قبل يومين جاتني واحده خواجيه زميلتنا في الشغل شايله ليها صورة وقالت لي ماشفت صورة البيبي حقي، أنا عايزاك تساعدني كيف انزلها في الاسكانر وارسلها عن طريق الايميل لصديقتي.
أنا قلت الخواجيه دى انحنا ناس زمايلها في الشغل تقوم تلدى وما تورينا انها ولدت وكمان تجي تقول لي عايزاك تساعدني في ارسال الصورة لصديقتها. اخوكم عمل زعلان شويه لكن قلت معليش الناس ديل مابيعرفوا اللوم وخليها على راحتها.
المهم صهينت من الموضوع وقبل ما أشوف الصورة قمت سألتها قلت ليها البيبي بتاعك ده ولد ولا بنت، قالت لي ولد. قلت ليها طيب وريني الصورة خليني اشوف البيبي بتاعك ده. ولما ورتني صورة البيبي قلت حوله، البيبي الله يعزكم طلع جريو صغيرون حليو وكمان ملبساه بدله خاصة قالت علشان البرد مايمرضه وبتخاف عليه كثير.
عليكم الله شوفوا الخواجيه الماعندها شغله دى خلتني أضيع وقتي في السؤال زي الاهبل لكن بينى وبينكم أنا حنيت واتحسرت على حال جريواتنا في السودان الواحد طول اليوم تلقاه حايم من كوشه لي كوشه ومن ضل لى ضل، يلقط ويكد في العضام ويطاردوه في أي حته يعتب عليها دون أي ذنب يجنيه ومافيش حد مهتم بيه خالص وبعد ده كله لو نجا من طلقة البوليس اللى بدور على الكلاب السعرانه يكون محظوظ جدا. وبعد ده كله عايزنه يساهر ويحرس لينا بيوتنا من الحرامية بالليل. مسكين الله يكون في عونه.
قلت في نفسي للخواجيه الجريو بتاعك ده لو عندنا في السودان كان نهرناه ليك نهره وطردناه ورميناه ليك بحجار وانشاء الله ثاني ما تشوفيه ليه أثر أبدا.
أنا قارنت بين جريواتنا في بلدنا وبين الجريو حق الخواجيه وقلت مسكينه جريواتنا شوف عايشه في مزله وهوان ازاي وجريو الخواجية عايش آخر انبساط، وبيأكل أحسن أكل انسان ما يلقى يأكل زيه، وكما يقول المثل (تموت جريواتنا جوعا ولحم الضأن تأكله جريوات امريكا).
وفي امريكا تشوف العجب العجاب، تلقى ناس تكتب كامل وصيتها في الورثة لجريواتها، وناس تاخد جريواتها على الكوفير وتسرح ليهم آخر تقليعة في التسريحات. وكمان ما تنسوا في مسابقة لاختيار ملكة جمال الجريوات، وكمان في زواج جريوات على مستوى. وسمعت في واحده عندها جريو مات عملت ليه مأتم تتقبل فيه التعازي على جريوها ودفن في مقابر خاصة بالجريوات. والله عالم عجيب.
بالله شوف العز العايشه فيه جريوات امريكا ده، مش جريواتنا في بلدنا حقو ترفع عريضة تظلم لى لجنة حقوق الجريوات الدولية، أقصد جمعية الرفق بالحيوان.. عيني عليك يا جريواتنا.
مع كل الود.
عزيز
