زيف سيزيف ... نعالك يا ولد مقدود
ومليون بال تناغم في ضهر قمرات
لونك يا قمر ابيض
ولون الدنيا
من تالا الضلام ضهبت
ولون الناس سماحة زيف
وزيف ممحوق على سرج الركوب فترت
دموعك يا ولد كملت
تشاشق وانت ضيف مخنوق
تسالم يا وليد الطين
وانت طينك ني
كماين الطوب وعود محروق
اتش الطين تبقبق في بطن ايديك
ولا بتنجض
نارك يا وليد جواك
ونار الطوب حداك وراك
ولا بتنجض
وجمرك ياصبر تالاك
ولا بتنجض
ولا بتنجض
سماحة الزيف
سماحة الناس حكم سيزيف
تدحرج في رماد صبرك
حمل اسفار
نعالك يا ولد مقدود
وماكلو الدود ولا بتلحق
الزك بوت
علي وشك
تقع من تاني تالا الخوف
ولا بتقنع
رمادك من علاك اقنع
اصارع الريح
علي جرف الصدق اشعار
اشيل من تاني صخر الخوف
وافجك يا تعب جمرة
ولا بتنجض
حروف الخوف