما باقي الوصف ... اعوذ بالله احسن الواحد اسكت ما اجيب ليهو سيئات بي حكاية الجسم والطول والتقاسيم نقيف هنا لانو الموضوع بجر ......... اها من شوفتها قلته الزولة دي فوله مقسومه وبعيده مني ربنا سبحانه وتعالي هداني ليها دي زوجتي التانية ذاااااااااااااااااااااااااتا.
كشكرته الجماعه لقيت موافقه مبدئيه قلته في قلبي البت صغيره امشي اظبط نفسي واجيها.
مشكلتي الوحيده ما الدقن زي ما انت شايف دقني وجيهه مشكلتي السنون لون سنوني صفر مشيت لي مستوصف اسنان للتنظيف بعد الكشف الدكتور قال لي التنظيف بي 500 ريال لااااااااا حولااااااااااا المشكله قالو بعد شهرين تلاته السنون بترجع لي الحالة القديمه قلته والله دي ميزانيه حكيت الموضوع لي زول صاحبي استعين باجابة او وصفة لتنظيف الاسنان رخيصه لانو العرس بعدين مصاريفو بتكون كثيرة تصدقو قال لي شنو:
حامض الاسيد لو عملتو خفيف بشيل الاصفرار نهائي بعدين اشتري ليك حاجة بي خمسة و ل عشرة ريال الباقي ادفقو بعد تخلص لانو خطر تصدقو بالله يضع سرو في اضعف خلقو.
مشيت اشتريتو وفي وقت ميت المدام ما تشوفني خشيت الحمام برااااااااااااحه طلعته فتيل الاسيد وكبيت منو في الفرشه ... بالله الفرشه اكلا ليك في ثانية خلاها زي ملاح التقليه السايل في نص الصينيه قلته يا ولد البتاع ده تقيل خففو بي مويه وكبو في غطاية الفتيل ودخل طرف اسنانك كتجربه .
لا اله الا الله محمد رسول الله وقت مديت طرف اسناني بداية ما شعرته بي حاجة قلته اغرق لي تحت بالله ما اشم ليك الي ريحة الصوف طالعه من الشنب وريحة الشية طالعه من الجزء العلوي للشفه والسخانه انطلقت في جسمي قلته نبرد الحكاية بي شوية موية كشحته مويه في خشمي بالله انطلقت فيني نار جهنم تاري المويه بتزيد احتراق الاسيد ... المهم ربك رب الخير الشلوطه وقفت قلته اعاين للمرايه اشوف حالي بالله لقيت ليك الشنب نصو ضاع والشفه العليا فقدت جزء كبير من اللحمه زي ما شايف انت وباقي الاسيد طار في اليد لونا برص دخلت براحه اوضة النوم وغتيت وشي من المدام ودخلته البطانيه قلتا ربنا اصبحا عشان امشي الدكتور.
تاني يوم مشيت الدكتور شرحته ليهو الموضوع بالله الدكتور طار من الكرسي لي فوق نوع الدكاتره المصريين اللئيمين اول كلمة قالا لي دي جناية يا بيه لازم الشرطه ده انت كنت متخاصم مع المدام وهي دفقت فيك اسيد لازم اتصل بالشرطه ....... قعدته مع الدكتور في حاو .. وتر ... وجنس جرسه بالله ما باقي لي غير امسك كراعو وبيني وبينك مع الخوفه بكون مسكتها ...يا ود الناس والله انا العملته كده وبعدين انا انسان راشد وعاقل ما شايف الدقن دي معقول اكذب عليك انا كنت بفتش للسماحة عشان اشيل الاصفرار في سنوني وربك لطف جابا كده.
الدكتور قال لي.... وينا الدقن المحروقه بالاسيد دي يا ابن النيل ده انت شنبك نصو طار بعدين سماحة ايه يا بيه ده انت لو بدلو وجهك بي واحد تاني مش حا تكون سمح قال سماحه انت تعرف عشان ترجع لي حالتك القديمه مستحيل اولا الشفه السفلي عايزه ترقيع بعملية تجميل بمبلغ وقدرو اما الشنب خلاس راح فيها الحامض اكل البصيلات قال سماحه وزواج علام ما تحمد ربها.
ربك رب الخير فكاني من الدكتور المصري بعد شاف حالتي تحنن اداني مرهم بي 300 ريال لمعالجة الجروح فقط .... حكاية والله غريبه ابينا ننظف بي 500 ريال اشترينا مرهم بي 300 ريال.
توكلت ومشيت علي البيت.............
بالله المدام من شافتني كشت لي غادي وقالت بسم الله الرحمن الرحيم يا ابو فلان مالك انت برصته اعوذ بالله من الشيطان الرجيم المرض الجاك جديد ده شنو لا لا لا لا لا طلبتك بي النبي ما تقرب علي الاولاد من هنا والدكتور امكن تعاديهم ........... هي ما عارفه انا الدكتور عايز اوديني الشرطه.
اها بقيت اباصر في القديمه ما تطير مني حكمت ربنا نفتش لي جديده القديمه بقت في حصبيص ومباصره.
