مسادير في اعضاء المنتدى (اعادة)
(ودسمير) اخوي يا اول الجايين
فرحانين كتير بي طلتك يا زين
كلامك بطرب الحزنان سنين وسنين
في اصلك عديل ما شفنا شيتن شين
***
يا (علوني) خوي سيب الشغل وادّلى
اقعد في الثقافي ومافي غيره محلّّه
وامسك قلمك الرويان حبر شان الله
واكتب في المدائن وفي جمال الحِلّة
***
يا (ود الجزولي) الليلة حوبتك جات
انهض بالثقافي ومتّع القاريات
اكتب انت حقك .. وامشي جيب الفات
الجلفن خلّهن واقرع الواقفات
***
(هاترك) يا ظريف جايينا بارم العمة
مشرفنا اللطيف عايز دوام نتلمّّ
(تغريد) في الثقافي جابت مواضيع جمّة
(بت امدر) تفكر في الوصول للقمة
***
(هاترك) ياظريف جايينا بالنضارة
(انور) في الأدب تلقاه ما بتجارى
لا بتوبو باظ ميتة وخراب وخسارة
هجر المنتدى بالمقسة قام اضّارى
***
(هاترك) يا ظريف عقب وجر النم
راجيك بالغدا ما تنصرف حرّم
خت في ابوست ثقافة ومرة خفة دم
يبقى البوست منور فيه (بدر) التم
***
مالو الزمن قاعد يدردر فيا
الناس في البطان انا لازم الطورية
يوم (مدنية) جات هلت علينا عشية
عمانا الفرح والدستة صبحت مية
***
يا (ياسر عمر) جيت بي طريقنا عوافي
امسك في الكلام حاجة بتفكك مافي
حاول مرتين تلقى الحكاية قوافي
في جرس الحديث وبحوره تلقى مرافي
***
جيتك يا (امين) بي بوست رشيق وجميل
كايس ليك طرب وثقافة سمحة عديل
المسدار بجيب الرايحة من النيل
لي حد البطانة ويحدو جمل الشيل
***
(الممتن) اخوي بي فكرتو المجنونة
لملمنا الدغش ودانا (امبارونا)
رصرصنا البروش جهزنا ركن الشونة
وضبحنا الخروف فطرنا واتغدينا
الفنان صدح جاب الاغاني رزينة
تغريد الطيور بصراحة اثر فينا
(تغريد) شرفت نظمت قوافي رصينة
(علوني) انطرب يا رب بنيتي تعينا
***
***
ماك الغريبة علينا
حظنا يا (مرام) الجابنا بي رجلينا
شان نلقي السلام ونوقر الجايينا
اسقينا الثقافة بالكفوف اروينا
بس قلمك رشيق زيدي الادب واملينا
***
واحدين تلّبو جابو الكلام الجم
واحدين تاوقو وكم واحد ادّمدم
واحين خرّمو وكم واحد إتألّم
اكتبو يا جماعة الليلة جر النم
***
من حد الصريف للكجرة للصالون
جاكم زول ظريف في الشكل والمضمون
راشين رش خفيف بالعطر والليمون
فارشين النضيف مرسوم بمية لون
رسلنا البقيف وضربنا كم تلفون
فرحانين كتير بالطلة يا (ريمون)
