كلم قليبي

كلِّم قليبي

كلمتو جد واللهِ
كلَّمْتَ الرهيف جواي
كلمتو يا ست القلب
يا الرايقة
كلَّمْتَ سيد روحي البحبو سُراي
خليك من الحُسّاد
يا حلوة
وسيبك من البتضارى داك العمرو ما سَوَّاي
إنتي الليك انسراح الشوق
مطر رشاش
بَرَاحْ نَمَّاي
يهدهد فيني جمرة نومهْ
أَيْ والله
وإنتِ معاك الكُلْ يوم
يرقى ويرف الجوف
ويزحف زَيَّ الغِرِقْلُو في راي
أهواك إنتي في كل لحظة
وبيك الغربة العنيدة بتصفى
وتَعْدِلْ نجومها سماي
إنتِ الشروق يا قلبي
رغم الغروب دا
وسُحْنتو الوَدَّاي
إنتِ الجنان الهادية
وإنتِ النسيمة السارية
وإنتِ النسيم رساي
إنتِ الوطن محياكِ
وإنتِ السكون يا حبي
ليَّا براي
وإنتِ الثورة بيك انمهرت وضوت دروب الفرحة الحققت لِ مناي
يا أغلي ما في الكون
يا صُرتي الجواي
بيك النجوم مطيوبة
دايماً وارفه
ما إنتِ الطيوب لَمَّاي
يا نغم القلب يا خالدة
مين يشبه علاكي حِداي
ومنو البقدر يصدك
عن بحور صبري الشريفة
الهامت سنين راجياك
تخت الشوق
تشيل ضل الشقا الحَرَّاي
آااااه من سفر الليالي المُرَّة
شَدَّاد الخطى الشواي
كل المراسي قليبي تب مابيها لااااااامن وصل مرساكي
راق من يومو
خف عذابو
واتلقاك بالورود
يا السمحة ضي ابوابو
ضاق الراحة
مسك الجنة
ذاب في عبيرها
ومن يوميها رقَّ خطابو
وحَضَنَ الأماني وطيفا
غنى الأمل وشبابو
شفّر ليالي الوحدة
رد الهموم الشابو
ودع ليالي الغربة
خنق السهاد وعذابو
وعادت صباحاتو التشابي وغنى البلوم في رحابو
دندن نغيم اللقيا
فرهد قدم
عزف النغم
فات زي حُولو اللسا يتشهابو
وَسَبَحْ يمد في فرحو
المن بدري كان حَسَّابو
وسرح في جنتو الكايِسلا سنوات الهوى وتيرابو
نمنم بالأمل زفراتو
فك الرسن في رحابو
وغِرِقْ في الشوق
وَعَبَّ من الغرام وَعَقَابو
سالت ينابيع الفرح
دفاقه
سارِح معاها ترابو
يا خالدة يا أجمل هدية اتلقاها الرميش في هضابو
مرحب حباب الطلة
وبيك سمح الفرح دا حبابو
حياك القليب يا ستي
أَلْف حبابك إنتِ
وأَلِفْ كمان لحبابو