ودمدني كانت ايام جميلة المنطقة الصناعية ( 3 )

ودمدني كانت ايام جميلة

المنطقة الصناعية ( 3 )

كم بدوك في المنطقة في اليوم لا والله المعلم اتفق معانا يدينا بالاسبوع كل يوم خميس خمسة وعشرين قرش اسمه حق الصابون معنى كدا يامعلم يوم الخميس عازمني عشاء في الحلواني باسطة وزبادي من حلواني الخواجة طبعا سوف اتخيل كورة الزبادي المصنوعة من الخزف ذات اللون البني والجرسون يخرجها من ثلاجة الخشب ذات الابواب الزجاجية واتخيلت الخواجة صاحب الحلواني جالس على ذلك المكتب يدخن السيجار في .... السيجارة زي مابقولوا .
طيب ياصاحبي مابدوكم حاجة تانية في الورشة الشغالين فيها دي - والله المعلم بفطرنا كل يوم فطور مدنكل من مطعم فتحي فول بالصحن الكبير وملخبط معاه طلب بتاع كمونية – واها المعلم بفطر معاكم لا بجوه اصحابه بمشوا يفطروا في السوق الكبير .
طيب اصبعك دا مالو انضربت فيه متين – دا امبارح كنا بنزل في ماكينة مع المعلم انضرب اصبعي المعلم قام طوالي فتح الباكم بتاع زيت الفرملة وغمس اصبعي فيه كلام والله .
لو عاوز ليك أي وش بتاع راس او وش ماكينة او وش كارتيل من الفلين ومالقيته في محل الاسبيرات امشي بي قلب قوي الي ورشة الحاج محمد عثمان ابوخنيجر هنالك تلاقي ابنه الرجل الاجتماعي الظريف عبدالحكيم لو داير أي وش بدقه ليك .
نمر بي ورشة عمنا محمد عبدالفضيل المحاريت دي شنو المرمية بره بمختلف المقاسات طراد وحرث عميق وناثرات السماد – المعدات الزراعية وتصنيعها هو تخصص عمنا محمد عبد الفضيل .
سمعنا ان عمنا محمد ابوجبل صنع ليه طيارة في الورشة حقته وقالوا البوليس جاء منعه من تكملة صناعتها او هكذا كنا نسمع ونحن صغار –كان ودابوجبل رجل عبقري ابتكر الكثير من الاختراعات في ذلك الزمان .
ارتبط اسم المنطقة الصناعية بي اسم عائلة الكومي الريح الكومي وبقية الاسرة لهم علاقة بي ناس شيخ العرب كذلك ارتبط اسم الكومي بالطبيب خالد الكومي طبيب مشروع الجزيرة في مستشفي مدني في فترة ما .
مهنة السروجية او تنجيد العربات هذه المهنة محتكرة الي ال قدورة دائما مقرهم بالسوق الكبير وان توفر لهم محلات في المنطقة الصناعية في فترات ما اشهرهم هو العم تاج الدين قدور وابنائه فتحي وعاطف ونبيل والدتهم من ال الرفاعي وايضا مصطفي قدورة والد سمير - والطريفي وخالد قدورة هذه المهنة مقفولة لهم .
كنا نرهم وهم يلبسون الاردية كانوا مشهورين بهذا ه الاردية .
كان عبدالله جون مشهور بتشجيع النادي الاهلي ويحضر يوميا الي النادي وكانت له طرائف كثيرة خاصة مع لغته العربية المخلوطة مع لغة الدناقلة – كانت الي عبدالله جون ورشة كبيرة في المنطقة الصناعية كان اذا اعجب بي لعب لاعب في الاهلي في مباراة يقول له بعد انتهاء المباراة بكرة يجي ورشة بتلك اللغة العربية الممزوجة بلكنه دنقلاوية .
ورشة العم عوض عبدالله الشافعي ورشة جبريل . واسطا فيصل والحاج النجومي والحاج عبدالحليم ومحمد امين والسنجك ومحمود فارس.
اتذكر واحد اسمه جومو اظنه من جنوب السودان كان المتخصص الوحيد في صيانة العربية الفلوكس واجن ( القوعونجة ) دائما كان غير موجود في محله واذا وجدته تجده مصلح ووازن علي طول .
من الاسماء والتي لها وزنها في المنطقة الصناعية ناس عبدالله شاني وذلك المغلق الكبير .
نواصل ان شاء الله .