والي محسن خالد اهديت هذا النص ...
حد ما غناك .. أدى العصافير وجهتا
وشق المزامير بالنحيب
نديكا من فيض الاماني المفرطة
وهجعه من زمن المغنين الحبيب
نقسم معاك خبز الطريق
شمس الاماني الفالتة ..
والعرفة للزول الغريب
حنشتهي الحزن المعاك ..
وضحكة صافية نحتحتا ..
في صيف سنينك والمظنات القبيل ..
داخراكا من اخر شتا
ما نحن ذات المفلتين
من ليل سمين
ذات اللي كايسين الغتا
من ريح لعوب .. وسهام هبوب
جايانا ما عارفين ... متى
نحن اللي واقفينلك .... تعال
فالدنيا ما خاتالنا بال
عكس المشارق وجهتا
يا صاحي ما شالك خيال
ألحق بصيرتك وألفتا
على ضو نضيف
ما تمشي في الشارع الختا
وهزمت فيني الاحتمال ...
مشيت ..
شهيتني طعم الاغنيات ..
السافرت خلفك ... ترِح
واديتني من غيبتك سكات
زمن الكلام الما سمح
ما كنت يا صاحب تقول
او اقلو انك تقترح
سفرا مسافاتو بتطول
وانا راضي لو خطوك ملح
لكن براك .. غنيت بلاي
خليتني لى حزنا بضوقو ملح .. ملح
مشيت ..
لوحت مد القدرة ما شالت ايديك
رجعت نداءاتك ... أسف
ومتاح .. سبورة لى حصة قدر ..
أشرت لي كمين قطار ..
عندك المجهول .. وقف
ألكع .. وطوح في مداك ..
تحتك الموية وقفاك ..
سهم الهموم كايسك هدف
ألكع .. سماك ما حمل الغيوم ..
تتشابى لى محض الصدف
كان تستريح .. من حزنك الرامي الفسيح
ويسكت الجرح الفصيح
ويطيب غناك الكم .... نزف .
