زيت ناس امبوحي

سلام من الله عليكم بعد غيبه عن الكتابه في النفاج
كعادتي احكي قصه ويكون لي مراد من سردها ودائمآ تكون هذه القصص في العام
لكن انا قصدت اني الليله احكي في النفاج
القصه ومافيها كان عندنا مكيف عطلان اها ود عمتي بصلح في المكيف ده قام احتاج لي زيت قمت انا مشيت لي ود جيرانه (امبوحي ) وامبوحي ده لقب اطلقتو علي ود جيرانه ده لانو ماشاء الله سمين لكن تصرفاتو وقياسه للامور ضعيفين شديد رغم ضخامه جسمو ولقب امبوحي جاي من البقره لانها بتقول امبوووووووح يعني انا مسميه البقره بس بي اللفه ههههههههههه وطبعآ انا بقول ليه امبوحي في وشو ووريتو ليه انا لقبتو بي كده ؟
نرجع للزيت اها الزيت ده بعد جبناه من الجيران ناس امبوحي وصلحنا بيه المكيف والمكيف دور في امانه الله بعد مده المكوه باظت كبينا فيها من زيت ناس امبوحي دورت تش المروحه الكانت بتسكسك ديك يا انور وياعاشق الترحال اديناها من زيت ناس امبوحي بقت طياره يعني بقي زيت ناس امبوحي مافي غني عنه بصلح لينا اي شئ وللجيران كمان زيت سحري بس
حكينا القصه دي ليه ؟؟؟؟
انا حكيت قصه زيت ناس امبوحي لانو النفاج ده والمنتدي ده في ناس زي زيت ناس امبوحي بملو اي فراغ فيه وبجمعو اي شتات فيه
ببركه هذا اليوم
يرجعو
عنكوليب
عم محجوب
مطاميرو
والله والله الثلاثه ديل زيت ناس امبوحي بتاع المنتدي وانا لو عندي عندهم خاطر يرجعو يعيدو في المنتدي ده
فتكم بي عافيه

مين يسمع



:(

:):):)

وعليكم السلام ورحمة الله وبركاته.:)

نتمنى أن يستجيبوا أخي الشمشار،
ويعود كل الغائبين بإذنه تعالى.:)

مع كل الشكر والتقدير لك.:)

:):):)

يا سلام عليك يا معاوية ياخي

نحن فعلا محتاجين زيت امبوحي عشان مروحتنا ما تسكسك

اكيد

اكيد الزيت دة فيه شبه كبير من داوخل الناس هنا

اي عصلجة حبت زيت والامور تستعدل

وترجع أطيار المواسم تبنى أعشاشه وتفرهد
كل أغصان المحبة
لو صفت كل الخواطر وكل زول للتانى سالم
الدروب تصبح أمينة وتغمر الكون الســـــــكينة
زى شعاع المغربية

لا بالجد هم نااس امبوحيااات من حيث الوزن والمضمون :)

دعوة جميلة من هنا من بوستى امبوووحى ومن بوست العفو والعافية والدنيا الصافية

بتاع ام ريم

الدنيا دى فيها شنو ياالحبااان

نتمني تزييت جميع التروس المعصلجه لتعمل بنشاط وحيويه لتعبر بنا راحلتاً لاقطار اوسع جوه دواخلنا المعبقة بذكراكم

يا خال والله بيني وبينك ديل موش زيت ناس أمبوحي, ديل موتور طاحونة ناس مهند مختار زاتو, والعجب كان جابو معاهم بحيري ومودي

لكن شوف أقول ليك حاجه, عم محجوب ده كحال ناس السعوديه الله راضي عنهم لاماهو العشره الأواخر حتي التلفون الضربتو ليه ما رداهُ وما رجع لي

مطاميرو ده أكنك أصبر لي شويييييييه كده وليك علي كان ما أجيبو ليك حي.

الطاعمه عونكوليب دي إنتو غلبكم تجيبوها وللا غلبكم ؟؟؟ ما تتحركو معانا شويه

يعني امبوحي ده جاركم انتو طيب ما غريب عليك يكون دمك شربات يا شمشار ... وثانكس ع الاهداء ياخ :cool: