المشاركة الأصلية كتبت بواسطة admin
الانترنت اكثر ما يؤرق مغترب المدينة .. ورغما عن توجهات الدولة الالكترونية .. وسعيها الحثيث لزيادة وعي المواطن وتطويره الكترونيا باتاحة العديد من الخدمات والدفوعات الكترونية .. واحيانا اجباره بجعل المعاملة الكترونية فقط كالتقديم للجامعات هذا العام.
رغم كل ذلك فالانترنت سئ جدا .. مهما كانت الشركة المستخدمة .. بطء شديد يصل احيانا حد التوقف التام خلال ساعات النهار .. فقط في ساعات الصباح الاولي يمكنك الاستمتاع بالسرعات العالية.
يرجع ذلك للاعتماد الكبير على انترنت شركات الاتصالات المحمولة 3g .. مع انو الفي السودان دا ما محصل نص g .. يقابل ذلك تناسي واندثار خدمات الهاتف الثابت .. مع انو الهاتف الثابت كما تعلمون هو من اهم مقومات البنية التحتية ... خصوصا خدمات الانترنت دي سوى كانت دي اس ال عادي ولا فايبر اوبتك.
المهم العايز انترنت صاقعة وسريع ومستقر اركب خدمة انترنت دي اس ال في البيت ويعم ليهو راوتر واي فاي يغذي البيت كلو .. والعابز يجرب يمشي محل اخونا ومشرفنا الهمام .. ياربي انا وين .. في عمارة عباس كنين .. بين قوسين ابتسامة وتحتا خطين ..
لكن ما سالتوني الانترنت حق الهاتف الثابت دا بي كم؟ عشان سوداتل ما قاعدة تعلن عنو وتروج ليهو .. اها الانترنت دا سرعة واحد ميغابيت بس بي 750الف .. والله صحي .. ااي في الشهر .. لا من ناحية سريع طيارة بس .. لكن بي 750الف في حين انا راتب المعلم في مدرسة مكي الطيب الخاصة 500الف .. والله صحي .. وراتب الطبيب في مستشفي مدنى في حدود 800الف .. و انترنت بسرعة 2ميغابايت في الدوحة بي 250ريال يعني 575الف .. يعني الانترنت في قطر ارخص من مدني .. والله صحي .. بعدين هو الانترنت دا شغال بي بترول ما ياهو سلك في الارض جاري نت طوالي .. كان شلنا منو كان خليناهو ياهو .. غالي لي كدا ما تعرف .. دي على فكرة بسموها جرسة المغتربين.
باختصار لو مشيت السودان وعايز تدخل نت اشتغل بي حق اليوم باليوم اوعك تشترك شهري .. بموت ليك وتاني الا تمشي عباس كنين.
