قصيدة ( الحلم الاخير ) شعر محمد ابوالسعود يوسف سوريبه

الحلم الأخير
(1)
فاكرانى بقدر أعيش
براك ...
بعد ما فات الأوان
وبنيت عليك كل الأمل
فاكره إنك بالعناد حاتلقى حَل
ما أظن ... مهما حصل
لأنو البينا أكبر من كده
لا قصه ناتجه عن فراغ
لا بدايه بائت بالفشل
كل الحكايه حب شريف
محتاج رِعايه وهدهده
وشويه من نور الأمل
آه لو تعرفى الحال بدونك
يائسه كاسيها الخجل
لا كنت من غيرك أكون
لا قدرت من غيرك أصل
فاكرانى بقدر أعيش براك
**
(2)
ياما فكرت ولقيت
إنو حُبك لى أجل
لا منو نجانى الهروب
لا فيه لاقانى حل
فاكره إنو البينا مخفى
ماهو باين في المقل
قصه مّداها الزمن
عبر السنين
مُشوار عذاب
وإخترت أمشيهو الطريق
كان إختيار قلبى الحزين
لى سكتك قام إرتحل
من غير ... رجوع
من غير ... ندم
حتى لو طال الزمن
لابد يوم ألقاهو حبى
مُنتظر رسم المحَل
والمحل قلبى الجريح
البيك عايش في جحيم
طول عمرو لا نسى لا جهل
فاكرانى بقدر أعيش براك
**
(3)
يا ربى لي متين العذاب
حا يكون طريدى في كل محل
قلت أنساهو الوطن
فتشت ليك في كل كون
حتى أوكار الطيور
بين الغصون
والفي سماهو سألتو
عنك ...
نجمه نجمه وكل كوكب أكان
بهل ...
حتى القمر بعد الوصف
عنك سأل
وإحتار معاى وين المحل
يا ربى هل من عوده هل
أكون معاك وتكونى لى
حُلمى الأخير خلوها لىّ
حابيها من زمن الجهل
غيرها من وين لى أعيش
ما دام مسطر في الأزل
رغم ده برضى راجع
وليك بقول من غير ملل
فاكرانى بقدر أعيش
براك





محمد ابوالسعود يوسف

كلام جميل جدا
كل عام وانت بخير

يديك وانت بألف خير وعافيه وعام سعيد علي الجميع
ان شاءالله مع كل الود