ودمدني كانت أيام جميلة العودة إلي الحضن ألدافئي

ودمدني كانت أيام جميلة

العودة إلي الحضن ألدافئي
=======================================
لحظة في مدني تغسل عن بدني حزني وتمسح كل تلك الجراحات والتي نحملها في دواخلنا والتى لاتبدوا ظاهرة للعيان ولكن يمكن مشاهدة اثارها ظاهرة على عيوننا .
هل يرجع ذلك الزمن الجميل تغيرت الصورة تماما الوجوه غير الوجوه المالوفة والتي تعودنا ان نراها اصبحت المدينة مليئة بالاغراب والتي تبدو العجلة عليهم وهم يمرون من امامك اين ناس مدني واين اولاد مدني .
وين ناس فلان ووين ناس فلان تكون الاجابة صادمة لك - ياحليهم ديل من زمان مشوا الخرطوم وراء كسب لقمة العيش المدينة بقت طاردة لاتوجد وظائف ولاتوجد تجارة زي زمان زي ما انت شايف بنجي نتونس ونجتر ذكريات جميلة عشناها مافي حاجة .
لكن مامعقول ناس فلان خلوا مدني ديل اخر ناس ممكن الواحد يتصور انهم سوف يغادرون المدينة بعد كل ذلك العز والدكاكين والبيوت يا اخي اسكت ديل مارسوا معاهم ناس الحكومة سياسة جبانة وتدمير لكل مايملكون بمنافسة غير شريفة في مجال التجارة التي يمارسونها واجهزوا عليهم بسلسلة طويلة من الجبايات متمثلة في ضرائب لم نسمع بها وما انزل الله بها من سلطان وفرض زكاة تخالف شرع الله والحكاوي والنماذج كثيرة انه شئ مخجل .
طيب فلان داك وينو كان مضرب المثل شباب دائم واخونا المغترب في الامارات لما جا بعد عشرة سنين لقاه ياهو ذاتو ما اتغير فيه شئ وقال ليه قولته المشهورة انت يا فلان كنت مقرش يعني زي البوكس البقرشوه سنين طويلة وبعدين يطلعوه .
ياخي والله فلان دا الكان زي الجبل ماتهزو الريح لو شفتو بقى مهلهل الزمن بقى قاسي .
يا خي قابلني واحد لابس جلابية وسخانة وقاعد جنب مطعم كشك وقاعد براه الشبه دا ماغريب عني لاحول ولا قوة الا بالله دا ما ود ناس فلان الكان زمان قيافة ولبييس ومهندم جار عليه وعلى اهله المشهورين الزمن .
زمان كان اولاد مدني يعملون في الري والاشغال ومشروع الجزيرة نعم كانو بمشوا الشغل فقط حتى الساعة الثامنة صباحا وبعد داك تعال شوفهم عند كشك في السوق الكبير وتاني مافي رجعة للشغل واخر الشهر الجيوب مليانة ومتصرفين ومرتاحين لكن الان ماذا حصل حتشوف العجب العجاب تلقاهم شلل شلل قاعدين في دكان ناس فلان من الصباح وكانهم في يعملون في هذا الدكان بس قرائة الجرائد والرياضية منها وحل الكلمات المتقاطعة وكلام عن احوال ودمدني لايخرج من محيط الدكان والذين يجلسون فيه شباب لاحيوية ولاطاقة فيهم استسلموا الي الامر الواقع زي ماشايف مكسرين وقاعدين وبعدين انا بعرف مجموعة منهم كانت بتسافر الي مصر تجار شنطة - انت من الزمن داك ديل خلوا كل حاجة واصبحوا معتمدين علي اخ او اخت مغتربة برسلوا ليهم كل شهر حاجة والمهم والاهم الموبايل الجلاكسي وتعرف كمان الكلام البتكتب فيه دا بقروه بتلك الموبايلات لو مشيت بي مكان تجمعاتهم ما تستغرب اذا قال لك احدهم اديني حق الرغيف انا ماشي البيت الساعة الان خمسة عصر انتهى وقت الجلوس في برندة ذلك الدكان المشهور يعني وقت العمل انتهى .
طيب ناس مدني اصحاب الدكاكين مالهم قاعدين في برندات دكاكينهم والناس الاغراب القاعدين جوه الدكاكين ديل منو تعرف القاعدين جوه الدكاكين ديل منو لقد اصبحوا هم اصحاب الدكاكين اغلبهم اشتراء هذه الدكاكين ونسبة بسيطة منهم يستاجرون ناس مدني خلوا التجارة زي ماقلت ليك قبيل عوائد وعتب ورسوم محلية وحاجات عجيبة كمان احكي ليك في الاحياء في ناس فتحوا دكاكين في بيوتهم ولكن للاسف هذه الدكاكين لاتفتح الابعد الساعة الخامسة مساء خوفا من المحلية ورسوم المحلية .
طيب قاعدين تمشوا الاندية وتتفرجوا علي التمارين انا كنت زمان بمشي نادي الاهلي من العصر واحضر التمارين واقابل الاصدقاء وتلك الحكاوي الجميلة ولو في كورة نمشي دار الرياضة وبالعدم نتعشى عند احد من المشهورين بعمل الفول الكارب والمويه البارده طبعا دي كانت اهم شئ ياخي والله انت قديم الكلام دا كان زمان يا اخي الزمن دا الكورة الناس خلتها وقصة عشاء دا بقى مافي تاكل المغرب غداء وعشاء .
طيب داير لي محل الاقي فيه ناس مدني شوف ناس مدني لايجتمعون ولا يتلاقون في الوقت الحاضر الا في المقابر عند دفنهم لعزيز لديهم يا حليلة مدني وياحليل ناس مدني .
دي سياسة تهجير بطريقة غير مباشرة بالضغط علي الناس في وسائل كسب عيشهم واحلال ناس مكانهم يمتازون بالولاء والطاعة المطلقة انها سياسة تجري ونحن نشاهد ذلك ولكن السلبية وموت القلب والذي اصبح يميزنا جعلهم يتمادون ويبتكرون كل يوم وسيلة جديدة ونحن رايحين - هل ننظر جيدا ام الغشاوة قد سدت اعيننا ام قد تبلدنا وركبنا كلنا في مركب بدون اشرعة او مجاديف تتجاذبنا الرياح وتسوقنا الي المجهول حتى يأتي المنقذ والذي تاخر كثيرا .
يا اخي والله اصبتني بأحباط ومسخت علي الاجازة انا بكرة بسافر وارجع حتى ينصلح الحال اقول ليك مع السلامة - كدي اقيف قبل ماتمشي اديني حق الرغيف

https://www.facebook.com/video.php?v...type=2&theater