عرض للطباعة
يا مستنى جية الليل عشان تنضارى فى الأشواق
تفيض دمعات عيونك سيل يخونك ضلّك الرقراق
يقيف خاطر غُناك مشلول وقدُر طول الليالى فُراق
ولا بترجعبك الأيام سنين قضِّيتا فى ريدو
منو القبلك رِجا الأحلام وأخيراً جات على إيدو
براك تحصد رَجاك آلام على جمر الهوى الحرّاق
( الشاعر محمد الامين ) ..
مشاققة :
كدي خلوني اتضاري في شوقي شوية ..
يا مستنى جية الليل عشان تنضارى فى الأشواق !!
..
وكأنه ( يخاطبني ) بيْد انّ الاشواق تجتاحك ضُحي ,
( الليل ) وايُّ ليل هو ؟ ليل طويل الساعات وسلحفائي الخطي ,
هو ليل ( الغربة ) , نوعية الشوق البيقتحمك براااهـ مابيشبه
بقية الاشواق ( المؤقتة ) , كتلك التي تتحمّل التصبينة قيد ساعات او ايام
ولكن هنا بتنوم بيهو وبتصحي عليهو , حتي في احلامك بيزاحمك
يغشّك بشوية رؤي , سويعات ويتلفّحك من جديد ,
تغشاك فرحة تفحصها تلاقيها ناقصة شان الشوق مباريك
في كل خطاويك , تحاول الفكاك منه ولكنه عصي وعنيد ..
و
ياليل أبقالي شاااهد ..
ولا بترجعبك الأيام سنين قضِّيتا فى ريدو
منو القبلك رِجا الأحلام وأخيراً جات على إيدو ؟؟
...
ياخ الشاعر دا زول بتاع وجع بس , يجدع ليك حروف تلاقيك متوسّد مضمونها وعايشو
لكن لسة فيك بواقي عشم ( عشم باكر ) , باكر الضّوّاي , هو قاليك انحنا لو بارينا
الشعراء ديل بي ( وجع حروفهم ) البيجدعوها لينا دي علي الجزيمة كان رحنا فيها
ياخ خلّوا فيها ولو ( رقراق ) أمل , شوية عشم ياخ , الايام لو مارجعت ممكن
تتكرّر , وممكن الاحلام تجي علي الايد , ماتصعّبوها ياخ وتقفلوا كل النفاجات البيغشانا
منها الفرح , الريد , العشق , بتاع زمان , مريود زمان , حيث الريدة البِكْر
الماها مغشوشة ..
......
براك تحصد رَجاك آلام على جمر الهوى الحرّاق !!
..
عاين أنا داير اقوليك حاجة , انا عارف ان آخر العلاج الكيْ
وعارف كمان وجع الانتظار وكتين يخليك تساسق في المحطات
الموانئ , والمطارات شان تجي و( تلاقيها ) , وهنا الالم يكون لذيذاً
بعض الشيئ لانّ كل الاحتمالات فيها بواقي عشم ,
انا بقول كدا لاني متفائل , بس مقتنع بكلامك دا اقتناع تام
ولم أزل متفائلاً ..
ودالضو أنك تجيد قرأة ما بين الحروف التي تلامس فيك أشياء بداخلك اثر عناء غربتك وشوقك لكل الذين تحبهم في وطنك الصغير لذلك أراك تبدع في سرد تفاصيل مليئة بالحنان والشجن وحقيقة المعاناة تولد الابداع كما يقولون..
صديقي دعني أجلس هنا لأرتشف قهوتي هذا المساء بركن حرفك الذي يسعدني كثيرا ودمت بكل الود.