يوميات سوداني وزوجته في رمضان
وبدات الشمس تزداد حرارتها بسرعة غريبة كانها تستعجل الرحيل حتي قاربت ال45 درجة رغم ان اليوم لا زال في اوله وبدون مقدمات ضمن تلك السخانة اللامتناهية تنقطع الكهرباء فجاة ليعم الصمت في الكون ويتحول المنزل الي قطعة من جهنم وينعدم الهواء الا من بعض انفاس تاتيك من وراء الجحيم وابرار قد انهكها التعب والترحال في رحلة الشتاء والصيف ما بين البرندة والجلوس في ضل الميزرة في الحوش وبين لحظة واخري تبلل ثوبها بماء الازيار البارد ورغم كل ذلك كانت كل محاولاتها تبوء بالفشل وفي كل لحظة تشعر بزيادة الحرارة وهي تسب وتلعن في سرها ادارة الكهرباء والحكومة ومن اخترع الكهرباء دفعة واحدة
فجاة يرن هاتفها لتجده زوجها فتبتدره قائلة ميرغني عاين الكهرباء قاطعة والبيت ما بنقعد انا بمشي ناس امي انوم هناك وبعدين تعال سوقني
ميرغني ناس امك شنو انا ضربت ليك عشان اقول ليك في كم نفر عزابة معانا هنا في المكتب حيجو معاي الفطور وقالوا بحبو القراصة عشان ترميها ليهم بعدين
وهنا لم تتمالك ابرار اعصابها فانفجرت فيه منفعلة يقرصك ان شاء الله الدبيب اليلحقك حبوبتي اقول ليك تعبانة ماشة انوم تقول لي دمعة الدمعة الما تلقاها وميرغني علي الطرف الاخر وقد الجمته الدهشة وهو يحاول ان يتمالك اعصابه ونبرة صوته ابرار مالك في شنو جنيتي اللهم اني صائم ابرار مالي ما بجن حسي عمايلك انت وكهربة السجم دي ما بتجنن يحرقكم الاتنين في يوم واحد حسي دي سخانة يقطعو فيها كهرباء ولا يعزمو فيها عزابة كل يوم عزابة عزابة عذبتني وكرهتني رمضان
