هذه التقاليد إلي متي ( 2 ) ؟!!!

بسم الله الرحمن الرحيم
هذه التقاليد إلي متي ( 2 )
عبدالغني خلف الله

لعل الجميع يلاحظ عزوف الشباب عن الزواج أو علي أقل تقدير تأخر سن الزواج ..ومعهم حق في ظل التقاليد المرهقة للعريس وأسرته ..قولة خير مثلاً ..ما الداعي لقولة خير وأنا أصلاً جاي أطلب يد كريمتكم وهذا في حد ذاته عمل خير ..لأخسر مبلغاً أحتاج في ما بعد مرحلة الزواج ..هذه ال ( قولة خير ) يجب أن تشطب فوراً من تقاليد الزواج ..غلاء المهور !! ..من وين لعامل بسيط أو سائق رقشه خمسين مليون جنيه ..؟ .. يجب أن يبدأ المهر بخمسمائة جنيه علي ألآّ يتعدي ثلاثة ملايين جنيه بالعمله القديمه ..وأن يحمله ثلاثة رجال فقط من أسرة العريس يقدم لهم شراب كركدي وشيء من التمر وتمنع المشروبات الغازيه والكيك والفواكه ..وتبعاً لذلك تلغي الشيله نهائياً ..ريحه وسكر وصابون ومش عارف ايه ..الشنطه تلاته تلاته بس مع تقليل الريحه والعطور وتحمله لأم العروس ثلاثه من النسوه يقدم لهن شوية كركدي وبلح لا أكثر .. ويلغي تبعاً لذلك فطور أم العريس .. أريتا ما فطرت .. شنو عربيه ملانه شيه وجداد محمر بالميات وكل واحده من الجايبات الفطور يهدوا ليها خاتم دهب وثوب فاخر وبالمقابل يلغي فطور رمضان لأم العريس ..الكوافير ..كيف يعني أمشي للعروس وألقي معاها عشره من صاحباتا لأدفع عشره مليون ..والحفلات تكون بالبنات بس مع العريس عشان الحنه وداخل البيت بدون مكرفون ..تقوم تجيك فنانه همها التعرف علي قبيلة أهل العريس عشان تصدّعنا بالشايقي دا والغرباوي دا والدقناله ديل ..تكريس فاضح للقبليه والجهويه باسم الفرح .هذا باختصار شديد ما أردت أن أطرحه وبالله عليكم يا آباء وأمهات خلونا من المظاهر البذخيه الفارغه دي وخلوا الشباب يكمل نصف دينه ويتلموا علي حبيباتهم ..مع كل الود .

عبد الغنى ليك تحياتى ...
السودانيين للاسف الشديد اصبحوا يعيشون تحت مظلة المظاهر والتباهى ااااااالخ ... وكل ذلك من الشيطان . المصيبه اصبحت تبدأ من رياض الاطفال والملايين التى تصرف عليها ! الاغنياء ( بقروشهم ) يعملوا الدايرنو ! وبرضو يدخلوا فى باب التبزير الشيطانى .. اما الاسر البسيطه بالام ( تكره الراجل حياتو ) لازم يدخل ولدها روضه 5 نجوم !!! حتى لو يسرق !
اما عن موضوعك الزواج وما اداراك ما الزواج فحدث ولا حرج والمصيبه الكبيره ان معظم الزيجات التى تبدأ ( بالبوبار والمظاهر) تنتهى بالفشل او المشاكل التى لاتنتهى الا بالطلاق ....
الحل هو الرجوع لتعاليم الدين الاسلامى الذى للاسف فارقنا طريقه !!!!!!!!!

عزيزي ود سمير ..الحمد لله علي الإسلام وتعاليمه السمحه ..لكن ما رميت إليه هو عدم تصعيب مهمة الزواج علي الشباب متوسطي الحال ..المهم يحصل توافق في المجتمع ..هيئات تدريس وعلماء دين وأئمة مساجد ولجان شعبيه والمرأة والشباب علي نظام اشبه بالكوره زمان وهذا لا يلغي حق من هو مقتدر في دفع وإهداء ما يشاء لأهل العروس ولكن بعد الإنتهاء من مراسم الزواج كذلك لا نلغي دعوة العريس وأهل العروس علي أن يتقيد الجميع بموعد الدعوه .غداء يعني غداء وما نجي نتكسر من دغش الرحمن لغاية أواخر الليالي .مع أمنياتنا لكل الشباب بالتوفيق في الزواج مع كل الود .