عرض للطباعة
الموضوع :.. زواج المغتربين
اخواني لقد سمعنا ومنا من راي احد المغتربين يتزوجون عن طريق الفيديو لمشاهده البنت عن طريق شرائط الفيديو من مناسبات الزواج والافراح الاخري او ارسال صوره العروس التي اختارتها له اخته او امه وهو لم يكن قد شاهدها من قبل
هل توافقون علي مثل هذه الزيجات ارجورائكم بصراحه وهل هي ناجحه واذا امكن ذكر التجاب التي سمعتو عنها او شاهدوها؟
وهل توافق ان تتزوج بمثل هذه الطريقه ؟
وانتي اختي مارائك في الموضوع؟ واذا تقدم لك مقترب ولم تشاهديه من قبل فقط عن طريق الصوره ماحكمك؟
لكم كل الود
والله انا غايتو شايف دا كلو كلام فارغ وزيجة زي دي ما مكتوب ليها غير الفشل
وكمثال بسيط في سوداني ساكن جمبنا ( راجل كبير ) ومتزوج بس ما عندو اولاد قام رسل صورتو للسودان والصورة من زمن التمانينات والشعر الاسود وعقدوا ليهو على الاساس دا وجاب الزوجة هنا في الخليج والزوجة بعد شافت المنظر طبعا ما قدرت تعمل حاجة استحملتو 3 شهور وبعدها طلبت تمشي السودان وسفرها ومن الزمن داك ما شفناها وكتييير من دا
ونسأل الله السلامة
زيجات الفيديو دي الظاهر عليها آخر التقليعات في سوق الزواج بس اعتقد انها ما وصلتنا هنا لسه.. أنا في رأيي زيجات مثل هذه ما مفروض تتم ابدا.. لانه الشخص المغترب ده لو ظروفه كويسه وبقدر يتحمل المسؤولية على الاقل يمشي يختار العروسة بنفسه بدل ما يختاروها ليه.. وكمان اهلها يشوفوه والعروسة ذاتها تشوفه.. وبعد ما يقتنع الطرفين بعد داك ممكن يتزوج البنت من أهلها.. لانه الزواج مسألة مستقبل ومش لعبة ببنات الناس.
والناس البيزوجوا بناتهم بالطريقة دي.. أنا بعتبرهم تهمهم المادة فقط.. وقنعانين من بناتهم وعايزين يتخارجوا منهن بأي وسيلة.. يمكن يقولوا بسبب الظروف المعيشية الصعبة.. لكن عليهم ان ينظروا للعواقب السلبية التي ستعود على بناتهم بتزويجهم على اناس طاعنين في السن.
ويا حليل ناس زمان لما الخطيب يأخذ خطيبته ويوديها على حديقة سليمان وقيع الله.. يفسحها تمام.. ويعشيها عشا مظبوط.. ويتونسوا مع بعض.. ولحدى ما يتفاهموا كويس بعد داك يتم الاتفاق على الزواج.. لكن المغتربين الظاهر ما عندهم وقت وفضلوا الفيديو.
ويما نعيش ونشوف بدع كثييييييييير.. وديروا بالكم على بناتكم من عرس التكنولوجيا المهبب ده.
وتسلم يا أمير الكل على الموضوع الهام،
عزيز
الزواج هو عشرة تدوم لسنين واعوام اذا مد اللة العمر ومن المفترض
ان يهتم الشاب بهذا الامر اذا كان مغترب بالخارج ان يرجع ويختار ويرى
بنفسةلانة هو الزى يعيش حياتة معها
واستغرب انا كيف البنت ترضة ان تتزوج عن طريق صورة وهو كيف يرضى ذلك
وانا بعرف واحد كان عايز يجن من العرس كلو ما ما يتصل باهلو فى السودان ماعندو سيره غير العرس
طيب كويس قنا لية عندك واحدة معينة خاتيها فى راسك قال لا عندو صور
رسلوها ليةاهلوا وانة سوف يختار قعد يستشير فينا ياتو واحد احلى من التانية
زى التقول احنا العاوزين نعرسها مش هو
ورسى الموضوع على صاحبة النصيب
ورسلوها لية بالبريد السريع
وصاحبنا فرحات واحنا فرحنا معاوى
وصراحة الزواج لم يستمر اكثر من ثلاثة اشهر
وكان الاختلاف فة وجهات النظر وبعد العادات يعنى انعدمت الصفات المشتركة
وكان ابغض الحلال
وهذة حالة واحدة وممكن كان ينجح وفى النهاية قسمة ونصيب
الاخ امينو
مشمور علي المرور والتعليق ؛ والله جاركم ده طلع مخادع والحمدلله مارسل ليها صوره واحد تاني لكن البت تستاهل هي من الاول موافقه ليه دنيا
العزيز عزيز
تسلم ياغالي علي المداخله
يابوي انت باين عليك ماعارف زواج الفيديو ده من بدري تشوف تختار اجمل واحده في الحفله واهلك يرسلوها بارسل ؛ بعرف واحد تزوج بنفس الطريقه وكلمتو وحزرتو قال ماعندو وقت ينزل ويختار اجازتو كلها شهر الناس بتفتش للوجه الحسن لكن الاخلاق كيف مامعروفه ؛ ياناس الجمال بزول فتحو عينكم
الاخ امير دائماً مواضيعك لها نكه وجاده الله يديك العافيه المهم اقول ليك نكته سمعتها من اخونا عادل سعيد ابو جقاده ومن هنا انا رسل له تحياتي واشواقي المهم واحد مغتر عايز يتزوج فارسلت له حوالي 1000 صوره المهم مع العذابه في الغربه اختار احد الصور وفي يوم الزفاف وهو جالس في كوشه وقفت جنبو واحده سمحه لدرجة قف تامل فما كان من اخونا هويعض اصبعه ويقول ليها احي انا ليه مارسلتي صوره...............
عشان كده اخوي امير بالدارجي كده الواحد لازم يحسن الاختيار وابونا الشيخ فرح ودتكتوك قال المره ام خشم خفيف وساق نحيف ان ضربك الزيف جنب بابها ما تقيف وهو يدعو الي اختيار الزوجه وسوف نواصل...........
] تسلم اخوي امير والله مثئلة الفيديو دي موضوع داير تمحيص من كل الجوانب وقد تكون نسبة النجاح 10% بعد التحفيز لان قد يختلف الوضع في كثير من جوانب التوافق في التعليم والعمر والاخلاقيات وووووووووووووو روبنا يهون - بس المشكلة انت عارف الناس الخاطبين وليهم كم سنة خايف يزوجو اختها وهو ماداري وليك التحية
الغالي أمير
سلام كتير وشوق ماليه حد..
الموضوع أجمل من جميل وشائك لكن خلينني أتناوله من كم جانب..
أول حاجة من جانب العريس :
هل الشكل الجميل الحلو مع المكياجات وكده ( لزوم الحفلات والصور ) كفاية عشان تختار شريكة حياتك ؟؟؟ وكدي نأخد لينا وقفة كبيرة في شريكة حياتك دي...
وهل الصورة تغنيك عن معرفة أخلاقها ؟؟؟ عن معرفة أسرتها ؟؟؟ ولنفرض إنك كنت بتعرف أسرتها .. هل تعرف تفكيرها كيف ؟؟؟؟ هل تعرف سلوكها الشخصي ؟؟؟ لأنه بالمناسبة حكاية إنه معرفة الأسرة تكفي للزواج دي إنتهت زمااااااااان. وحكاية كان داير تعرف فاطمة شوف محمد في السوق ياحليليها... فممكن تكون الأسرة ممتازة وعريقة وقمة في الأخلاق وتكون بنتهم ماعندها أخلاق بي تعريفة ( والشواهد كثيرة ) والعكس برضه ممكن تكون الأسرة أخلاقها زي الزفت لكن تكون بنتهم قمة في الأخلاق ( برضه نبعد عنها لوصية المصطفي (ص) إياكم وخضراء الدمن ).
ونقول سألت منها وعرفت إنو أخلاقها تمام وأهلها تمام ...طيب تفكيرها كيف؟؟؟ أولوياتها شنو ؟؟؟؟ ممكن تكون إنت في وادي وهي في وادي.
نجي لي حته تانية ... وهي إنو 90% يكون عندها علاقة مع واحد تاني.. فهل ترضي إنك تكون بدل فاقد.
نجي لي جانب العروس...
هل كلمة مغترب دي كفاية بالنسبة ليك عشان تختاري شريك حياتك... وبرضه نقيف وقفة طويلة في كلمة شريك حياتك دي...
وهل الماده تكفي ؟؟؟ وفي حته مهمة جداً ياأخوانا غايبة عن أهلنا في السودان.. بيفتكروا إنو كل مغترب حيكون مروق ومترفه والقروش عنده متلتلة وماليها حد.... والله في مغتربين ماعندهم حق الأكل والشراب... وشفنا مآسي كتيرة ومصايب تشيب عن أحوال المغتربين.
زمان في التمانينات سمعت شريط للفنانة قسمة وفيهو أغنية بتقول ( حبيبي فانتاستك وبضرب بوهية بوماستك) وعلي الرغم من هيافة الكلمات إلا أنها تصور وقائع حقيقية فهي تحكي عن فتاة تقدم لها أحد المغتربين وكالعادة وافقت وبدون أي تردد حيث لأنها سمعت بأن العريس ( فانتاستك) وسافرت معاهو السعودية وهي تحلم بالروقة والذهب وكده.. وفي مرة وهي معدية لمحت ليك العريس ( الفانتاستك ده ) معلق في سقالة وبضرب في بوهية وطلع شغال دهان.. مع علمها إنو شغال مهندس كبير... وهنا في ناحية كمان مهمة ليه الواحد يستعر من وظيفته ومن وضعه ؟؟؟ طالما إنك مقتنع ودي الوظيفة اللي إنت إخترتها. طيب ليه البوبار؟؟؟ وهل يعيبك إنك تكون دهان ولا خلافه ؟؟؟.
طيب لو جاكي العريس وإنت عندك علاقة مع آخر ليه تسيبيهو وتجري وراء الأحلام الزائفة؟؟؟؟ ليه تضحي بي كل ثوابتك من أجل المادة ؟؟؟؟؟.
أخي أمير لي عودة...
من ناحيه البنات ما كلهم بقبلو
بس معذورات لان ظروف الحياه جبرتهم على الزواج مهما كان الزوج
اما الرجل ينظر من ناحية الكماليات الخارجية
وليس لداخل
وارفض هذه الطريقه الحبوبيه
اديك العافيه اخى امير
والله موش زيى ما قال اخونا ودابكرش
اساسا البيت لو وافق على الزواج الكده
يكون غلط اكبر غلط
موش ظروف الحياه دايره كده
وربنا سبحانه وتعالى قال (تزوجو فقراء يغنيكم الله من فضله)
السلام عليكم
لك التحية اخ امير ..
طبعا زي ما عارفين انو حكاية العرس بالفيديو والصور دي ما جديدة ..
لدرجة انو البنات بقو يمشو الحفلات مخصوص ويتلبسو ويتمكيجو .. دا كلو ليش
يقولو الشريط ماشي السعودية او اى بلد تانى ..
وكمان حكاية انو اى عريس مغترب مروق .. الله يكون في عون المغتربين لانو الواحدة بمجرد ما يقولو ليها مغترب خلاص .. دا هو اللي حيعيشها احسن عيشة في حين انو زي ما قلتو في مغتربين ما عندهم حق الاكل ..
الله يكون في عون الجميع ..
وانا بشوف انو في حاجات اهم من الماديات زى الاتفاق اللي من غيرو الحياة الزوجية ما تستمر .. وطريقة تفكير كل واحد .. دي اهم نقاط بالاضافة للاخلاق اللي بتجى فى المقام الاول .. وكمان السماحة والجمال ما دايمين .
مع تحياتى
قمـــــــــــ الزمان ــــــر
الاخوه الاعزاء
صلاح
ابومرام
خالد هاشم
ودابكرش
بوتشي
قمر الزمان
مشكورين وماقصرتو بدلوكم الرائع كروعتكم ؛ ومزيدا من الاراء