الخادمات الاجنبيات والبيوت السودانية !!

السلام عليكم ورحمة الله

الموضوع عبارة عن الخادمات الاجنبيات في البيوت السودانية وخصوصا دول الخليج ...
بقى ملاحظ انو كتير من الامهات وربات البيوت بيعتمدو على الخادمات في اي شي .. يعنى ما قصدي النظافة او شغل البيت .. لا .. للاسف حتى في تربية الاولاد!! .. وتكون الام شغالة وساعات بتمشي دوامين وما عندها اي اهتمام بالبيت ولا حتى الاولاد ..
وين دور الاب السودانى في هذه الناحية ؟؟
والقيم السودانية المفروض يتربو عليها الاولاد خصوصا وهم ماعايشين في السودان ؟؟
وحتى الام .. كيف تسمح انو واحدة اجنبية تكون هي البتراعى اولادها وهي .. ماتشوف احتياجاتهم ومطالبهم .. دا ما من ناحية مادية لكن من ناحية عاطفتها هي كأم ..
هل الشغل والمصالح بقت اهم من الزوج والبيت والاولاد ؟؟
ولو جينا لناحية الكلام واللغة فالخادمات ولا لامين في عربي ولا انجليزى يعنى تلاقي الاولاد كلامهم ما مفهوم ولغتنا العامية .. انسى ..
وكمان شنو لما يمشو السودان ياخدوها معاهم نظام فشخرة وفنكهة ..
،،،،،،،،،،
في الختام بتمنى انو نسلط الضوء على الموضوع لانو مهم جدا من نواحى كتيرة ويمكن انا في نواحى سلبية كتيرة ما اتكلمت عنها ياريت الاعضاء الكرام يدونا رايهم في الموضوع ويذكرو بعض من السلبيات التى لاتعد او تحصى ..

ودمتم في امان الله وحفظه ..

قـــمـــــــ الــزمــان ـــــــــــــر

شكرا اخت قمر الزمان على الموضوع

وجد دى الحاصل

فعلا ياقمرنا موضوعك دا مهم وياريت نسمع الاراء
وبالجد الزمن دا الاب والام بقى الواحد فيهم مافاضي عشان يقعد مع اولاده في وجبه يتلموا مع بعض
الام تكون اليوم كلو في الشغل وفاكه الاولاد للشغالات وياريت الشغالات لو بيرحمو والله سمعت مره هنا في السعوديه انو في واحده شغاله وبتخلي ولدها الصغير مع الشغاله وبتمشي الشغل مطمئنه لكن الشغاله اول مالام تطلع من البيت بتدي الطفل المنوم عشان مايزعجها وما يمنعها من تكملة شغلها والطفل المسكين ينام لعدة ساعات وقبل موعد الام ماتجي من الشغل تقوم تصحيهو
على العموم مرت الايام ومره الطفل مرض واخذوه على المستشفى وهناك كانت الصدمه الطبيب بلغها انو طفلها بياخذ جرعات كبيره من المنوم والمهم اكتشفت الام انو دا كلو من وراء راس الشغاله
ولكن الزمن دا عجيب هم بيفتكروا انهم بيساعدوهم لكن للاسف والغالبيه منهم
بيدهوروا الاطفال من عدة جوانب واولها اللغه
وتاني حكاية انهم ياخذوهم معاهم السودان وعلى قولك للفشخره والزمن دا بقت الفشخره هي العامل الاساسي عند الامهات
ولكن الله يكون في العون وينتبهوا الام والاب الى ابنائهم من الضياع وراء الشغالين
والف شكر ليك يالغاليه على موضوعك

قمر الزمان موضوعك اساسي والله

وخصوصاً خارج السودان تحتاج الى وقفة حتى يغرسوا في دواخلهم المباديء والقيم السليمة ويكونو جيل له شأن ودور في المجتمعات عموماً ... فالسودانيين المهاجرين لو نشأوا على تربية قويمة بلا شك سيكونو الافضل اجتماعياً وثقافياً لما اكتسبوه في الغربة من ثقافة اضافة لثقافتنا السودانية الاصيلة .. ولكن للأسف فرق شاسع بين من نشأ وترعرع في السودان وبين الذين في الخارج إلا نادراً فقد لمست هذا الفرق في التعامل مع كليهما .. لذا ارى انه على الاسر السودانية التى بالخارج ان ترعى هذا الجانب الهام ... والذي لو ما راعيناه سينعكس سلبناً على الابناء الذي يجهلون عن السودان وبيئته وطبيعة الناس فيه واسلوب الحياة ... وبما أن الأم هي المربى الأول ثم يليها الاب وبقية افراد الاسرة‚ فان الام تبذل فيه قصارى جهدها في تربية الاولاد تربية صالحة وخصوصاً في مرحلة ما بين الطفولة والبلوغ ..

كثير من السودانين حين رجوعم السودان يتفاجأون بالواقع وتلازمهم الدهشة في وطنهم وبين اهلهم .. فتنشأ عقدة عدم الانصهار والتأقلم وزي ما قالت قمر الزمان بيألفوا لغة ما مفهومة .. وحتى تعاملهم مع الناس بيكون ما فيه نوع من التلعثم والاجتهاد في توصيل المعلومة دة طبعاً على سبيل الحصر ولا ينفى انو في سودانيين عمرهم ما شافو السودان لكن بيعرفوا اكتر من العايشين في السودان .. فتربية الاولاد خارج السودان محتاجة لوقفة ..فهذا حق الابناء وواجب الآباء .. فترك التربية للمربيات غلط واثاره سيئة .

تحياتي
شكراً قمر الزمان على الموضوع الحساس

موضوعك جميل يا قمر الزمان
وفعلا نجد ان معظم ابناء المغتربين
مختلفين تماما عن الموجودين فى
السودان ليس فقط من ناحية التربية
بل فى كل شى .
الموضوع فعلا يحتاج الى وقفة
ومتابعة حتى ينصلح الحال مع الجميع .
ومشكورة جدا على الموضوع يا قمر الزمان


ولــــــــــــــــــــــــى

احيك اخت قمر الزمان على اثراء المنتدى بهذا الموضوع الهام و الخطير ،،

اولا الحكمة تقول العاقل من يتعظ بغيره ،،
و ثقافة الخدامات منتشرة فى المجتمعات الخليجية (مواطنى دول الخليج ) بشكل فاحش ،، و ورث منها هذا المجتمع تفكك اسرى من الدرجة الاولى ،، و تسببت فى مشاكل اسرية و اجتماعية و تربوية مزمنة اصبحت هاجسا جعل وسائل الاعلام و الشؤون الاجتماعية تناقشه بشكل وبائى.

اما نحن السودانيين فمجتمعنا يتمتع بترابط اسرى عميق ،، اثرته التربية السليمة داخل المجتمع ،، و فيه من الثقة ما يحمد حتى اليوم ،، و لكن ظروف الحياة اضطرة بعض الاسر بل كثير من الاسر السودانية للهجرة طلبا للرزق ،، و الحياة الكريمة التى افتقدتها فى الوطن ،،، و لكن هل سأل كل انسان نفسه لماذا ترك الوطن و اغترب ،، هل من اجل جمع المال ام من اجل توفير العيش الكريم لأبنائه او لتحقيق رغبة لم يستطع ان يحققها و هو داخل الوطن،،

هذه تسمى اهداف ،، لا بد من وضع وسائل تسهل الوصول لهذه الاهداف ،،
مع العلم بأن اى اسرة تعمل من اجل الابناء ،، و لذلك حق على كل اسرة ان تعمل من اجل تحقيق اهدافها و لا تضحى بها مهما كان.

الوسائل مثل خدامة او مربية للابناء لتوفر لربة البيت (الام) بعض الوقت لتعمل فيه مقابل اجر ،، و تنسى هدفها و ما اخرجها من الوطن ،، اليست هذه حماقة

اذا حدث هذا فحتما سوف تكون العواقب وخيمة لا تحمد و لا ينفع البكاء حينها فقد قضى الامر.. و دلق الماء و علينا الحصاد كل يحصد ما زرع،،

و الخاسر الثانى المجتمع اجمع

مشكور على مرورك اخى خالد ..
ويا مرفأ دى حالة من ملايين الحالات البتحصل كل يوم والناس ما جايبة خبر ..
وماخفى طبعا اعظم .. لكن الشئ البغيظ انو بعض الاولاد بقو متعودين على الخادمات وبحبوهم اكتر من امهاتهم ...
لكن نقول شنو .. الله يعين المغتربين
وشكرا على مرورك يا غالية .

شكرا ياقمرنا........


فعلا موضوعك يحتاج النقاش الجاد



الونظر فيه.........



يديك العافية.......

اقتباس:

---

كاتب الرسالة الأصلية ابراهيم
قمر الزمان موضوعك اساسي والله

وخصوصاً خارج السودان تحتاج الى وقفة حتى يغرسوا في دواخلهم المباديء والقيم السليمة ويكونو جيل له شأن ودور في المجتمعات عموماً ... فالسودانيين المهاجرين لو نشأوا على تربية قويمة بلا شك سيكونو الافضل اجتماعياً وثقافياً لما اكتسبوه في الغربة من ثقافة اضافة لثقافتنا السودانية الاصيلة .. ولكن للأسف فرق شاسع بين من نشأ وترعرع في السودان وبين الذين في الخارج إلا نادراً فقد لمست هذا الفرق في التعامل مع كليهما .. لذا ارى انه على الاسر السودانية التى بالخارج ان ترعى هذا الجانب الهام ... والذي لو ما راعيناه سينعكس سلبناً على الابناء الذي يجهلون عن السودان وبيئته وطبيعة الناس فيه واسلوب الحياة ... وبما أن الأم هي المربى الأول ثم يليها الاب وبقية افراد الاسرة‚ فان الام تبذل فيه قصارى جهدها في تربية الاولاد تربية صالحة وخصوصاً في مرحلة ما بين الطفولة والبلوغ ..

كثير من السودانين حين رجوعم السودان يتفاجأون بالواقع وتلازمهم الدهشة في وطنهم وبين اهلهم .. فتنشأ عقدة عدم الانصهار والتأقلم وزي ما قالت قمر الزمان بيألفوا لغة ما مفهومة .. وحتى تعاملهم مع الناس بيكون ما فيه نوع من التلعثم والاجتهاد في توصيل المعلومة دة طبعاً على سبيل الحصر ولا ينفى انو في سودانيين عمرهم ما شافو السودان لكن بيعرفوا اكتر من العايشين في السودان .. فتربية الاولاد خارج السودان محتاجة لوقفة ..فهذا حق الابناء وواجب الآباء .. فترك التربية للمربيات غلط واثاره سيئة .

تحياتي
شكراً قمر الزمان على الموضوع الحساس

---

اولا مشكور على مرورك ابراهيم ..
وزي ما قلت الام هي المسؤلة الاولى ثم يليها الاب ،، لكن لما الام تتخلى عن المسؤلية دى وتفتش لي مصالحا وواحدة تانى تربي ليها عيالها لدرجة انهم يتعلقو بيها اكتر من امهم دى محتاجة وقفة كبيرة جدا من الاب والام ..
وزى ما قلت الاثار السيئة كتيرة ..

لكم التحية الاخوان :
ولــــــــــــي
ودابكرش
الزمن المريح : زى ما قلت المغتربين نسو هدفهم اللي اغتربو عشانو وهو ابنائهم وبقو يدورو على المصلحة ..
وفى النهاية الندم ما بنفع .. احسن الناس تراجع نفسها قبل لا تسوي اي شي ..
ويديكم العافية ..
وربنا يهدي الجميع ..

اولا احييكي اختي قمر الزمان على الموضوع الرائع والحمد لله انو الجيل الصاعد من النساء السودانيات واعي للموضوع المهم دا لانو لو استمر الحال كما هو عليه حا ياخد ابعاد سلبية جدا ويعود على المجتمع بجيل فاقد لابسط الصفات السودانية وهي التعاطف والاخلاق الكريمة وغيرو من الصفات اللي ورثناها من اباءنا واجدادنا وبقت نادر ما نشوفها في الاجيال اللي مفروض تكون واعدة.
الاعتراض هنا ما على مبدأ الخادمة ولكن انو الخادمة تحل محل الام !!!!
غايتو حقو اهلنا المغتربين يصحوا ويفتحوا عيونهم كويس لانو الاغتراب دا لي اولادهم اولا واخيرا ولا حيكونوا ضيعوا عمرهم وصحتهم على الفاضي لانو الاولاد ديل في المستقبل هم البشيلوهم عشان كدا مفروض يتربوا من الاول على القيم والمبادئ السودانية المتعارف عليها ودي حاجات ما بلقوها عند الخادمات الاجنبيات.
اشكرك اختي قمر الزمان لوعيك الكامل واهتمامك بالموضوع

العزيزه قمر الزمان

قمر الزمان يا الرايقه يا ست الحسان..
الخادمات مصيبه من مصائب هذا الزمان..
يلغين دور الام ويتربعن مكان الزوجه معظم الاحيان...
وقد تلد الامه ربتها وينتهي الاب مع السجان..
فتنهار الاواصر الاسريه وتتبعثر في كل مكان...
يضيع الابناء وتتلاشي هويتهم فياللخسران...
فمتي يوقف هذا النزيف وتوزن الامور بالميزان...

جمال

الغالية قمر الزمان
أولا تسلمي على الموضوع البجد أكثر من رائع
وفعلا هبشتي الناس من الوتر الحساس واللي الناس غافلة عنو
ونايمة في العسل وبالجد الناس ما جايبة خبر الواحد فاكر روحو خلاص ريح بالو وبال الولية وهو بيلقي في نفسو وبي اسرتو للتهلكة وانا لاحظت للحتة دي كم مرة في مطار الخرطوم وياليت هي شغالة واحده بس والله لقيت اسر جايبات معاهم أكثر من تلاتة شغالات "لي دي ما ميزانية براها" وغير وغير وغير وغير
نسأل رب العباد انو يصلح حال ناسنا المغتربين مع ان دي أكبر مشكلة بصراحة تواجه السودانيين انو الواحد أقل طرطيبة خلاص يا دنيا مافيك الا انا
واتمنى من الله انو يصلح حال أهالينا المغتربين
وربنا يديكم الصحة والعافية

مشكورين على المرور :
امينو
العم جمال
مزونى

وزى ما قلتو احسن المغتربين يفتحو عيونهم كوييييييييييس والله
ويديكم العافية ..

يسلموو على الموضووع قمر الزمان
فاقد حنان

والله كلامك صحي دي حركات اتعلموها السودانيين المغتربين لكن نعمل شنو هم ما دايرين اربو اولادهم دايرين الخادمات تربيهم
اولا النواحي السلبيه كتيره ومنها اللغه و عدم الشعور بالحنان بتاع الام
وغيره كتير
مشكوووووره والله علي الموضوع اللافت للنظر

عزيزتي ياقمر يازمان....
تحية وانت تحملين على كاهليك هم الوطن وأجيال الوطن...
ولنكن موضوعيين أكثر في النقاش... من هو المسؤول عن هذه الظاهرة؟
هل هو الرجل... والذي يسعى إلى إرضاء زوجته بكل السبل ويتيح لها فرصة العمل نتيجة لرغبتها وطلباتها الملحة والمستمرة من إنها ملت الجلوس في البيت بين أربع جدران..

هل المرأة هي المسؤولة... وهي لافتئت تطالب بالمساواة بالرجل في أي شيء وطرقت كل الأبواب من أجل ذلك وأهملت دورها الأساسي(ولا أقول الذي خلقت من أجله)، ولكن أعتبره دور أساسي وهو تربية أبنائها والوقوف على متطلباتهم واحتياجاتهم، وهي تقول أنها لم تتعلم وتدرس لتجلس في البيت.

هل ظروفنا الإقتصادية هي السبب... ومتطلبات البيوت ومنصرفاتها أصبحت تفوق الخيال... وبالأمس كان الرجل هو مصدر الدخل الوحيد في البيت وكان بإمكانه تغطية كل منصرفات البيت من أكل وشرب وعلاج وسكن وتعليم وكل متطلبات البيت الأخرى ... الآن إرتفعت تكاليف العيش وأصبح راتب الزوج وحده لايكفي مما دفع الزوجة إلى العمل لتساعد الزوج في تغطية ولو جزء بسيط من منصرفات البيت، ومن الملاحظ وجود أكثر من شخص في البيت يعملون .. الزوج والزوجة والأولاد والبنات ورغم ذلك لايستطيعون تغطية المنصرفات ولا مجاراة الظروف الإقتصادية ذات الإنطلاق الصاروخي.

مشكورين على المرور
فاقد حنان
هناد

يديكم العافية

لك التحية اخى ساردية
والمسؤولية اولا واخيرا على الرجل والمرأة سواء ..
يديك العافية ومشكور على المرور