اطالب بالتعويض من الممرضة بت العباسية
امس جاتني وجعة . . وجعة شديدة خلاس في بطني . . البطن منها و ليها جنّت . . قعدت تسوي في حاجات كدي ما حلوة . . تتنفخ و تنفشا و تاني تتنفخ . . طالع نازل . . كست لي هبوب ساااكت تخفف الوجيعة دي ما لقيتا . . قايتو الدنيا لمن تعاكس، تصاقر الواحد في بطنو . . وكت تتنفخت تبقى قدر القربة . . اقعد احوش فيها بي يديني الاتنين. . و افك ليها زرار القميص عشان تلقى راحتا . . بس الوجيعة ما ابت تخف.
وكت غلبني البسويهو اتسولبت ليها عريان عيلا بي لباسي . . و قعدت ادردق بالواطة . . و اعضعض في المخدة . . اللباس ذاتو وكت ضايقني فكرت اقلعو و اجدعو بالشباك للبنغالة الجمبنا . . اسوي بيهو شنو اللباس . . هو دا وكت لباس!!! . . بس لكن نعلت ابليس . . و قلت الوجعة و لا الفضيحة . . باقي الفضيحة في السعودية فيها ترحيل نهائي . . و لو فهموك غلط فيها قص رقبة . . و قص حاجات تانية في زمتي ما بقد أقولا . . في شان كدي قلت اخلي لباسي في حتتو و اصحي صاحبي مراد . .
اتلفت لي مراد . . لقيتو نايم مبسووووط . . تورتو و نعنعتو و قطعت ليهو نومتو . . قلت ليهو يا مراد . . بطتني دايرة تنقدة ورحكاكا وديني المستشفى . . مراد قام من نومو زعلان . . و نعل اليوم العرفني فيهو . . لكن وكتين عرفني مضايق . . لبسني هديماتي و درجّني و تكّلني لي عند باب المستشفى . . و ما قصر معاي دخلني لي دكتور باكستاني . . وشو قدر الدلوكة . . و انا من زمان جني و جن الباكستان . . هم براهم يسووا الوجعة . . الدكتور الباكستاني من شافني زعل و قعد يطنطن . . ظنيتو شكلي دا ما عجبو . . قال لي الممرضة بدون ما يفحصني قال ليها . . اديهو حقنة . .
انا النصيحة لله زعلت من كلام الدكتور الباكستاني دا . . و كنت داير اقول ليهو . . يا دكتور انا ما بتاع حقن . . انا بخاف من الحقن . . عليك الله اصرف لي شوية حبيبات خليني ابلعن بي موية . . لكن وكتين شفت الممرضة الدايرة تديني الحقنة حلوة و طالعه من علبها قررت اني آخد الحقنة و امرنا لله . . قمت كوركت ليها و انا ماسك بطني . . تعالي يا اخت . . الدكتور قال ليك اديني حقنة بتاعت وجعة . . الممرضة جاتني تتقسم من بعييييييد . . و وقفت جمبي . . شايلة حقنة الوجعة . . وكت وقفت جمبي الوجعة خفت مني . . بقيت في الشيء البخلي الممرضة الحلوة دي تتحكر جمبي . . كستا سما وطا لي شيتاً اقولوا ليها عشن تتحكر جمبي ما لقيت . . و اتمنيت يجيبو لنا كرسيين واحد لي و التاني ليها. . و نقعد نطق الحنك و نفكر في مستقبلنا الراجينا و اولادنا الجايين . .
وكت شفتها قعدت تعبي لي في حقنة الوجعة، ما لقيت لي شيتاً اسويهو عيلا اني رقدت ليها في السرير سريع سريع . . قلت اسهل ليها مهمتا . . قامت اتخلعت و قالت لي . . ويش بك يا زول . . وقف حيلك . . انت جاي منين . . قمت مخلوع زي الطقتني عقرب و وقفت ليها علي حيلي . . و قلت ليها : نحنا في السودان بطعنونا الحقن كدي . . ممكن تسعلي صاحبي الجبور الجابني ليكم.
أمانة في زمتي الممرضة دي طعنتني الحقنة و انا واقف علي حيلي زي عمود النور . . و وحااات سيدي الحسن الحقنة دي لا شعرت بيها و لا حاجة . . الكمدة بالرمدة . . كست لي الوجعة فوق تحت ما لقيتا . . و الله صحي الشفا علي كفوف الحلوات.
اتزكرت الممرضة بت العباسية الحاقدة ادتني حقنة زماااان في مستشفى ام درمان كانت عندي مراريا . . يدينا كانن مليانات عروق . . و عضلاتا يا رحمن يا رحيم . . قالت لي : يا فيفيد ارقد في السرير . . قلت ليها و الله ما ارقد . . احسن ليك ترقد . . ما برقد انتي دايرة ترقديني بالرجالة؟!!! . . قامت منها و ليها رفعتني فووووق حنكلتني من كرعيني . . و رمتني في السرير و غزت لي الحقنة في قنقرة ضنبي . . سرخت . . قعدت تضحك فيني فرجتني فيني مستشفى ام درمان كلو . . قايلة سرختي من الحقنة . . و هي الغبيانة ما جايبة خبر . . انا سرختي دي كانت من يديها . . يديها وكت قعدت تدغدغ لي في طعنة الحقنة . . كنت حاسي بيها زي الزول القاعد يكرش فيني بي نملية . . و لي يومنا دا طعنة بت العباسية دي ورمانة . . عاملة لي حبن قدر النبقة فوق قنقرة ضنبي . . حسي انا كبييير بعد مرات اكون واقف قدام المدير في المكتب . . وكت الحبن يتاورني اقعد انكرش قدام المدير زي العوير .
الليلة غايتو جاتني فكرة اني أقاضي الممرضة بت العباسية كان اطلع لي منها بي حق دكان ناصية في سوق ام درمان
