حلمنتيش....................... حُب فيسبوكي
ملف مرفق 15434
حلمنتيش - حُب فيسبوكي
بقلم: أحمد عباس المحامي
أسير الشوق
إسم حَرَكِي
لُزوم القَشْرَة والفيسبوك
مُصَمّمْ للحنان والزوق
وسِيدو نبيل
ضَكرْ أصْلي
قِليبو كبيييير
وساع استاد
يشيل ألفين صديقة فيس
بدون اجهاد
ولد فنّان
خبير في الجكس والرندوك
وقشّة عينو من النوم
يخش الفيس
تقول بي نبلة بس مفكوك
يوزّع ديمة في اللايكات
خصوصاً لو يلاقي بنات
يفور ويجوط
تقول قرموط وصادف خور
يزاحم الغير
ويعمل شير
ويقابض المنقة والجرجير
***
ومرّة في يوم
ويوم أخدر
تعتر ليهو قصة حب
ويتشنقل
وجات تقدل
ظرافة وزوق
وصورة جميلة شخصية
زهور وقلوب
ونظاراتا شمسية
ويتبرجل
يقوم شيلاهو هاشمية
ويبادر بي مسج ترحيب
حباب البيهو زاد النور
ده حقو الفيس يفُرشُو زهور
وجنِس هِضريب
تقول ضاربنو روسيه
تمر ايام بَعَدْ أيام
واسير الشوق صِبح زي قيس
مُرابط ديمة جوّة الفيس
يوم جِكّيس
يوم حنّيس
ويوم جِرّيس
ويوم فوق الرويس مطقوق
ولو السمحة قالت: هاي
قليبو يدق
حرارتو تزيد يقرِّب يبُق
يطقطق في الحروف ماكوك
واصابعو العشرة تطاقش
حرام يا ناس أكون مشرور
تلاتْ ساعات
ده ظُلْمِ وجُور
تقوم السمحة تتاقل تطنشو ليك
يكورك عووووووك
ألوووووووو
ألوووووووو
وين إنتي؟
وبعد ساعتين تقول معليش
مشيت مُرسال أجيب العَيش
قلتَ شنو؟
قلت الرووووب
تِعِبتَ خلاص
تمنية شهور وخمسة ايام
اعانيهم عذاب وهيام
وحبل الريدة صار مشبوك
متين يا فلانة نتلاقى ونَبِل الشوق؟
نَفُرْش الدايمة نتفاهم
نَزَعِّط للنجيلة نلوك
واخلي أبوي يلاقي أبوك
واااااي سجمي!!
أشوفك كيف؟
وانا القايلاك نبيه وحصيف!
أبوي والله يضبحني
وبي سكينو يسلخني
ولكِن كيف؟
يا سِت الكُلْ
أسوّي شنو وأيه الحَلْ؟
خلاص جنّيت وما بقدر
واخير تَرضِي وتَقُصْري الشّر
وإلا يمين أقوم أحرِن فِ نص السوق
واطُق الروري وادردق
واسوي فنون
واجيب كبريت وكم جالون
من البنزين
أسير الشوق
أسير الشوق
أقيف يا زول وما تكمّل
خلاص فرمل
كفاية جنون
وعاشق الفيس أكيد ملحوس
وعدمان الجُرام طايوق
واريت يا زول تسامحني
مُحَدِثَكمْ مِن الصّالون
محمد أخوك
