كان ياما كان في قديم الزمان
كان .... في ناس حلوين مليانين حنين ومحبه وشوق ... البيناتم فيما يسمى بالفوارق الفكرية والزمانية والمكانية والعمرية والصنفية كان كبيرا .... لن تتخيل عزيزي القاريء أن سفينة واحدة كانت تستطيع أن تحملهم جميعا وفي وقت واحد ... لكن رغم ده .. كلهم أصبحوا ركابها ... وبدأت السفينة مسيرتها غير عابئة ببحر متلاطم ولا أمواج هائجة ... ولا مصير مجهول .. لأن الجميع كانوا يثقون بـ بعضهم البعض ويتفقون رغم الفوارق القلناها فوق دي على هدف واااااااحد ... ربان السفينه وطاقمه .. ليهم احترامهم وتقديرهم لأنهم بقودوا السفينه فنيا .. لكن وجهة السفينة كان بيحددها ركابها ... حتى المحطات والمرافيء .
جميلة كانت السفينة ... ولست اعني هنا جمالها الخارجي وهي تشق عباب البحر فقط .. ولكني أعني جمال ركباها ... فلن تستطيع عيناك أن ترى سوى الجماااااال .... لأن كل يعبر في داخلها عما يعشقه ويحبه ويدافع عنه ... كل يغني على ليلاه ... تناغم جميل وتفرد زاهي .. وألق لا ينقطع.
وهنا أردك الهمباتي الصباح وسكت عن الكلام المباح ... وبيني وبينكم جمال الصورة الآخاذ لازم يخليك تسكت لأن الصمت في حرم الجمال ... جمال.
لي عوده أكيد كدي هاكم نمه شاعرنا البشرى دي مع شكري وتقديري له ود البلد الزين
وانا من زمنا خدو مشلخ
وهى من ازمانا خدها ساده
اتعجبت سماحا مواتر
طبقات عالية وكلها ساده
وكانت بينا فوارق شاسعة
اتعارفنا
وكانت جاده
وقالت عيد ميلادى الشهر الجاى
ولازم تحضر
قتلها خير
قتلهاخيييييييييييييييييييييييييييير
ودخل فى اضافرى
تقصدى ايه بى عيدميلاده؟
ايا ربى اتولدت يا دابا؟
يبقى الاعياد سوها زيادة؟
امكن ولدت واناما عارف؟
يمكن ميلاد عيسى واجدادها
يا ربى بدقوا الدلوكة؟؟؟؟؟؟؟؟؟
وبعزموا الحلال كالعاده
بس قتلها خير وانا جاييكم
وعديلة وزين
والشهر الجاى
مرق مركوبى من السحارة
داقاهو المطرة قبل شهرين
ونكت طاقيتى من العضاضة
سليتلى ثماد رقعتها زين
سديريتى ابوى مسويها لبد
فرتقت اللبده مرقتها طين
عراقى مغزوز فى الكوكار
كان سوهو وقاية وكت فازعين
سروال مدفون فى رحل العيش
ملفوف محشور بين شوالين
لميتن واديتن شطفة
شريتن فووووق لـ زريبة الزين
والزين بقراتو مكوفرات تب
مدغن طاقيتى هرنها زييييييييييييييييييييييييييييين
شافتن السرة بت الهراف
طردتن وجابتن لتاف
وغضبت غضب
وعزمت اقوم
جفن ما جفن
اقوم فى الحين
مرقت ووشى مطوطو تب
وصتنى الحلة رجال وعوين
وصتنى ام نوفل لى كركار
كان تلقى ودك جيب لى رطلين
وقروشى حلف صرة وبى خيت
وصتنى حليمة بت العجبين
سروال لى امحمد ورطلين بن
بنبيعلنا شي ونديك بعدين
وصانى الهابر لى مركوب
مخلوفة وسرج وكرباجين
عنقريب وموسر بى حبال قد
تيبار ومسلة وابريق طين
والناس بتوصى وغبيانة
والناس غبيانة وبتوصى
وانا ظرفى مكدر زى الطين
وبتوصى وزى بايعلى بعير
وانا بايع تيسى وعيش كيلتين
والتيس اعور ما جاب لي سعر
والعيش بتاب ومسوس وشييييييييييييييييين
تتسود ختوة ها السفره
انا ماشى لواجب اقوم بالدين؟؟؟؟
وركبت الباص مخلاتي دفس
كدوسي وحقـه وعود سكين
وانا راكب في الباص بتأمل
ياربي بجيبو الحكامات
بتسو دلوكة بيجوا الحلال ياربي بعزموا الرقاصات
ضابحين تيران ام خرفان صر
بدقق كمين شوالات عيش
وانا مالي ومال عيد ميلادن
ان نقروا الدلوكة اولادن
انا بنزل حربي ومتعكز
وادارق اصقر في الدارات
وامسك صوتي المدهون قطران واركز واندق
شان السمحات ما يقولن ضيفنا قريدن ساكت وأنا زول معروف خراب حفلات
وانامعروووووووووف خراب حفلا ت
ووصل وسعل لامن جيتن
وهداك البيت يرقش لوحات
وصل ولقيت البيت مزرود لاحلقو بنات سمحات
شايلات هديات
وحدات وردات
وحدات زهرات
شايلات رسمات في شكل ارنوب
واسود ونمور ... سبحان الله زي الميتات
وأنا زول جاي بى أيدي
شايلي ألفين وبدور اكتبهن في الدفتر جت وأنا زول واجبات
ولقيتهم يضاحكو قـر حايشين صينية تبق شمعات
ماف زول قالي انت منو مابعرفو الضيف زي الخواجات
لتيت عكازي وقفت طرف
ملـّص نعلاتي اتفرجختا
لي تفه خلالي مضنقلو تب سكيني ملسنه بالجمبات
تبماكي وحُقتي مزرودا ولعتا كدوسي واخدجبدات
وانا بتأمل هذا العالم ياتو البنوت وياتو الجنيات
وبحرت عيني لامن برقن
كل البنوت زيها سمحات
والبقر اشابه لي ضمة
ما عرفت الراحن والفايتات
لي حسن الحظ هي النقرتني
ما شالت شك من شافتني
ساقتني وقامت بالواجب هي اصيلة وراسية وست حوبات
نادت صاحباتا بنتعارف
نانسي وناندى وشيماءولمياء ْ وحوراء وكفا
من وين! من لندن جينا امس راجعين باكر زي ها الحظات
من الطايف والمنشية ومدينة النيل وبنوت راقيات
طيبات طيبة وكل كليمة معاهاضحيكة
ونضاااف ورهااااف زي اللعبات
واحدتاٌ فيهن سمحة سماح لكن مي طاعمة
وانا زول مستغرب في حاجات
ان زول اسراني سماحتاً كاسيا
بنت البلد الهاديه وراسية وضميرا الحي التب مامات
وقالت لي
عرف نفسك بي عبارات
عرف نفسك بي عبارات
قتليها : انا الاسد الحرس غابتو الضريا
وانا الساعة الكتال بختف حديا
وانا الدايرني مابجيب لي هديا
وسارح مدرج ام هبج التخيه
مراتع اللبل الضان السعيه
وادرج عاصفة اللقدة السخيه
وادرج عاصفة اللقدة السخيه
