ودمدني كانت ايام جميلة العرس زمان

ودمدني كانت ايام جميلة
العرس زمان
عرس فلان باقي ليه اربعين يوم مانبداء القيدومات - ياخي خلي باقي شهر ونبداء -هذا الحوار دار بين اثنين من اصدقاء العريس يا اخي الموضوع دا مش على شلتنا حقت نادي علم الوطن بس ناس نادي الرابطة ونادي الشاطي ونادي النيل كلهم قالوا ماتبدوا المهرجانات .
في بيت العريس وفي الديوان والحوش المعا الديوان تراهم جلوسا شلة وشلة وكل مايمر الزمن تتعالا الضحكات ونحن نظرنا مركز على الفاضي وخاصة الزجاجات الزرقاء لان سعرها اغلى شوية .
ناس البيت في الداخل مشغولين بحلة اللحمة الكبيرة وحلة العيكوا كل شلة عندها نظام عشاء خاص تم التوفيق بينهم والاكتفاء بالصنفين المذكورين مع المزات الكثيرة وسلطة الروب بالشطة القبانيت الحارة .
جابوا معاهم الفنان وهو يحمل العود وبداء الطرب وبداء الهجيج والتبشر ووضع الكباية او الكاس على الراس والرقص به .
همنا كله ونكاد نقول لهم اشربوا سريع وادونا الفاضي بالله شوف فلان دا خاتي القزازة وهي لي نصها ونام نصحيه ولانضربه بي حجر دا خلاص استوى شيل القزازة حقتوا بالراحة تعال بي جاي طبعا دا كلام اكبر واحد فينا وهو القائد لنا كدي النضوق هكذا قال لنا واخذ شرفة من تلك الزجاجة سرعان ماقذف بها خارج فمه وهو قائلا الناس دي بتشرب الشراب المر دا كيف .
ياجماعة العشاء - صاح واحد من الشلة القاعدة جنب الباب في دقائق طلعت ستة صواني الجماعة نضفوا الصحانة حتى الوردة المرسومة على قعر الصحن عذبوها اكلوا كويس ومشوا بدون مشاكل او شكله .
جمعنا القزاز الفاضي ودسيناه حتى الصباح عندما يمر عمنا بتاع القزاز ونسمع ذلك الصوت المميز بتاع البوري وكلامه الذي يصل الي اذاننا المعاه قزاز وهو يمر بالقرب من بيوتنا اكيد عنده خبر عن كمية القزاز المتوفر في هذا البيت .
هذا البرنامج يتكرر يوميا لمدة شهر قبل الزواج تزداد الشلة وينضم ناس جدد وتزداد حصيلة القزاز الفاضي من كل الاشكال والالوان ونحنا تزداد القروش في جيوبنا .
العريس والعروس ابناء خالات لذلك كلامنا وزكرياتنا عن بيت العريس والعروس واحد .
وقفت عربة الكارو امام بيت ناس العروس وهي تحمل تلك الشوالات والكراتين برفقة نساء وبنات يحملن الدلوكة والستم وهن يسرن على رجليهم تتبعهم تلك العربة وهي تحمل شنط الثياب والريحة برفقة ام العريس وبعض النساء كبار السن ممن لايستطعن السير علي رجليهم .
في اليوم التالي بداء اهل العروس في تجهيز اول خطوات الاستعداد للعرس بداء تقطيع البصل ووضعه في تلك الصواني الكثيرة ايذانا بتحميره هذا العمل تقوم به نساء متخصصات في العائلة .
جات حاجة حفصة واعطيت جوال العيش لكي تغسله وتنظفة وشره في ذلك البرش الموضوع علي العنقريب وارى تلك الطوبات والتى يتم بها تثبيت البرش من اطرافه .
طاحونة الخواجة في ام سويقو بتدقق ناعم ونظيف حجارتها جديدة كلم الاولاد المعاك ديل جيبوا ليكم كارو وامشوا دققوا الشوال حق العيش دا وكلموا سيد الطاحونة يدقق ليكم بعد عيش يكون وزن عشرة .
انتهينا من المهمة سريعا وعندما حضرنا الي البيت وجدنا كل البصلة قد تم تحميرها ووضعت في جرادل لحفظها .
حضرت اخوات العريس ومعهم بعض صاحباتهم وذلك لاخذ العروس الي الترزي لاخذ المقاسات وتفصيل هدوم العرس على مااتذكر في ذلك الزمان كان الاشهر هو فؤاد الترزي وعوض موسى اتي بعدهم بفترة عبدالعزيز سوسن بالقرب من عمارة مضوي بالقرب من مركز الشباب او بينه والسينما الخواجة والترزي الحريري في الدرجة فاتح على كلية المعلمات من جهتها الغربية وبعدهم الترزي دريبو والترزي بابكر بالقرب من جامع الحكومة .
والله علوية قالت عندها دبس وبقت مابتقابل النيران ومابتقدر تعمل كفي للدلكة والبخور وعمل ريحة الخمرة وكمان المسك هو البهيج ليها الدبس هذا الدبس هو بلغة اليوم الحساسية قالت ليهم علوية والله اخر مرة ريحة ناس ود محجوب من المسك لغاية ماشمموني المعراكة حقت الصاج من الدبس .
خلاص ياجماعة خلوا هجوة تعمل الريحة بدل علوية جهزوا ليها الحاجات لكن هجوة دي اقيفوا معاها ونظفوا ليها الضفرة شديد شوية لانها مابتهتم بيها ودا بغير ريحة الخمرة سامعين الكلام دا يا بنات دي جدتي تخاطب بناتها وبنات اختها .
صار منزل العروس كانه خلية من النحل كل شوية تجي واحدة من الجيران داخلة هي ماعندكم خدمة نعملها ليكم تعالي يا السرة غسلي العدة دي واكفيها في العنقريب داك حمار العدة انكسر قعدت فيه عطيات تعالي يا سميرة ومعاك فتحية غسلوا عدة البترينة عندكم العناقريب في الاوضة ارفعوا منهم المراتب ورصوا العدة فيهم حتي تنشف وهاكم ورق البترينة دا اشتريته من الزيارة افرشوه في البترينة قبل ماترصوا العدة تاني .
ناس فائزة وبتول قالوا خلوا ليهم فتح الفطير هم بسووه – السكسكانية مشت السارة بالقرب من فريق الحلبة سوف تعمل ليها ثلاثة جرادل كانوا يصنعون السكسكانية عند عائلة اشتهرت بذلك .
تم شراء ارطال لبن زيادة من احمد سيد اللبن لزيادة كمية الروب وذلك لعمل ملاح الروب لقدح الصباح يوم الصبحية – ملاح ام دقوقة او التقلية لحمته الشرموط جاهز ومنشف ومدقوق ومحفوظ في علب الحلاوة الفوق دولاب المطبخ .
العروس قاعدة عند الجيران ليها عشرة يوم شغالين فيها عرك بالكسرة المصنوعة من دقيق الذرة ومعاها زيت السمسم والدخان كل يوم شغال حتى اصبح جسمها وخاصة رجليها ويديها عبارة عن طبقات طبقات من الدخان مافي حاجة اسمها كريمات تفتيح ولم تكن معروفة وجه لونه طبيعي بس الحبسة والابتعاد عن الشمس بعد فترة طويلة ظهر كريم اسمه امبي صار يتغني به للفتيات بان امبي ظلطها .
بكرة مشاط العروس تتجمع الفتيات والنساء الكبار في السن العروس شعرها قصار لابد من شراء سلة وهي الشعر المستعار من الدكان عشان يتم عمل وصلة به تاتي المشاطة وكن معروفات بالاسم في احياء ودمدني – الجعلية وبتول بت صالح – وفاطمة ام مسرة والكثيرات في معظم احياء ودمدني في ذلك الزمان .
المشاطة بتجيب معاها المخرز حقها وهو المستخدم في عملية شق الشعر وتجهيزه كشعرات صغيرة لضفرها بطريقة معينة ولازم يكون في كورة فيها مووية شاي بارد للتسليك .
ماكل العروسات بتمشطن البعض منهم يحب التسريح وخاصة بعد تقدم الزمن وانتهاء الشلوخ ودق الشلوفة – العروس تقول عايزة تسريحة قوجة وفوقها تاج فضي لم تكن هنالك كوفيرات البنات يسرحن لي بعض ومجاني والحنة كانت بسيطة اكثرها الفسطون او سبعة وثمانية ومافي حنانة ولا صبغة ولا حنة عروس في صالة .
اليوم حنة العريس والعزومة حقته اليوم الاربعاء العشاء ضلع لم يكن هنالك طباخين اهل العرس والجيران هم من يقومون بطبخ هذا العشاء – نادية هي من يعمل الكباب – ودرية تعمل الكمونية وعزيزة عليها طبيخ الفاصوليا البيضاء وسكينة تحمر الضلع ومريم تعمل ملاح البامية وفاطمة عليها ان تلائق شوربة الضلع بالويكة ونبيه وسعاد عليهم عواسة الكسرة وسهى ونادية عليهم عمل الخشاف بتقطيع الموز وعمل عصير الفراولة واضافته للموز في الجرادل الخاص به .
تعال ياولد جيب الابريق والصحن دا غسل للجماعة عشان العشاء- غسل للناس الكبار اول حاجة وتعال يامحمد امشوا جيبوا الصواني حقت العشاء وانت ياعمر رتب القعدة تكون في الصينية عشرة اشخاص رص الكراسي كويس .
تعال يا معاذ ومعاك دفع الله هاكم الكراس وعلبة الحلاوة والقلم دا اقعدوا هنا امسكوا الكشف حق العرس .
تعال ياولد بي جاي خلي عمك دا يقعد يلا ياجماعة شوفو الضلعة دي اول – كان الضلع يطمئن ومقطع كبار – الكسرة دي خلوها تحلية في النهاية دي شوربة خمسة خرفان مركزة ومن التركيز فيها طعم حموضة .
خلاص ياجماعة العشاء انتهى كل الناس اتعشت امورقوا عنقريب الحنة ورصوا الكراسي للحفلة بتاع المكرفونات ياهو داك بركب فيها .
جيبوا صينية الحنة الفيها الجرتك وصحون الباشري الكبيرة وتعالي ياحبوبة العريس عدلي ليه انا والله يااولادي مابعرف طيب خلوا بت العمدة التجي تعدل هي – كانت هنالك نساء مشهورات في كل عائلة يعهد لهم بتلك المهمة العديلة يابيضاء العديلة تثدمه وتبراه
اهل العريس المقربين وكذلك اصدقائه مابدفعوا في كراس الكشف وانما يدفعوا عند وضع الحنة للعريس ويتم اذاعة اسمائهم بالمايكرفون .
فلان الفلاني عشرة جنيه وتسمع زغاريد عالية من اخوات وامهات هذا الشخص وفلان الفلاني خمسة عشر جنيها وكذلك زغاريد ارفع صوتا من سابقتها وهكذا الي ذكر كل اهل العريس واصدقائه المقربين .
بعد الساعة الثانية عشر تبداء الحفلة لو الحال متيسر فنان من العاصمة او فنان من مدني اذا الظروف قارصة شوية تستمر الحفلة حتى طلوع الشمس من جهة الشرق وتختم دائما باغنية ياحمامة مع السلامة - ماكان في طوف ولابوليس يفرتق الحفلة بعد نهاية الخفلة بكون شاي الصباح قد تم تجهيزه وبعد داك نومة حتى بعد منتصف النهار والغداء جاهز طبعا في ناس بكونو فطروا بي قدح الصباح وبعده النوم ,
الكلام دا كله يوم الجمعة يوم الصبحية الناس قاعدة وكمان عشاء ونوم ومقيل يوم السبت حتي العصر حيث تذهب السيرة بالبصات الي جنائن جزيرة الفيل والعودة بعد المغرب وذبح الحلالة وعمل اللقيمات واللحم والفواكه .
خلاص ياجماعة مبروك وبخيت وربنا يديم الافراح مع السلامة امرقوا يابنات قدموا الناس ديل وبعد قليل يخلوا البيت من الحركة وتبداء طقوس ثانية وهي ادخال العروس الي العريس في غرفة نومهم واصطلح على تسميتها بيوم القيلة يكون الليل ساكن والهدوء يلف المكان تاخذ العروس وهي مغطاة بالفركة ويدق الباب للعريس والذي يكون متواجدا بالغرفة استعدادا لمباشرة علاقته الزوجية بصورة فعلية ماكان في حاجة اسمها فندق ولا شهر عسل في هذه الغرفة كان يتم كل شي بعض النساء كن يسترقن النظر عن طريق رقراق الشبابيك والباب - ومن كان يكون صاحيا في ذلك الوقت المتاخر قد يسمع بعض اصوات الصياح سرعان ماتتلاشا مع سيطرة النعاس علي الكل .
هذا ماكان من الماضي التليد فكيف يكون المستقبل وماذا سيفعل ابنائنا في المستقبل وكيف سيكون شكل العرس للاجيال القادمة .